(បរទេស)៖ យោងតាមរបាយការណ៍របស់សារព័ត៌មាន Bloomberg បានឱ្យដឹងថា លោក ដូណាល់ ត្រាំ កំពុងពិភាក្សាជាមួយក្រុមហ៊ុនផលិតបន្ទះឈីបយក្ស Intel អំពីលទ្ធភាពដែលរដ្ឋាភិបាលអាមេរិកអាចនឹងទិញភាគហ៊ុនមួយចំណែកនៅក្នុងក្រុមហ៊ុននេះ។ គោលបំណងនៃអន្តរាគមន៍នេះ គឺដើម្បីពង្រឹងសន្តិសុខជាតិ និងគាំទ្រឧស្សាហកម្មផលិតបន្ទះឈីបក្នុងស្រុកដែលកំពុងប្រឈមនឹងការប្រកួតប្រជែង។ នេះបើតាមការចេញផ្សាយបន្តដោយ CNA នៅថ្ងៃទី១៥ ខែសីហា ឆ្នាំ២០២៥។

ការពិភាក្សាដ៏គួរឱ្យភ្ញាក់ផ្អើលនេះបានកើតឡើងបន្ទាប់ពីលោក ត្រាំ បានជួបជាមួយនាយកប្រតិបត្តិរបស់ក្រុមហ៊ុន Intel លោក Lip-Bu Tan។ កិច្ចប្រជុំនេះបានធ្វើឡើងប៉ុន្មានថ្ងៃបន្ទាប់ពីលោក ត្រាំ បានទាមទារជាសាធារណៈឱ្យលោក Tan លាលែងពីតំណែង ដោយសារតែការវិនិយោគរបស់ក្រុមហ៊ុននៅក្នុងក្រុមហ៊ុនបច្ចេកវិទ្យាចិនមួយចំនួន។

សម្រាប់លោក ត្រាំ ជំហរច្បាស់លាស់គឺចង់ឱ្យ Intel ពង្រីកការផលិតក្នុងសហរដ្ឋអាមេរិក និងបង្កើតការងារកាន់តែច្រើន។ ទោះបីជាយ៉ាងនេះក្តី អ្នកនាំពាក្យសេតវិមានលោក Kush Desai បានថ្លែងថា៖ «ការពិភាក្សាអំពីកិច្ចព្រមព្រៀងដែលមិនទាន់ច្បាស់លាស់ គួរតែត្រូវបានចាត់ទុកថាជាការរំពឹងទុក លុះត្រាតែមានការប្រកាសជាផ្លូវការដោយរដ្ឋបាល»។ ចំណែកក្រុមហ៊ុន Intel បានបដិសេធមិនធ្វើអត្ថាធិប្បាយដោយផ្ទាល់ ប៉ុន្តែបានបញ្ជាក់ថាខ្លួនប្តេជ្ញាចិត្តគាំទ្រកិច្ចខិតខំប្រឹងប្រែងរបស់លោក ត្រាំ ដើម្បីពង្រឹងភាពជាអ្នកដឹកនាំបច្ចេកវិទ្យារបស់អាមេរិក។

ដំណឹងនេះបានធ្វើឱ្យតម្លៃភាគហ៊ុនរបស់ Intel កើនឡើងភ្លាមៗជាង ៧%។ អ្នកវិភាគទីផ្សារមួយចំនួនជឿថា កិច្ចព្រមព្រៀងនេះអាចនឹងត្រូវភ្ជាប់មកជាមួយពន្ធគយ ដើម្បីជំរុញឱ្យក្រុមហ៊ុនបច្ចេកវិទ្យាធំៗផ្សេងទៀតដូចជា Nvidia, AMD និង Apple បែរមកប្រើប្រាស់សេវាកម្មផលិតបន្ទះឈីបរបស់ Intel វិញ។

គួរបញ្ជាក់ផងដែរថា ការទិញភាគហ៊ុនដោយរដ្ឋាភិបាលអាមេរិកមិនមែនជារឿងថ្មីទេ ប៉ុន្តែជាធម្មតាកើតឡើងចំពោះក្រុមហ៊ុនដែលជួបវិបត្តាហិរញ្ញវត្ថុធ្ងន់ធ្ងរ។ ក្រុមហ៊ុន Intel ទោះបីជាបាត់បង់ភាពជាអ្នកដឹកនាំក្នុងទីផ្សារ និងកំពុងខាតបង់ក្នុងការផលិតបន្ទះឈីប AI ក៏ដោយ ក៏នៅតែមានចំណូលរឹងមាំលើសពី ៥០ ពាន់លានដុល្លារក្នុងមួយឆ្នាំ។ ដូច្នេះ នេះបានធ្វើឱ្យអ្នកវិនិយោគមួយចំនួនឆ្ងល់ថា តើក្រុមហ៊ុននេះពិតជាត្រូវការជំនួយដោយផ្ទាល់ពីរដ្ឋាភិបាលដែរឬទេ៕