(ភ្នំពេញ)៖ លោក ថោង បញ្ញាធន ប្រធានថ្មី នៃសហព័ន្ធកីឡាជឺជីតស៊ូកម្ពុជា បានប្ដេជ្ញាបន្ដជំរុញការអភិវឌ្ឍវិស័យកីឡាជឺជីតស៊ូកម្ពុជាកាន់តែខ្លាំងក្លា ដើម្បីត្រៀមការប្រកួតថ្នាក់ជាតិ និងអន្ដរជាតិនានា ក៏ដូចជាឈានទៅដណ្ដើមមេដាយជូនជាតិមាតុភូមិកាន់តែច្រើនបន្ថែមទៀត។

ការប្ដេជ្ញាចិត្តនេះ បន្ទាប់ពីលោក បានទទួលការបោះឆ្នោតគាំទ្រពីសមាជិកគណៈកម្មាធិការប្រតិបត្តិ ក្លាយជាប្រធានសហព័ន្ធកីឡាជឺជីតស៊ូកម្ពុជា អាណត្តិទី៣ ឆ្នាំ២០២៥-២០២៩ នៅក្នុងមហាសន្និបាតបញ្ចប់អាណត្តិទី២ និងបន្ដអាណត្តិថ្មី នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) កាលពីល្ងាចថ្ងៃទី១៥ ខែសីហាកន្លងទៅ។

ក្នុងនាមជាស្ថាបនិកមួយរូប នៃការបង្កើតសហព័ន្ធកីឡាជឺជីតស៊ូនៅកម្ពុជា លោក ថោង បញ្ញាធន បានសម្ដែងក្ដីរីករាយ ដែលត្រូវបានសមាជិកគណៈកម្មាធិការប្រតិបត្តិសហព័ន្ធ បោះឆ្នោតគាំទ្ររូបលោកធ្វើជាប្រធានសហព័ន្ធ អាណត្តិថ្មី ដើម្បីបន្ដដឹកនាំ និងអភិវឌ្ឍន៍វិស័យកីឡាមួយនេះឲ្យកាន់តែរីកចម្រើន បន្ដពីការខិតខំប្រឹងប្រែងរបស់ថ្នាក់ដឹកនាំសហព័ន្ធអាណត្តិមុនៗ។

សម្រាប់អាណត្តិថ្មីនេះដែរ សហព័ន្ធមានគោលដៅជាច្រើន ដែលត្រូវបន្ដជំរុញការអភិវឌ្ឍ ពិសេសការបណ្ដុះបណ្ដាល និងពង្រឹងនូវធនធានមនុស្ស ទាំងធនធានមន្ដ្រីបច្ចេកទេស និងអត្តពលិក ហើយជំរុញការចូលរួមប្រកួតលើឆាកអន្ដរជាតិឲ្យបានច្រើន ។ មិនតែប៉ុណ្ណោះ សហព័ន្ធក៏ត្រៀមធ្វើម្ចាស់ផ្ទះការប្រកួតជើងឯកអាស៊ីអាគ្នេយ៍ ឆ្នាំ២០២៦ ព្រមទាំងគម្រោងស្វែងរកកិច្ចសហការជាមួយដៃគូអន្ដរជាតិ ដើម្បីបញ្ជូនអត្តពលិកទៅហ្វឹកហាត់ក្រៅស្រុកទៀតផង។

ប្រធានសហព័ន្ធថ្មីដដែលបន្ដថា រយៈពេល ៨ឆ្នាំកន្លងមក វិស័យកីឡាជឺជីតស៊ូកម្ពុជា ពិតជាមានការរីកចម្រើន បើគិតពីការកកើតសហព័ន្ធ កាលពីឆ្នាំ២០១៧ ដែលអត្តពលិកភាគច្រើន ផ្ដោតលើកីឡាករមានឈាមជ័រខ្មែរនៅក្រៅប្រទេស មកទល់បច្ចុប្បន្នសមាជិកក្រុមជម្រើសជាតិភាគច្រើន គឺជាកីឡាករ-កីឡាការិនីក្នុងស្រុក ។ យ៉ាងណាលោកនឹងជំរុញឲ្យវិស័យកីឡានេះ ត្រូវបានទទួលស្គាល់ និងមានការហ្វឹកហាត់កាន់តែច្រើន នៅតាមបណ្ដាខេត្ដនានា។

ជារួមលោក ថោង បញ្ញាធន បានវាយតម្លៃខ្ពស់ ចំពោះការខិតខំប្រឹងប្រែងរបស់គ្រប់ភាគីពាក់ព័ន្ធ ព្រមទាំងកីឡាករ-កីឡាការិនីគ្រប់រូប តាំងពីអាណត្តិមុន រហូតដល់បច្ចុប្បន្ន ហើយលោកប្ដេជ្ញានឹងបន្ដជំរុញការងារទាំងអស់នេះបន្ថែមទៀត ដើម្បីជំរុញសក្ដានុពលកីឡាជឺជីតស៊ូកម្ពុជាលើឆាកអន្ដរជាតិ ស្របពេលបណ្ដាប្រទេសក្នុងតំបន់ និងពិភពលោកមួយចំនួន បច្ចុប្បន្នបានស្ងើចសរសើរជាខ្លាំង ចំពោះសមត្ថភាពរបស់អត្តពលិកកម្ពុជា តាមរយៈការដណ្ដើមបានមេដាយជាច្រើននាពេលកន្លងមក។

គួរដឹងថា ក្នុងអាណត្តិទី៣ របស់សហព័ន្ធកីឡាជឺជីតស៊ូកម្ពុជា ក្រៅពីប្រធានសហព័ន្ធខាងលើ គឺមានលោក Jasper Pass, លោក ប៊ុត សុទ្ធី និងលោក វ៉ា វណ្ណៈ ជាអនុប្រធាន, លោក សំអុន បូរមី ជាអគ្គលេខាធិការ និងកញ្ញា ទិព្វ ទេពី ជាអគ្គលេខាធិការរង។ លោក ឆេង សីឡាង ជាអគ្គហេរញ្ញិក និងលោកស្រី ស៊ិន ស្រីនិច ជាអគ្គហេរញ្ញិករង ព្រមទាំងសមាជិក ៣រូបផ្សេងទៀត៕