(ភ្នំពេញ)៖ ធនាគារ ជីប ម៉ុង និងសហគ្រិនខ្មែរ បានប្រកាសជាផ្លូវការ នូវកិច្ចសហការជាយុទ្ធសាស្ត្រមួយ តាមរយៈពិធីចុះអនុស្សរណៈនៃការយោគយល់ ដែលបានប្រារព្ធឡើងយ៉ាងអធិកអធម នៅទីស្នាក់ការកណ្ដាលធនាគារ ជីប ម៉ុង នាថ្ងៃទី១៤ ខែសីហា ឆ្នាំ២០២៥។ ភាពជាដៃគូនេះត្រូវបានបង្កើតឡើង ដើម្បីផ្តល់ដំណោះស្រាយហិរញ្ញវត្ថុដ៏សមស្របដល់សហគ្រាស ជំរុញសមត្ថភាពផលិតក្នុងស្រុក និងរួមចំណែកដល់កំណើនសេដ្ឋកិច្ចជាតិ។

អនុស្សរណៈនៃការយោគយល់នេះត្រូវបានចុះហត្ថលេខាដោយអ្នកឧកញ៉ា លាង ម៉េង អគ្គនាយកធនាគារ ជីប ម៉ុង និងលោកបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិ នៃសហគ្រិនខ្មែរ ក្រោមអធិបតីភាពដ៍ខ្ពង់ខ្ពស់របស់លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ។ ពិធីនេះក៏មានការចូលរួមពីក្រុមការងារធនាគារ ជីប ម៉ុង ក្រុមការងារសហគ្រិនខ្មែរ និងម្ចាស់អាជីវកម្ម សរុបចំនួនប្រមាណ ៧៥ នាក់។

កិច្ចសហការនេះកើតចេញពីការយល់ឃើញរួមគ្នាថា នៅក្នុងបរិបទតម្រូវការកើនឡើននៃការគាំទ្រផលិតផលខ្មែរ ហើយម្ចាស់អាជីវកម្មកំពុងត្រូវការដៃគូ និងសេវាកម្មពីធនាគារដែលរឹងមាំ និងអាចទុកចិត្តបាន។ តាមរយៈកិច្ចសហការនេះ ធនាគារ ជីប ម៉ុង នឹងផ្តល់សេវាហិរញ្ញវត្ថុ ពិសេសផលិតផលកម្ចីដែលមានលក្ខខណ្ឌអនុគ្រោះ តម្លាភាព និងភាពបត់បែនខ្ពស់ ឆ្លើយតបទៅនឹងតម្រូវការជាក់ស្តែងរបស់ម្ចាស់អាជីវកម្ម។ ធនាគារ ជីប ម៉ុង បានបង្ហាញការប្តេជ្ញាចិត្តចូលរួមលើកទឹកចិត្ត និងគាំទ្រម្ចាស់អាជីវកម្មខ្មែរទាំងអស់ដែលមានបទពិសោធន៍ និងមិនទាន់មានបទពិសោន៍ប្រកបអាជីវកម្ម ឱ្យមានលទ្ធភាពកាន់តែខ្ពស់ក្នុងការប្រកបមុខរបរ ឬពង្រីកខ្លួននៅក្នុងវិស័យអាជីវកម្មខ្នាតតូច និងមធ្យមនេះ។
គោលដៅគឺមិនត្រឹមតែជួយធានាឱ្យចរន្តសេដ្ឋកិច្ចជាតិបន្តដំណើរទៅមុខប៉ុណ្ណោះទេ ប៉ុន្តែថែមទាំងធានាការផ្គត់ផ្គង់សម្រាប់តម្រូវការក្នុងសង្គមឱ្យមានភាពរលូន និងនិរន្តរភាពផងដែរ។

អ្នកឧកញ៉ា លាង ម៉េង អគ្គនាយកធនាគារ ជីប ម៉ុង បានលើកឡើងថា «គោលដៅដ៏ធំនៃកិច្ចសហការនេះ គឺធ្វើឡើងដើម្បីជួយគាំទ្រដល់ម្ចាស់អាជីវកម្មខ្មែរ អាចបង្កើនលទ្ធភាពក្នុងការពង្រីក ដើម្បីបង្កើនផលិតកម្មក្នុងស្រុក និងធ្វើឱ្យពាណិជ្ជកម្មក្នុងស្រុករបស់យើងមានភាពសកម្មកាន់តែខ្លាំងឡើង។ ក្នុងនាមជាធនាគារដែលបង្កើតឡើងដោយកូនខ្មែរ ១០០% យើងខ្ញុំយល់ច្បាស់ពីតម្រូវការជាក់ស្តែងរបស់ម្ចាស់អាជីវកម្ម។ ធនាគារ ជីប ម៉ុង មិនត្រឹមតែផ្តល់ហិរញ្ញប្បទានប៉ុណ្ណោះទេ ប៉ុន្តែយើងផ្តល់នូវដំណោះស្រាយហិរញ្ញវត្ថុប្រកបដោយភាពបត់បែនខ្ពស់ និងការប្រឹក្សាយោបល់ជំនាញ ដើម្បីធានាដល់ការរីកចម្រើនប្រកបដោយចីរភាពដល់អាជីវកម្មរបស់ពួកគាត់»។

លោកបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិ នៃសហគ្រិនខ្មែរ ក៏បានមានប្រសាសន៍ថា «កិច្ចសហការនេះសំដៅលើកកម្ពស់ ផ្សព្វផ្សាយផលិតផលហិរញ្ញវត្ថុរបស់ធនាគារ ដែលបង្កើតឱ្យមានជាទុនបង្វិលបន្ថែមនៅក្នុងវិស័យឯកជន ដែលផ្តល់ជាប្រយោជន៍ជូនសហគ្រាសធុនតូច និងមធ្យម ដើម្បីបង្កើនផលិតផលក្នុងស្រុក ស្របតាមតម្រូវការរបស់ប្រជាពលរដ្ឋនាពេលបច្ចុប្បន្ន»។

ជាមួយនឹងមូលដ្ឋានគ្រឹះដ៏រឹងមាំ និងប្រវត្តិដ៏យូរអង្វែងរបស់ក្រុមហ៊ុន ជីប ម៉ុង តាំងពីឆ្នាំ ១៩៨២ ធនាគារ ជីប ម៉ុង នឹងបន្តជាដៃគូដែលផ្តល់ទំនុកចិត្តខ្ពស់ និងគាំទ្រម្ចាស់សហគ្រាសខ្មែរគ្រប់រូបឱ្យកាន់តែរីកចម្រើន៕