(បរទេស)៖ រុស្ស៊ីហាមឃាតការហៅទូរស័ព្ទតាម Telegram និង WhatsApp ដោយអះអាងពីការល្មើសច្បាប់ ពោលគឺវាបានកើតឡើងនៅថ្ងៃទី១៣ ខែសីហា ឆ្នាំ២០២៥ ដោយអាជ្ញាធរទំនាក់ទំនងរបស់រដ្ឋរុស្ស៊ី (Roskomnadzor) បានប្រកាសថា ប្រទេសនេះបានចាប់ផ្ដើមដាក់កំហិតលើសេវាការហៅជាសំលេង (voice calls) តាម Telegram និង WhatsApp។ ជាហេតុផលនៃការដាក់ទណ្ឌកម្ម គឺដោយសារតែក្រុមហ៊ុនម្ចាស់កម្មសិទ្ធិនៃកម្មវិធីទាំងនេះបាន បរាជ័យក្នុងការអនុវត្តតាមច្បាប់ជាតិ ដែលពាក់ព័ន្ធនឹងការប្រយុទ្ធប្រឆាំង ឧក្រិដ្ឋកម្មអេឡិចត្រូនិក និង ភេរវកម្ម។ នេះបើតាមចេញផ្សាយដោយសារព័ត៌មាន Reuters នៅថ្ងៃទី១៤ ខែសីហា ឆ្នាំ២០២៤។

ការដាក់ទណ្ឌកម្មនេះ មិនជះឥទ្ធិពលលើការផ្ញើសារ ឬសេវាផ្សេងទេ ដោយវាត្រូវបានកំណត់គោលដៅតែទៅលើការហៅតាមអ៊ីនធឺណិត ហើយការហៅតាម Telegram ត្រូវបានរាយការណ៍ថា នឹងមិនអាចដំណើរការបានទៀតឡើយចាប់ពីថ្ងៃទី១១ ខែសីហា។ ការហៅតាម WhatsApp មានបញ្ហាសំឡេងរំខាន ឬមិនអាចតភ្ជាប់បានឡើយ។ អាជ្ញាធររុស្ស៊ីអះអាងថា ការហៅតាមកម្មវិធីទាំងនេះត្រូវបានប្រើប្រាស់សម្រាប់បញ្ហាឧក្រិដ្ឋកម្មដូចជា ការលួចសម្ភារៈតាមបច្ចេកវិទ្យា, ការខកខានក្នុងការផ្តល់ព័ត៌មានជូនអាជ្ញាធរ, ការព្យួរការអនុវត្តច្បាប់របស់ប្រទេសរុស្ស៊ី។ ក្រុមហ៊ុន Telegram និង WhatsApp ត្រូវបានចោទថា មិនបានបង្កើតសាខាផ្លូវការនៅក្នុងប្រទេស, និងមិនបានសហការជាមួយអាជ្ញាធរ បើទោះបីជា Telegram មានស្ថាបនិកជាជនជាតិរុស្ស៊ីផ្ទាល់ គឺលោក Pavel Durov ក៏ដោយ។

ការធ្វើបែបេនះ គឺជាផ្នែកមួយនៃយុទ្ធសាស្ត្ររដ្ឋ «អធិបតេយ្យឌីជីថល» ឬ Digital Sovereignty ពោលរដ្ឋាភិបាលរុស្ស៊ីកំពុងអនុវត្តគោលនយោបាយគ្រប់គ្រងបណ្តាញឌីជីថលជាផ្លូវការ។ ដូច្នេះ ការដាក់កំហិតលើកម្មវិធីបរទេសនេះ គឺជាផ្នែកមួយនៃការជម្រុញឲ្យប្រើប្រាស់កម្មវិធីក្នុងស្រុក។ កម្មវិធីថ្មីមួយឈ្មោះ MAX ត្រូវបានរដ្ឋបង្កើតឡើង ដើម្បីជំនួស Telegram និង WhatsApp។ វានឹងត្រូវបានដំឡើងជាមុនលើស្មាតហ្វូនគ្រប់គ្រឿងនៅរុស្ស៊ី ចាប់ពីខែកញ្ញា ឆ្នាំ២០២៥។ ងាកមក Meta ដែលជាម្ចាស់កម្មវិធី WhatsApp ត្រូវបានរដ្ឋាភិបាលរុស្ស៊ីកំណត់ថាជា «អង្គការបំផ្លាញសង្គម» តាំងពីឆ្នាំ២០២២។ ការដាក់ទណ្ឌកម្មនេះអាចជាជំហ៊ានមួយដើម្បីបញ្ចប់ការរកស៊ីរបស់ WhatsApp នៅក្នុងប្រទេស៕