(បរទេស)៖ កម្មវិធីផ្ញើសារដ៏ពេញនិយម WhatsApp បានអះអាថា ប្រទេសរុស្ស៊ីកំពុងព្យាយាមរារាំងសេវាកម្មរបស់ខ្លួន ព្រោះកម្មវិធីផ្ញើសារដែលជាកម្មសិទ្ធិរបស់ក្រុមហ៊ុន Meta មួយនេះ បានផ្តល់សិទ្ធិដល់ប្រជាជនរុស្សីក្នុងការផ្ញើសារទំនាក់ទំនងប្រកបដោយសុវត្ថិភាព។ ក្រុមហ៊ុនក៏បានសន្យាថា នឹងបន្តខិតខំបំពេញកិច្ចការងាររបស់ខ្លួនបន្តទៀត ដោយប្រើប្រាស់ប្រព័ន្ធ Encryped ក្នុងប្រទេសរុស្ស៊ី។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី១៤ ខែសីហា ឆ្នាំ២០២៤។

ការឆ្លើយតបនេះ គឺបន្ទាប់ពីរដ្ឋាភិបាលរុស្ស៊ីបានចាប់ផ្ដើមដាក់កំហិតលើការហៅទូរស័ព្ទតាម Telegram និង WhatsApp ដោយចោទថា កម្មវិធីទាំងនេះ មិនបានចែករំលែកព័ត៌មានជាមួយអាជ្ញាធររុស្សី ក្នុងករណីទាក់ទងនឹងការលួចលុយ និងភេរវកម្ម។

WhatsApp បានអះអាងក្នុងសេចក្តីថ្លែងការណ៍មួយថា «WhatsApp គឺជាកម្មវិធីផ្ញើសារទំនាក់ទំនងឯកជនដោយមានប្រព័ន្ធ end-to-end encrypted ហើយបានបដិសេធសកម្មភាពរបស់រដ្ឋាភិបាល ដែលចង់បំពានលើសិទ្ធិរបស់ប្រជាជនក្នុងការទំនាក់ទំនងប្រកបដោយសុវត្ថិភាព។ ហើយនេះជាមូលហេតុដែលរុស្ស៊ីកំពុងព្យាយាមរារាំងកម្មវិធីនេះ មិនឲ្យអ្នកប្រើជាង ១០០លាននាក់ក្នុងប្រទេសអាចប្រើបានទេ»។

WhatsApp បន្ថែមថា «យើងនឹងបន្តធ្វើអ្វីៗគ្រប់យ៉ាងតាមដែលអាចធ្វើបាន ដើម្បីឲ្យការទំនាក់ទំនងដែលមានប្រព័ន្ធ Encrypted មានសេរីភាពសម្រាប់មនុស្សគ្រប់ទីកន្លែង រួមទាំងនៅក្នុងប្រទេសរុស្ស៊ីផងដែរ»៕