(បរទេស)៖ ក្រុមហ៊ុនបច្ចេកវិទ្យាយក្ស Meta Platforms កំពុងរៀបចំរចនាសម្ព័ន្ធក្រុមការងារ AI របស់ខ្លួនឡើងវិញជាលើកទី៤ ក្នុងរយៈពេលត្រឹមតែ៦ខែប៉ុណ្ណោះ។ នេះបើយោងតាមរបាយការណ៍របស់សារព័ត៌មាន The Information ដែលត្រូវបានចុះផ្សាយបន្តដោយទីភ្នាក់ងារសារព័ត៌មាន Reuters នៅថ្ងៃទី១៦ ខែសីហា ឆ្នាំ២០២៥។

យោងតាមរបាយការណ៍ដដែល ការរៀបចំរចនាសម្ព័ន្ធថ្មីនេះនឹងបែងចែកអង្គភាព Superintelligence Labs ជា៤ក្រុម៖ «TBD Lab» ដែលជាក្រុមការងារថ្មី ក្រុមផលិតផល (ទទួលបន្ទុកលើផលិតផល AI ដូចជា Meta AI Assistant) ក្រុមហេដ្ឋារចនាសម្ព័ន្ធ និងក្រុមស្រាវជ្រាវ FAIR ដែលផ្តោតលើការស្រាវជ្រាវរយៈពេលវែង។

ការសម្រេចចិត្តនេះកើតឡើងស្របពេលដែល លោក Mark Zuckerberg កំពុងផ្តោតខ្លាំងលើការអភិវឌ្ឍ «បញ្ញាសិប្បនិម្មិតទូទៅ» (AGI) ដើម្បីបង្កើតប្រភពចំណូលថ្មី និងពង្រឹងការប្រកួតប្រជែង។ ការរៀបចំរចនាសម្ព័ន្ធនេះក៏ជាផ្នែកមួយនៃការកែលម្អការងារផងដែរ បន្ទាប់ពីមានការចាកចេញរបស់បុគ្គលិកជាន់ខ្ពស់មួយចំនួន និងការទទួលស្វាគមន៍មិនសូវល្អចំពោះម៉ូដែល AI របស់ខ្លួន។

គួរជម្រាបថា ក្នុងនាមជាក្រុមហ៊ុនដែលកំពុងប្រកួតប្រជែងខ្លាំងជាមួយក្រុមហ៊ុនបច្ចេកវិទ្យាយក្សដទៃទៀត Meta បានវិនិយោគយ៉ាងច្រើនលើការសាងសង់មជ្ឈមណ្ឌលទិន្នន័យ AI ដោយបានបង្កើនការព្យាករណ៍ការចំណាយដល់ចន្លោះពី ៦៦ ទៅ ៧២ ពាន់លានដុល្លារ។ លើសពីនេះ ក្រុមហ៊ុនក៏បានដំឡើងប្រាក់ខែខ្ពស់ដើម្បីទាក់ទាញអ្នកជំនាញ AI ដែលធ្វើឲ្យការចំណាយកើនឡើងជាលំដាប់៕