(បរទេស)៖ ក្រុមហ៊ុន AI Perplexity ដែលមានមូលទីនៅទីក្រុងសានហ្វ្រាន់ស៊ីស្កូ ហើយមានតម្លៃទៅផ្សារប្រហែល​ ១៨ពាន់លានដុល្លារនោះ នាពេលថ្មីៗនេះបានដាក់សំណើ ដើម្បីទិញកម្មវិធីរុករកតាមអ៊ីនធឺណិត Google Chrome ក្នុងតម្លៃ៣៤.៥ពាន់លានដុល្លារ ដែលខ្ពស់ជាងតម្លៃក្រុមហ៊ុនរបស់ខ្លួនជិតពីរដង។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី១៣ ខែសីហា ឆ្នាំ២០២៥។

សំណើនេះត្រូវបានដាក់ក្នុងពេលដែលក្រសួងយុត្តិធម៌សហរដ្ឋអាមេរិកកំពុងបន្តដំណើរការក្តីក្តាំប្រឆាំង Google ចំពោះការត្រូវចោទថា បានរក្សាការត្រួតត្រាបញ្ចូលគ្នានៃសេវាស្វែងរក។ មួយក្នុងចំណោមវិធានការដែលតុលាការអាចជ្រើសរើសគឺ ការបំបែកកម្មវិធីរុករក Chrome ចេញពី Google។ Perplexity បានលើកឡើងថា ប្រសិនបើទទួលបាន Chrome ក៏នឹងរក្សាទុកប្រព័ន្ធដើម Chromium ជាប្រភពបើកចំហ បន្តប្រើ Google ជាម៉ាស៊ីនស្វែងរកលំនាំដើម និងវិនិយោគ ៣ពាន់លានដុល្លារក្នុងរយៈពេលពីរឆ្នាំ ដើម្បីបង្កើនប្រសិទ្ធភាព សុវត្ថិភាព និងការគាំទ្រ។ សំណើនេះមានការគាំទ្រពីមូលនិធិវិនិយោគធំៗ ប៉ុន្តែមិនបានបញ្ជាក់ឈ្មោះឡើយ។

អ្នកវិភាគជាច្រើនព្យាករថា សំណើនេះគឺមានការពិបាក ព្រោះប៉ះពាល់ដល់ការសម្រេចចុងក្រោយរបស់តុលាការ ហើយបើមានការបំបែក Chrome ពិតមែននោះ ក្រុមហ៊ុនកំពុងលេចធ្លោរនិងជាគូប្រកួតប្រជែងដែលមានថវិកាធំជាង ដូចជា OpenAI អាចមានឱកាសច្រើន។ សំណើនេះកើតឡើងក្នុងពេលដែលចៅក្រមសហរដ្ឋអាមេរិក Amit Mehta ដែលបានសម្រេចមុននេះថា Google បានសេវាស្វែងរកដោយខុសច្បាប់ កំពុងរៀបចំចេញវិធានការបញ្ចប់។ Perplexity ទើបតែបានចេញកម្មវិធីរុករកអ៊ីនធឺណិតផ្ទាល់ខ្លួនឈ្មោះ Comet ដូច្នេះសំណើទិញ Chrome ក៏ជាជំហានផ្សព្វផ្សាយឈ្មោះ និងបង្ហាញអត្តសញ្ញាណក្រុមហ៊ុនផងដែរ។

គួរជម្រាបថា ជុំវិញព័ត៌មានខាងលើ Google មិនទាន់ឆ្លើយតបសាធារណៈឡើយ ហើយក៏បានព្រមានក្នុងតុលាការថា ការបង្ខំឲ្យបំបែកទ្រព្យសម្បត្តិសំខាន់ៗដូចជា Chrome ឬ Android អាចប៉ះពាល់ដល់ការបង្កើតអង្គភាពថ្មី និងធ្វើឱ្យអ្នកប្រើរងគ្រោះ៕