(ភ្នំពេញ)៖ លោកស្រី បួយ ប៊ុនថាន នាយិការងនៃសាលាអាមេរិកាំងហ្គោលឌិនហ្គេត មានប្រសាសន៍ថា សាលាអាមេរិកាំងហ្គោលឌិនហ្គេតនឹងបន្តរួមចំណែក​អភិវឌ្ឍមូលធនមនុស្សនៅកម្ពុជា ​ដើម្បីពង្រឹងបន្ថែមលើចំណេះដឹងទូទៅជាមូលដ្ឋាន ជំនាញភាសាបរទេស បច្ចេកវិទ្យា សុជីវធម៌ក្នុងការរស់នៅរបស់សិស្សានុសិស្សកម្ពុជា ចាប់ពីថ្នាក់មត្តេយ្យដល់មធ្យមសិក្សា។

នាយិការងនៃសាលាអាមេរិកាំងហ្គោលឌិនហ្គេត គូសបញ្ជាក់បែបនេះ ធ្វើឡើងក្នុងពិធីអបអរសាទរការបញ្ចប់ឆ្នាំសិក្សារបស់សិស្សានុសិស្សកម្រិតមត្តេយ្យសិក្សាកម្មវិធីសិក្សាអន្តរជាតិអាមេរិកាំង និងកម្មវិធីសិក្សាអន្តរជាតិIB ប្រចាំឆ្នាំសិក្សា២០២៤ -២០២៥ ដែលបានរៀបចំឡើងនៅសាលាអាមេរិកាំងហ្គោលឌិនហ្គេតសាខាភ្នំពេញថ្មី នាថ្ងៃទី១០ ខែសីហា ឆ្នាំ២០២៥។

ក្នុងឱកាសនោះ លោកស្រី បួយ ប៊ុនថាន មានប្រសាសន៍ថា រាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃរបស់ សម្តេចមហាបវរធិ បតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនៅ យុទ្ធសាស្ត្របញ្ចកោណក្នុងការដឹកនាំប្រទេសក្នុងគោលបំណងជំរុញការអភិវឌ្ឍន៍សេដ្ឋកិច្ចរយៈពេលវែងដើម្បីប្រែក្លាយ កម្ពុជាជាប្រទេសមានចំណូលមធ្យម កម្រិតខ្ពស់ នៅឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០ ក្នុងនោះការអភិវឌ្ឍន៍មូលធនមនុស្សនិងបច្ចេកវិទ្យាក៏ជាវិស័យអាទិ៍ភាពមួយសម្រាប់ចូលរួមចំណែក ក្នុងការអភិវឌ្ឍន៍សង្គមសេដ្ឋកិច្ចជាតិ ឱ្យកាន់តែមានការរីកចំរើនឆាប់រហ័សសម្រាប់ ប្រទេសកម្ពុជានាពេលអនាគត។ ដោយមើលឃើញពីសារៈសំខាន់នៃវិស័យនេះ សាលាអាមេរិកាំងហ្គោលឌិនហ្គេត បានខិតខំពង្រឹងគុណភាពនៃការអប់រំរបស់ខ្លួន និងស្វែងរកដៃគូរសហការថ្មីៗ ដើម្បីចូលរួមចំណែកក្នុងការអភិវឌ្ឍ មូលធនមនុស្សនៅកម្ពុជា សំដៅពង្រឹងបន្ថែមលើចំណេះដឹងទូទៅជាមូលដ្ឋាន ជំនាញភាសាបរទេស បច្ចេកវិទ្យា សុជីវធម៌ក្នុងការរស់នៅ គុណធម៌ កតញ្ញូតាធម៌ និងបណ្តុះគំនិតសិស្សានុសិស្ស ឱ្យមានចំណេះដឹង មានការគិតពិចារណា មានគំនិតច្នៃប្រឌិត មានទំនាក់ទំនងល្អ មានភាពជាអ្នកដឹកនាំ មានការស្វែងរកអ្វីៗដែលថ្មី ការបើកចិត្តគំនិត មានតុល្យភាព ចេះចូលរួមចែករំលែក ដែលនាំឱ្យកុលបុត្រកុល ធីតាយើងក្លាយជាពលរដ្ឋប្រកបដោយគតិបណ្ឌិតទៅថ្ងៃអនាគត ដែលមិនអាចខ្វះបាន។

​ទន្ទឹមគ្នានេះ​ លោកស្រីអំពាវនាវដល់មាតាបិតា អ្នកអាណាព្យាបាលសិស្សទាំងអស់ ជួយបន្តគាំទ្រដល់កិច្ចខិតខំប្រឹងប្រែងរបស់សាលាអាមរិកាំងហ្គោលឌិនហ្គេត សំដៅរួមគ្នា អភិវឌ្ឍន៍ធនធានមនុស្សឱ្យកាន់តែមានការរីកចម្រើនថែមទៀត ស្របទៅនឹងភាពរីក ចម្រើនរបស់ប្រទេសជាតិ និងពិភពលោកទាំងមូល។

លោក ម៉ៅ មីន ដែលមកអបអរសាទរកូន ក្នុងថ្ងៃបញ្ចប់ការសិក្សាកម្រិតមត្តេយ្យ បានបង្ហាញការគាំទ្រចំពោះកម្មវិធីសិក្សារបស់ សាលាអាមេរិកាំងហ្គោលឌិនហ្គេតដែលបានផ្តល់នូវគុណភាពសិក្សាដ៏មានស្តង់ដារ ក្នុងការបណ្តុះបណ្តាសិស្សានុសិស្សនៅកម្ពុជាឱ្យកាន់តែមានសមត្ថភាព​ ទាំងកម្រិតជាតិ និងអន្តរជាតិ។ ហេតុដូច្នេះហើយ ទើបលោកសម្រេចចិត្តបញ្ជូនកូនទាំង៤នាក់របស់លោក មកសិក្សានៅសាលាអាមេរិកាំងហ្គោលឌិនហ្គេត។

ចំណែកលោក ឆែ ហេង ដែលមានកូន២នាក់កំពុងសិក្សានៅសាលាអាមេរិកាំងហ្គោលឌិនហ្គេត បានលើកឡើងថា ការបញ្ជូនកូនមកសិក្សានៅសាលាអាមេរិកាំងហ្គោលឌិនហ្គេត គឺពិតមានជាមិនខកបំណងឡើយ ដោយកូនរបស់លោកមានការអភិវឌ្ឍន៍ច្រើន ទាំងប្រាជ្ញា និងស្មារតី ​ក៏ដូចជាជំនាញភាសាបរទេស និងភាសាជាតិ។

សូមជម្រាបថា សាលាអាមេរិកាំងហ្គោលឌិនហ្គេត បានបង្កើតឡើងតាំងពីឆ្នាំ១៩៩៦ និងបានវិវត្តន៍ខ្លួនជាសាលាចំណេះទូទៅនៅឆ្នាំ២០០៩ ដែលមានកម្មវិធីបង្រៀនថ្នាក់ចំណេះទូទៅភាសាខ្មែរ ភាសាអង់គ្លេស (IB និង AP) និងភាសាចិន។ ក្រៅពីការសិក្សាលើចំណេះដឹងទូទៅ សាលាក៏មានរៀបចំថ្នាក់ជំនាញបន្ថែមជាច្រើន ដូចជា ថ្នាក់រ៉ូបូតទិក តៃក្វាន់ដូរ យូហ្គារ របាំបាឡេ ហ្គីតា ព្យាណូ ក្លឹបបាល់ទាត់ បាល់បោះ ថ្នាក់បំប៉នភាសាចិន ថ្នាក់បំប៉នភាសាខ្មែរ ។ល។

រហូតមកដល់បច្ចុប្បនេះ សាលាអាមេរិកាំងហ្គោលឌិនហ្គេតបានបើកដំណើរការ សាខាចំនួន៣ គឺសាខា សាខាទួលគោក សាខាអូរបែកក្អម និងសាខាភ្នំពេញថ្មី៕