(ភ្នំពេញ)៖ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) របស់ធនាគារជាតិនៃកម្ពុជា នាល្ងាចថ្ងៃសុក្រ ទី១៥ ខែសីហា ឆ្នាំ២០២៥ បានសម្ពោធពិព័រណ៍មិនអចិន្ត្រៃយ៍មួយ ក្រោមចំណងជើងថា «កម្ពុជា ១៩៧២-១៩៧៥»» ដោយបានរៀបចំឡើងយ៉ាងពិសេស និងដាក់ឱ្យទស្សនាដោយឥតគិតថ្លៃ។

ការតាំងពិព័រណ៍នេះ បង្ហាញកម្រងរូបថតដ៏កម្រ ដែលថតដោយលោក Colin Grafton អំឡុងពេលស្នាក់នៅប្រទេសកម្ពុជា ចាប់ពីថ្ងៃទី២៨ ខែវិច្ឆិកា ឆ្នាំ១៩៧២ ដល់ថ្ងៃទី០៧ ខែមេសា ឆ្នាំ១៩៧៥ ពោលគឺអំឡុងពេលមានសង្រ្គាមនិងចលាចល។ កម្រងរូបថតទាំងនេះបានបង្ហាញពីជីវិតប្រចាំថ្ងៃ ទិដ្ឋភាពទីក្រុង និងស្ថានភាពសង្គមកម្ពុជា មុនពេលខ្មែរក្រហមចូលក្នុងទីក្រុងភ្នំពេញ ។

នៅក្នុងពិធីសម្ពោធពិព័រណ៍មិនអចិន្ត្រៃយ៍នេះ លោក ប្លែស គីលីយ៉ង់ សហប្រធាននៃសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន បានថ្លែងអំណរគុណនិងកោតសរសើរលោក Colin Grafton និងភរិយារបស់លោក ដែលរៀបចំការតាំងពិពរណ៍ដ៏ពិសេសនេះ ព្រមទាំងមានប្រសាសន៍បន្ថែមថា ««កម្រងរូបថតដ៏កម្រទាំងនេះបានបង្ហាញទិដ្ឋភាពប្លែកពីគេក្នុងជីវិតប្រចាំថ្ងៃរបស់ប្រជាជននៅទីក្រុងភ្នំពេញ ខណៈត្រូវបានឡោមព័ទ្ធដោយកងទ័ពខ្មែរក្រហម ប៉ុន្តែក៏មានទិដ្ឋភាពប្លែកៗជាច្រើនទៀត ដូចជាការរែងត្បូងដ៍គួរឱ្យចាប់អារម្មណ៍នៅតំបន់ប៉ៃលិននាពេលនោះ។ រូបភាពទាំងនេះគឺជាសាក្សីបង្ហាញពីភាពធន់ចំពោះការលំបាកនានា ដែលប្រជាជនកម្ពុជាបានឆ្លងកាត់ម្តងហើយម្តងទៀត»»។

លោក Colin Grafton បានថ្លែងអំណរគុណដល់សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន ដែលបានសម្រួលការតាំងពិព័រណ៍ដ៏ពិសេសនេះបានដោយរលូន និងបានបញ្ជាក់ថា «ទីក្រុងភ្នំពេញក្នុងឆ្នាំ១៩៧៤ ប្រៀបបាននឹងកន្លែងមួយដែលត្រូវបានកាត់ផ្តាច់ចេញពីពិភពលោ‍ក។ រូបថតទាំងនេះ បានបង្ហាញពីភាពផ្ទុយគ្នាយ៉ាងចម្លែកនៃសម័យកាលនោះ ជាមួយនឹងភាពសាមញ្ញនៃជីវិតធម្មតា ដែលនៅតែមានពាសពេញទីក្រុងភ្នំពេញ»។

ពិព័រណ៍មិនអចិន្ត្រៃយ៍ថ្មីនេះ បើកឱ្យចូលទស្សនាជាសាធារណៈ និងឥតគិតថ្លៃ ចាប់ពីថ្ងៃទី១៦ ដល់ថ្ងៃទី៣១ ខែសីហា ឆ្នាំ២០២៥ រៀងរាល់ថ្ងៃអង្គារ ដល់ថ្ងៃអាទិត្យ ពេលម៉ោង ៩:០០ ព្រឹក ដល់ ៦:០០ ល្ងាច នៅសារមន្ទីរ ស.ស.រ (ច្រកចូលផ្លូវ ១០២)៕