(ភ្នំពេញ)៖ លោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ បានដឹកនាំកិច្ចប្រជុំ ក្រុមប្រឹក្សាបរធនបាលលើកទី១៨ ដើម្បីបូកសរុបការងារ និងវាយតម្លៃសមិទ្ធផលសំខាន់ៗ ដែលសម្រេចបានត្រឹមឆមាសទី១ ឆ្នាំ២០២៥។

កិច្ចប្រជុំនេះ ក៏បានសម្រេចលើការកំណត់យុទ្ធសាស្រ្តជាបន្ត ដើម្បីឆ្លើយតបនឹងស្ថានភាពបច្ចុប្បន្ន និងចក្ខុវិស័យនាពេលអនាគតក្នុងការ លើកស្ទួយ និងពង្រឹងប្រព័ន្ធអេកូឡូស៊ី សហគ្រិនភាពនៅកម្ពុជា។ កិច្ចប្រជុំនេះ​ ធ្វើឡើងនៅថ្ងៃទី១៣ ខែសីហា ឆ្នាំ២០២៥។

ចំណុចសំខាន់នៅក្នុងកិច្ចប្រជុំ គឺការស្នើអនុម័តគម្រោងជាច្រើនរបស់សហគ្រិនខ្មែរ ដើម្បីឆ្លើយតបឲ្យទាន់នឹងសភាពការណ៍ សេដ្ឋកិច្ចបច្ចុប្បន្ន ក្នុងនោះរួមមាន៖
* កម្មវិធីកញ្ចប់ជំនួយសហគ្រិនខ្មែរ លើកទី១៣ បន្តបើកពាក្យ និងផ្តល់ជំនួយហិរញ្ញវត្ថុដល់សហគ្រិនក្នុងស្រុកទូទាំង ប្រទេសសំដៅ លើការអភិវឌ្ឍផលិតផល និងពង្រីកទីផ្សារ។
* កម្មវិធីសហគ្រិនវិទ្យាល័យ និង កម្មវិធីសហគ្រិនមហាវិទ្យាល័យ ក៏បានពង្រីកវិសាលភាព និងជំរុញភាពប្រកួតប្រជែង កាន់តែស្វិតស្វាញនៅទូទាំងប្រទេស។
កម្មវិធីទាំងពីរនេះបានសាបព្រោះវប្បធម៌សហគ្រិនភាពដោយផ្ទាល់ទៅកាន់ សិស្សានុសិស្សនិងនិស្សិតសរុបជាង ៨,៣០០នាក់ ដែលបានដាក់ពាក្យចូលរួម បង្ហាញគំនិតអាជីវកម្មរបស់ពួកគេ នៅ ក្នុងឆ្នាំនេះ។

* យុទ្ធនាការដែលសហគ្រិនខ្មែរគ្រោងនឹងធ្វើឡើងបណ្តាក់គ្នាក្នុងអំឡុងពេលខាងមុខនេះក៏ជាយន្តការជំរុញ និងលើកទឹកចិត្តសហគ្រិនយ៉ាងផុសផុលដូចជា៖
១៖ ការប្រគល់ពានរង្វាន់សហគ្រិនឆ្នើមជាច្រើនផ្នែក រាប់ចាប់ពីវិទ្យាល័យរហូតដល់កម្រិតសហគ្រាសធុនមីក្រូ តូច និងមធ្យម។
២៖ ការជួបជុំសហគ្រិនក្នុងស្រុកដើម្បីចែករំលែកបទពិសោធន៍ក្នុងការជំរុញលទ្ធភាពទទួលបានការ វិនិយោគពីវិនិយោគិនក្នុងនិងក្រៅប្រទេស។
៣៖ ការកសាងទំនាក់ទំនងជាមួយស្ថាប័នកសាងប្រព័ន្ធអេកូឡូស៊ី សហគ្រិនភាពមកពីតំបន់អាស៊ី។
៤៖ ការផ្គូផ្គង សហគ្រាសជាមួយតំណាងផ្សារទំនើបក្នុងស្រុកនានាជាដើម។

ថ្លែងនៅក្នុងកិច្ចប្រជុំនេះដែរ លោក ហែម វណ្ណឌី បានថ្លែងថា «គម្រោងផ្តួចផ្តើមរបស់ សហគ្រិនខ្មែរ បានបង្ហាញពីប្រសិទ្ធភាពខ្ពស់ ក្នុងការគាំទ្រសហគ្រិនក្នុងស្រុក និងបង្កើតឱកាសការងារ»។

លោកថា សហគ្រិនខ្មែរ នៅតែបន្តរក្សាកម្មវិធីស្នូល ដែលមានស្រាប់, ពង្រីកគម្រោងយុទ្ធសាស្រ្តបន្ថែម, និងដើរតួនាទីជាស្ពានដ៏សំខាន់មួយរវាងសហគ្រាសធុនតូច និងមធ្យមជាមួយសហគ្រាសខ្នាតធំ ដើម្បីជំរុញឲ្យមានភាពប្រទាក់ក្រឡាគ្នា ដែលមានភាពធន់និងនិរន្តរភាព។

លោកបន្ដថា «ដើម្បីពង្រឹងប្រព័ន្ធអេកូឡូស៊ីនេះ បន្ថែមទៀត យើងត្រូវបណ្តុះផ្នត់គំនិតសហគ្រិនបន្ថែម រីឯធុរកិច្ចថ្មី និង សហគ្រាស ធុនតូចនិងមធ្យម គួរសហការគ្នាដើម្បី សម្រេចបាននូវកម្លាំងប្រមូលផ្តុំ លើកកម្ពស់ភាពច្នៃប្រឌិត ការរៀនសូត្រ និងការរីកចម្រើនរួមគ្នា»។

លោកបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិសហគ្រិនខ្មែរ បានបញ្ជាក់ពី គោលជំហរថា «សហគ្រិនខ្មែរ បាននិងកំពុងចូលរួមជាកម្លាំង ក្នុងការជំរុញកំណើនសេដ្ឋកិច្ចតាមរយៈការលើកកម្ពស់ ការបង្កើត ផលិតផល និងសេវាកម្ម ដែលមានភាពច្នៃប្រឌិត និងមានតម្រូវការទីផ្សារជាក់ស្តែង»។

ក្នុងបរិបទសេដ្ឋកិច្ចបច្ចុប្បន្ន ការជំរុញធុរកិច្ចថ្មីក្នុងការប្រើប្រាស់បច្ចេកវិទ្យា និងនវានុវត្តន៍ ជារបត់ដ៏សំខាន់មួយដើម្បីធានាបាននូវការរីកចម្រើន ភាពបត់បែន និងភាពធន់។ លើសពីនេះទៅទៀត ការផ្សារភ្ជាប់សហគ្រាសធុនតូចនិងមធ្យម ទៅនឹងបុគ្គលិកមានជំនាញជាជម្រើស អាទិភាពដើម្បីបង្កើតឱកាសការងារ និងលើកកម្ពស់ភាពប្រកួតប្រជែង។

នៅក្នុងកិច្ចប្រជុំនេះ ក្រុមប្រឹក្សាបរធនបាល បានបង្ហាញការបន្តគាំទ្រចក្ខុវិស័យរបស់សហគ្រិនខ្មែរ ក្នុងការរួមចំណែកកសាង ប្រព័ន្ធនវានុវត្តន៍, ជំរុញកំណើនធុរកិច្ច, និងលើកកម្ពស់ ភាពជាដៃគូជាមួយដៃគូអភិវឌ្ឍន៍ និងភាគីពាក់ព័ន្ធនៅក្នុង ប្រព័ន្ធអេកូឡូស៊ីសហគ្រិនភាពដើម្បីបង្កើតបរិយាកាសអំណោយផលសម្រាប់ធុរកិច្ចថ្មី និង សហគ្រាសធុនតូចនិងមធ្យម នៅកម្ពុជា៕