(បរទេស)៖ Paris Saint Germain ប្រមូលពានដល់ទៅ៥ និងចុងក្រោយពាន UEFA Super Cup ប្រចាំឆ្នាំ២០២៥ ក្រោយយកឈ្នះគូប្រជែងរបស់អង់គ្លេស Tottenham Hotspur ៤-៣ ដោយបាល់ ១១ម៉ែត្រកាត់សេចក្តីនាយប់មិញនេះនៅប្រទេសអ៉ីតាលី។

ក្រុមជើងឯករបស់បារាំងមួយនេះ បានធ្វើការវាយបកតាមស្មើដ៏អស្ចារ្យ ក្នុងរយៈពេលប្រមាណ ១០នាទីចុងក្រោយ បន្ទាប់ពី Spurs បាននាំមុខ ២គ្រាប់មុនដល់នាទី៨៥ ទៅហើយនោះ។

កីឡាករកូរ៉េខាងត្បូង Lee Kang-In និង Goncalo Ramos ជាអ្នករកបានម្នាក់ ១គ្រាប់នាំឱ្យក្រុមជើងឯកអឺរ៉ុប PSG តាមស្មើ ២-២ ទល់នឹងម្ចាស់ជើងឯកពានលំដាប់ទី២ Europa League ក្នុងរយៈពេល ៩០នាទី ញាំងឱ្យការទាត់បាល់ ១១ម៉ែត្រកាត់សេចក្តីកើតមានឡើង នៅពេលក្រុមរបស់លោក Luis Erique ធ្វើបាន ៤គ្រាប់ ហើយកូនក្រុមរបស់លោក Thomas Frank វិញទាត់ចូល ៣គ្រាប់។

គួរបញ្ជាក់ផងថា ឆ្នាំ២០២៤-២០២៥ ជារដូវកាលដ៏អស្ចារ្យបំផុតសម្រាប់ PSG ដែលដណ្តើមបានពានទាំង៣ របស់ប្រទេសបារាំង និងពានអឺរ៉ុប ២ផងដែរជាលើកដំបូងសម្រាប់ពួកគេរួមមាន UEFA Champions League និង UEFA Super Cup៕