(ភ្នំពេញ)៖ សហព័ន្ធកីឡាបាល់ទះកម្ពុជា បានប្រកាសនឹងធ្វើការកែសម្រួលការរៀបចំពានរង្វាន់ធំៗនៅកម្ពុជា ដើម្បីឆ្លើយតបចក្ខុវិស័យនៃការអភិវឌ្ឍដ៏វែងឆ្ងាយ និងព្រឹត្តិការណ៍អន្ដរជាតិនានា នៅចុងឆ្នាំ២០២៥ ។ នេះបើតាមការលើកឡើងរបស់លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធ ក្រោយកោះប្រជុំបន្ទាន់ ជាមួយតំណាងសមាគម/ក្លិបបាល់ទះសមាជិកទាំង ៣២ នៅថ្ងៃទី១៥ ខែសីហា ឆ្នាំ២០២៥ នៅមជ្ឈមណ្ឌលជាតិហ្វឹកហ្វឺនកីឡា។

មន្ដ្រីជាន់ខ្ពស់សហព័ន្ធខាងលើ បានបញ្ជាក់ថា កិច្ចប្រជុំបន្ទាន់ ដែលលើកពីខែមិថុនា មករៀបចំនៅខែសីហានេះ គឺដើម្បីផ្សព្វផ្សាយផែនការប្រកួតកីឡាបាល់ទះឆ្នាំ២០២៥/២៦ ក៏ដូចជាការស្ទង់មតិ ចំពោះសកម្មភាពការងារឆ្នាំចាស់កន្លងមក ទៅលើការរៀបចំការប្រកួត និងកែទម្រង់មួយចំនួនរបស់សហព័ន្ធ តើមានភាពល្អប្រសើរ ឬមានភាពខ្វះខាត ក៏ដូចជាបញ្ហាប្រឈមអ្វីខ្លះ? តែជាលទ្ធផលមិនមានការងារប្រឈមណាមួយគួរឲ្យកត់សម្គាល់ឡើយ ក្រោយពីមានការផ្លាស់ប្ដូរមតិយោបល់គ្នាយ៉ាងផុសផុល។

ចំពោះការងារកែសម្រួលថ្មី ដែលសហព័ន្ធបានរៀបចំ និងប្រកាសដាក់ឲ្យដំណើរការចាប់ពីខែសីហានេះតទៅ មានដូចជា៖

១. ការត្រៀមខ្លួនរួចរាល់ ក្នុងការបញ្ជូនក្រុមបាល់ទះជម្រើសជាតិយុវជនអាយុក្រោម ១៨ឆ្នាំ(U18) ចូលរួមការប្រកួតកីឡាយុវជនអាស៊ី នៅប្រទេសបារ៉ែន នាខែតុលា និងការប្រមូលផ្ដុំក្រុមជម្រើសជាតិ ត្រៀមការប្រកួតកីឡាស៊ីហ្គេម លើកទី៣៣ នៅប្រទេសថៃ នាខែធ្នូ ឆ្នាំ២០២៥ ខាងមុខ ។ ការងារនេះ សហព័ន្ធបានត្រៀមជាយូរមកហើយ ក្នុងនោះក្រុមយុវជនថ្នាល U18 កម្ពុជា បានប្រមូលផ្ដុំជាង ១ឆ្នាំមកហើយ ដើម្បីត្រៀមបង្ហាញខ្លួនលើកដំបូង ក្នុងព្រឹត្តិការណ៍៍កីឡាយុវជនទ្វីបអាស៊ី ហើយក៏ជាក្ដីស្រម៉ៃរបស់ថ្នាក់ដឹកនាំសហព័ន្ធផងដែរ។

ចំពោះក្រុមបាល់ទះជម្រើសជាតិកម្ពុជា(ក្រុមធំ)វិញ ក៏ដូចជាគ្នា ប៉ុន្ដែដើម្បីធានានូវការត្រៀមលក្ខណៈឲ្យបានគ្រប់ជ្រុងជ្រោយ ថ្នាក់ដឹកនាំសហព័ន្ធបានសម្រេចពន្យាពេលរៀបចំព្រឹត្តិការណ៍បាល់ទះពានរង្វាន់សម្ដេចក្រឡាហោម ស ខេង ពីខែតុលា ទៅខែមករា ឆ្នាំ២០២៦ ។ ការកែសម្រួលនេះ ចៀសវាងប៉ះពាល់ដល់កីឡាករតាមបណ្ដាក្លិប ដែលកំពុងស្ថិតក្នុងជំរុំប្រមូលផ្ដុំក្រុមជម្រើសជាតិ ដើម្បីឲ្យពួកគេបានផ្ដោតជាមួយការហ្វឹកហាត់ត្រៀមការប្រកួតកីឡាស៊ីហ្គេមនាចុងឆ្នាំនេះ ក៏ដូចជាចៀសវាងនូវលទ្ធផលមិនគាប់ប្រសើរ ដូចការប្រកួត SEA V.League កាលពីថ្មីៗ។

២. ពានរង្វាន់បាល់ទះតាមភូមិភាគ ដែលបែងចែកជាមណ្ឌលៗ ក្រោមការរៀបចំលក្ខណៈ ៤នាក់ ទល់ ៤នាក់ នឹងត្រូវវិវឌ្ឍន៍ពាននេះ ទៅជាការប្រកួតលក្ខណៈ ៦នាក់ ទល់ ៦នាក់វិញ ស្របតាមសំណូមពររបស់បណ្ដាសមាគមក្លិបទូទាំងប្រទេស ហើយក៏ស្របតាមផែនការយុទ្ធសាស្ដ្ររបស់សហព័ន្ធ ដែលបានគ្រោងទុកមុនមួយជំហាន ក្នុងការគិតគូរលើយុវជនបន្ដវេន ។ ដូច្នេះបន្ថែមលើកែសម្រួលទៅជាប្រកួត ៦ស្មើ សហព័ន្ធក៏នឹងសម្រួលពានភូមិភាគនេះ ជាពានអាយុក្រោម ២០ឆ្នាំផងដែរ ដើម្បីផ្ដល់ឱកាសដល់អត្តពលិកតាមបណ្ដាលរាជធានី-ខេត្តបានចូលរួម និងបង្ហាញសមត្ថភាព។

ក្នុងនាមសហព័ន្ធលោកបានបង្ហាញសុទិដ្ឋិនិយមខ្ពស់ ចំពោះការកែសម្រួលពានភូមិភាគនេះ នឹងទទួលបានការគាំទ្រ ក៏ដូចជាការចូលរួមប្រកួតយ៉ាងច្រើនពីយុវជន U20 ដោយផ្អែកលើសន្ទុះនៃការប្រកួតកីឡាមធ្យមសិក្សានាពេលកន្លងមក គួបផ្សំទាំងកត្ដាប្រកួតប្រជែងកម្រិតខ្ពស់ មានប្រាក់រង្វាន់ច្រើនជាដើម ។ មិនតែប៉ុណ្ណោះ នេះក៏ជាឱកាសមួយសម្រាប់សហព័ន្ធសម្លឹងមើលយុវជនបន្ដវេនមកប្រមូលផ្ដុំហ្វឹកហាត់ត្រៀមការប្រកួតអន្ដរជាតិនានា ក៏ដូចជាដំណើរឆ្ពោះទៅធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩ ផងដែរ។ ប៉ុន្ដែដើម្បីធានាបាននូវការប្រកួតប្រជែងខ្ពស់ ក្នុងពានភូមិភាគ U20 នេះ ក៏នឹងអនុញ្ញាតឲ្យកីឡាករលើសអាយុ ៣នាក់ក្នុងមួយក្រុមចូលរួមផងដែរ។

៣. ការប្រកួតបាល់ទះជើងឯកតេជោលីគ ដែលជាព្រឹត្តិការណ៍ដ៏ធំជាងគេប្រចាំឆ្នាំ ហើយតែងរៀបចំរៀងរាល់ចន្លោះខែមករា-កុម្ភៈ នឹងប្ដូរទៅរៀបចំនៅចន្លោះខែឧសភា-មិថុនាវិញ ក្រោមមូលហេតុមានការសំណូមពរពីបណ្ដាក្លិបសមាជិក និងយោងតាមពេលវេលាជាក់ស្ដែង ដែលអត្តពលិកអន្ដរជាតិទំនេរពីជម្រើសជាតិ ដើម្បីបើកច្រកឲ្យក្លិបធំៗ បាននាំយកកីឡាករបរទេសមានគុណភាពខ្ពស់មកពង្រឹងក្រុម ក៏ដូចជាជំរុញឲ្យការប្រកួតតេជោលីគ កាន់តែរន្ថើន និងកាន់តែអស្ចារ្យ ។ ដូច្នេះការកែសម្រួលនេះ សហព័ន្ធនឹងពិចារណាការរៀបចំបែបនេះរៀងរាល់ឆ្នាំ ដើម្បីជំរុញឲ្យព្រឹត្តិការណ៍តេជោលីគនៅកម្ពុជាមានការអភិវឌ្ឍ និងកាន់តែរីកចម្រើនថែមទៀត។

ក្រៅពីផែនការ នៃការកែសម្រួលពានរង្វាន់ធំៗ ដែលបានធ្វើបច្ចុប្បន្នភាពដល់ក្លិបសមាជិកខាងលើ មន្ដ្រីជាន់ខ្ពស់សហព័ន្ធដដែល ក៏បានសំណូមពរដល់បណ្ដាក្លិបសមាជិកទាំងអស់ ធ្វើការសហការ និងបន្ដខិតខំធ្វើការអភិវឌ្ឍ ពិសេសគឺការបណ្ដុះបណ្ដាលធនធានកីឡាករអ្នកលើកបាល់ ដែលជាក្ដីកង្វល់មួយរបស់សហព័ន្ធ បន្ទាប់ពីកីឡាករ សួន ចាន់ណារ៉ូ បានចូលនិវត្តន៍ជាដើម។ លោកសង្ឃឹមថា អនាគតបាល់ទះកម្ពុជានឹងបន្ដនូវភាពរីកចម្រើនជានិរន្ដរ ហើយសម្បូរនូវធនធានកីឡាករល្អៗកាន់តែច្រើន សម្រាប់ធ្វើការប្រកួតប្រជែងលើឆាកអន្ដរជាតិ៕