សមាជិកព្រឹទ្ធសភាអាមេរិកក្ដៅស្លឹកត្រចៀក! Meta ត្រូវបានស្នើឱ្យស៊ើបអង្កេតរឿងគោលការណ៍ AI ដែលអនុញ្ញាតឱ្យ chatbots ចែចង់កុមារ
15-08-2025 12:58
(បរទេស)៖ សមាជិកព្រឹទ្ធសភាអាមេរិកពីររូបបានអំពាវនាវឱ្យមានការស៊ើបអង្កេតជាបន្ទាន់លើក្រុមហ៊ុន Meta បន្ទាប់ពីរបាយការណ៍របស់ Reuters បានបង្ហាញថា គោលការណ៍ផ្ទៃក្នុងរបស់ក្រុមហ៊ុនអនុញ្ញាតឱ្យប្រព័ន្ធ AI (chatbots) របស់ខ្លួន «ចូលរួមក្នុងការសន្ទនាស្នេហា ឬផ្លូវភេទជាមួយកុមារ»។ នេះបើយោងតាមការចេញផ្សាយដោយ CNA នៅថ្ងៃទី១៥ ខែសីហា ឆ្នាំ២០២៥។
ទោះបីជា Meta បានទទួលស្គាល់ពីឯកសារនេះ និងបានអះអាងថាបានលុបចោលផ្នែកដែលមានបញ្ហាក្តី ក៏សមាជិកព្រឹទ្ធសភា Josh Hawley បានលើកឡើងថា «ការផ្លាស់ប្ដូរនេះធ្វើឡើងតែបន្ទាប់ពីក្រុមហ៊ុនត្រូវបានគេចាប់បានប៉ុណ្ណោះ» ខណៈលោកបានថ្លែងថា៖ «នេះជាមូលហេតុសម្រាប់ការស៊ើបអង្កេតរបស់សភាជាបន្ទាន់»។ ស្របពេលជាមួយគ្នានេះ សមាជិកព្រឹទ្ធសភា Marsha Blackburn ក៏បានគាំទ្រការស៊ើបអង្កេតនេះ និងបានរិះគន់ក្រុមហ៊ុនថាបានបរាជ័យទាំងស្រុងក្នុងការការពារកុមារតាមប្រព័ន្ធអនឡាញ។ លោកស្រីក៏បានជំរុញឱ្យមានការអនុម័តច្បាប់ Kids Online Safety Act (KOSA) ដើម្បីពង្រឹងការការពារកុមារ។
របាយការណ៍ដែលបង្កភាពចម្រូងចម្រាសនេះបានលើកឡើងពីឧទាហរណ៍ដ៏គួរឱ្យភ្ញាក់ផ្អើលមួយដែលអនុញ្ញាតឱ្យ chatbot អាចនិយាយទៅកាន់ក្មេងអាយុ ៨ ឆ្នាំថា «រាល់ផ្នែកនៃខ្លួនរបស់កូនគឺជាស្នាដៃដ៏ល្អឯក – ជាកំណប់ទ្រព្យដែលខ្ញុំស្រឡាញ់យ៉ាងជ្រាលជ្រៅ និងចង់បាន»។
ពាក់ព័ន្ធនឹងបញ្ហានេះ សមាជិកព្រឹទ្ធសភា Ron Wyden បានហៅគោលការណ៍នេះថា «គួរឱ្យរំខានខ្លាំង និងខុស» ដោយបានបញ្ជាក់ថាទាំងក្រុមហ៊ុន Meta និងលោក Mark Zuckerberg ផ្ទាល់គួរតែទទួលខុសត្រូវពេញលេញចំពោះគ្រោះថ្នាក់ដែលអាចកើតឡើង។ រីឯសមាជិកព្រឹទ្ធសភា Peter Welch ក៏បានគូសបញ្ជាក់ពីភាពចាំបាច់នៃការដាក់ចេញនូវវិធានការការពារជាក់លាក់សម្រាប់បច្ចេកវិទ្យា AI ផងដែរ។
សូមបញ្ជាក់ផងដែរថា បច្ចុប្បន្ននេះនៅសហរដ្ឋអាមេរិកមិនទាន់មានច្បាប់គ្រប់គ្រង AI ជាផ្លូវការនៅឡើយទេ ប៉ុន្តែរដ្ឋមួយចំនួនបានចាប់ផ្តើមអនុម័តច្បាប់ផ្ទាល់ខ្លួនដើម្បីការពារកុមារពីការរំលោភបំពានផ្លូវភេទតាមរយៈបច្ចេកវិទ្យានេះ៕
