(បរទេស)៖ ក្រុមការពារតំណែងជើងឯក Liverpool រកបាន ៣ពិន្ទុនៅថ្ងៃបើកឆាកលីគកំពូលអង់គ្លេស Premier League រដូវកាលថ្មី ២០២៥-២៦ តាមរយៈយកឈ្នះគូប្រជែង AFC Bournemouth ៤ទល់នឹង២ នៅរាត្រីឆ្លងចូលថ្ងៃសៅរ៍ ទី១៦ ខែសីហា (ម៉ោងនៅកម្ពុជា)។ នេះបើយោងតាមការចេញផ្សាយដោយ BBC។

ទន្ទឹមគ្នានោះ ក្រុមរបស់លោក Arne Slot ក៏បានបន្លាយកំណត់ត្រាលេង ១៣ប្រកួតក្នុងលីគមិនចាញ់ផងដែរ បើទោះបីជាទើបចាញ់ Newcastle United ក្នុងពានរង្វាន់បើករដូវកាលលីគ FA Community Shield 2025 សប្តាហ៍មុនក៏ដោយ។

ក្នុងប្រកួត ៩០នាទីពេញក្នុងកីឡដ្ឋាន Anfield ទាំងកីឡាករ និងអ្នកគាំទ្របានស្មឹងស្មាធ ១នាទី ដើម្បីរំលឹកដល់វិញ្ញាណក្ខន្ធ Diogo Jota និង Andre Silva ដែលបានលាចាកលោកកាលពីខែកក្ដដា ឆ្នាំ២០២៥ ដោយសារគ្រោះថ្នាក់ចរាចរណ៍នៅប្រទេសអេស្ប៉ាញ មុនពេល Liverpool ផ្តើមរកបាន ២គ្រាប់នាំមុខត្រឹមរយៈពេល ៤៩នាទី។

ទោះជាយ៉ាងណា កីឡាករ Antonio Semenyo ក៏វាយបកបាន ២គ្រាប់ម្នាក់ឯង ដើម្បីជួយក្រុមភ្ញៀវ Bournemouth តាមស្មើវិញ និងត្រូវបានអាជ្ញាកណ្តាលបង្អាក់ការប្រកួតបន្តិចដែរ ក៏ព្រោះតែមានរបាយការណ៍រើសអើងជាតិសាសន៍កើតមានឡើង។

ការប្រកួតបានបន្តឈានដល់នាទី៨៨ ខ្សែបម្រើអន្តរជាតិអ៉ីតាលី Federico Chiesa រកបានគ្រាប់នាំមុខជាថ្មី ខណៈខ្សែប្រយុទ្ធស្នូល Mohamed Salah រកបាន ១គ្រាប់ចុងម៉ោង ដើម្បីយកឈ្នះ ៤-២ តែម្តង៕