(បរទេស)៖ សង្គ្រាមទីផ្សារដឹកជញ្ជូនរហ័សក្នុងប្រទេសចិន កំពុងតែក្ដៅគគុក ខណៈក្រុមហ៊ុនពាណិជ្ជកម្មអនឡាញយក្ស JD.com កំពុងជួបការលំបាកក្នុងការប្រជែងជាមួយក្រុមហ៊ុនឈរជើងយូរដូចជា Meituan និង Ele.me របស់ Alibaba។ ក្រុមហ៊ុន JD.com បានបោះទុនរាប់ពាន់លានដុល្លារទៅក្នុងសេវាកម្ម JD Takeaway ប៉ុន្តែសន្ទុះនៃសេវាកម្មនេះបានថយចុះគួរឱ្យបារម្ភ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៥ ខែសីហា ឆ្នាំ២០២៥។

ទិន្នន័យបានបង្ហាញថា ចំនួនអ្នកប្រើប្រាស់ប្រចាំថ្ងៃរបស់ JD.com បានធ្លាក់ចុះជាបន្តបន្ទាប់ចាប់ពីពាក់កណ្ដាលខែមិថុនា។ អ្នកវិភាគបានលើកឡើងថា JD.com ខ្វះបទពិសោធន៍ផ្នែកដឹកជញ្ជូនអាហារ បើប្រៀបធៀបទៅនឹង Meituan និង Alibaba ដែលមានជំនាញច្បាស់លាស់ក្នុងវិស័យនេះ។

ការបោះទុនដ៏ច្រើនសន្ធឹកទៅលើសេវាកម្មដឹកជញ្ជូននេះ ក៏បានធ្វើឱ្យប្រាក់ចំណេញរបស់ JD.com ធ្លាក់ចុះគួរឱ្យកត់សម្គាល់ផងដែរ។ ផ្ទុយទៅវិញ គូប្រជែងខ្លាំងទាំងពីរគឺ Meituan និង Alibaba កំពុងនាំមុខគេនៅក្នុងទីផ្សារ ដោយពួកគេកាន់កាប់ចំណែកទីផ្សារដ៏ធំនិងមានចំនួនការបញ្ជាទិញប្រចាំថ្ងៃរាប់លាន។

ទាក់ទងនឹងបញ្ហានេះ នាយកប្រតិបត្តិរបស់ JD.com បានទទួលស្គាល់ថាការប្រកួតប្រជែងបានកើនឡើងយ៉ាងខ្លាំងចាប់តាំងពីខែកក្កដាមក។ ក្រុមហ៊ុនទាំងបីបានចំណាយលុយជិត ២០០ ពាន់លានយន់ (ប្រហែល ២៧.៨៧ ពាន់លានដុល្លារ) ដើម្បីឧបត្ថម្ភធនលើការដឹកជញ្ជូន ដែលបង្កឱ្យមានសង្គ្រាមតម្លៃ និងទាក់ទាញការចាប់អារម្មណ៍ពីអាជ្ញាធរផងដែរ៕