(បរទេស)៖ ក្រុមហ៊ុនបច្ចេកវិទ្យាខ្នាតយក្ស Google ដែលជាបុត្រសម្ព័ន្ធរបស់ក្រុមហ៊ុន Alphabet បានប្រកាសពីផែនការវិនិយោគបន្ថែមចំនួន ៩ ពាន់លានដុល្លារ ក្នុងរយៈពេលពីរឆ្នាំខាងមុខ ដើម្បីពង្រីកហេដ្ឋារចនាសម្ព័ន្ធ Cloud និង Artificial Intelligence (AI) នៅក្នុងរដ្ឋ Oklahoma។ នេះបើយោងតាមការចេញផ្សាយដោយ CNA នៅថ្ងៃទី១៤ ខែសីហា​ ឆ្នាំ២០២៥។

ថវិកានេះត្រូវបានគេឱ្យដឹងថា នឹងត្រូវប្រើប្រាស់ដើម្បីសាងសង់មជ្ឈមណ្ឌលទិន្នន័យថ្មីមួយនៅទីក្រុង Stillwater និងពង្រីកមជ្ឈមណ្ឌលដែលមានស្រាប់នៅទីក្រុង Pryor។ គោលដៅសំខាន់គឺ ដើម្បីពង្រឹងសមត្ថភាព AI និង Cloud របស់សហរដ្ឋអាមេរិក ព្រមទាំងបង្កើតកម្មវិធីអប់រំ និងបណ្តុះបណ្តាលកម្លាំងពលកម្មផងដែរ។

ការវិនិយោគដ៏ធំនេះ កើតឡើងចំពេលដែលក្រុមហ៊ុនបច្ចេកវិទ្យាធំៗកំពុងប្រកួតប្រជែងគ្នាយ៉ាងខ្លាំងលើវិស័យ AI។ ដោយ Google ក៏បានបង្កើនផែនការចំណាយទុនប្រចាំឆ្នាំរបស់ខ្លួនដល់ ៨៥ ពាន់លានដុល្លារ ដើម្បីជំរុញកំណើន និងកែលម្អផលិតផលរបស់ខ្លួនផងដែរ។

បន្ថែមពីលើការវិនិយោគនេះ Google ក៏បានប្តេជ្ញាផ្តល់ថវិកា ១ ពាន់លានដុល្លារ សម្រាប់ការអប់រំ និងបណ្តុះបណ្តាលលើវិស័យ AI ដល់ស្ថាប័នអប់រំនៅសហរដ្ឋអាមេរិក ដែលគំនិតផ្តួចផ្តើមនេះទទួលបានការគាំទ្រពីសាកលវិទ្យាល័យជាង ១០០ ហើយមកទល់ពេលនេះ។

គួរជម្រាបថា ការវិនិយោគលើហេដ្ឋារចនាសម្ព័ន្ធ AI នេះ ស្របទៅនឹងគោលនយោបាយរបស់លោក Donald Trump ដែលចង់ទាក់ទាញក្រុមហ៊ុននានាឱ្យត្រលប់មកវិនិយោគក្នុងស្រុកវិញ។ ក្រុមហ៊ុន Apple ក៏បានប្រកាសពីផែនការវិនិយោគ ៦០០ ពាន់លានដុល្លារ ក្នុងសហរដ្ឋអាមេរិកក្នុងរយៈពេលបួនឆ្នាំខាងមុខផងដែរ៕