(បរទេស)៖ លោក Igor Babuschkin ដែលជាសហស្ថាបនិកក្រុមហ៊ុន xAI ផ្នែកបញ្ញាសិប្បនិម្មិតរបស់លោក Elon Musk បានប្រកាសលាលែងពីតំណែង។ លោកបានសម្រេចចិត្តបង្កើតក្រុមហ៊ុនវិនិយោគផ្ទាល់ខ្លួនថ្មីមួយឈ្មោះថា Babuschkin Ventures ដែលនឹងផ្តោតសំខាន់លើការស្រាវជ្រាវ និងការវិនិយោគលើវិស័យសុវត្ថិភាព AI។ នេះបើយោងតាមការចេញផ្សាយដោយ CNA នៅថ្ងៃទី១៤ ខែសីហា ឆ្នាំ២០២៥។

លោក Musk បានបង្កើតក្រុមហ៊ុន xAI កាលពីឆ្នាំ ២០២៣ ដើម្បីប្រកួតប្រជែងជាមួយក្រុមហ៊ុនបច្ចេកវិទ្យាធំៗ ដោយចោទប្រកាន់ថាក្រុមហ៊ុនទាំងនោះមានស្តង់ដារសុវត្ថិភាពធូររលុងពេក។ លោក Babuschkin ខ្លួនឯងក៏ធ្លាប់ធ្វើការនៅក្រុមហ៊ុនធំៗដូចជា Google’s DeepMind និង OpenAI ផងដែរ ហើយលោកបានដើរតួនាទីយ៉ាងសំខាន់ក្នុងការបង្កើតហេដ្ឋារចនាសម្ព័ន្ធដំបូងរបស់ xAI។

ការចាកចេញរបស់លោកកើតឡើងចំពេលដែលក្រុមហ៊ុន xAI កំពុងប្រឈមមុខនឹងការចាកចេញជាបន្តបន្ទាប់ពីថ្នាក់ដឹកនាំសំខាន់ៗដូចជាលោក Robert Keele ប្រធានផ្នែកច្បាប់របស់ xAI និងលោកស្រី Linda Yaccarino អតីត CEO របស់ X ដែលជាក្រុមហ៊ុនក្រោមការគ្រប់គ្រងរបស់លោក Elon Musk ផងដែរ។

គួរជម្រាបថា ការចាកចេញទាំងនេះបានកើតឡើងចំពេលដែលការប្រកួតប្រជែងក្នុងវិស័យ AI កំពុងកើនឡើងខ្លាំងពីសំណាក់ក្រុមហ៊ុនយក្សដូចជា OpenAI, Google និង Anthropic ដែលកំពុងចាក់លុយវិនិយោគយ៉ាងច្រើនសន្ធឹកសន្ធាប់ទៅលើបច្ចេកវិទ្យានេះ៕