(បរទេស)៖ យោងតាមប្រភពជិតស្និទ្ធមួយបានឲ្យដឹងថា បុគ្គលិកបច្ចុប្បន្ន និងអតីតបុគ្គលិករបស់ក្រុមហ៊ុន OpenAI ដែលជាក្រុមហ៊ុនបង្កើត ChatGPT កំពុងរៀបចំលក់ភាគហ៊ុនរបស់ខ្លួនក្នុងតម្លៃជិត ៦ ពាន់លានដុល្លារ ទៅឲ្យវិនិយោគិននានា រួមមាន SoftBank Group និង Thrive Capital។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៦ ខែសីហា ឆ្នាំ២០២៥។

ការលក់ភាគហ៊ុននេះអាចធ្វើឲ្យតម្លៃក្រុមហ៊ុនកើនឡើងពី ៣០០ ពាន់លានដុល្លារ ដល់ ៥០០ ពាន់លានដុល្លារ ដែលជាសញ្ញាបញ្ជាក់ពីកំណើនយ៉ាងឆាប់រហ័សរបស់ OpenAI ទាំងប្រាក់ចំណូល និងចំនួនអ្នកប្រើប្រាស់។

គួរជម្រាបថា កំណើននេះកើតឡើងស្របពេលដែល OpenAI មានការរីកចម្រើនគួរឲ្យកត់សម្គាល់ ដោយចំណូលប្រចាំឆ្នាំបានកើនឡើងដល់ ១២ ពាន់លានដុល្លារ និងរំពឹងថាអាចឈានដល់ ២០ ពាន់លានដុល្លារ នៅចុងឆ្នាំនេះ។ បច្ចុប្បន្ន ChatGPT មានអ្នកប្រើប្រាស់សកម្មប្រចាំសប្តាហ៍ប្រហែល ៧០០ លាននាក់៕