(មេនឆេស្ទើ)៖ Manchester United បានបាត់បង់ ៣ពិន្ទុនៅកីឡដ្ឋាន Old Trafford របស់ខ្លួននៃថ្ងៃបើកឆាកសប្តាហ៍ទី១ ក្នុងលីគកំពូលអង់គ្លេស Premier League រដូវកាលថ្មី ពីការធ្វេសប្រហែសរបស់កីឡាករចាំទី។ នេះបើយោងតាមការចេញផ្សាយដោយ BBC។

អ្នកចាត់ការទូទៅបិសាចក្រហម លោក Ruben Amorim បានសម្រេចជ្រើសរើស Altay Bayindir ជំនួសអ្នកចាំទីដៃទី១ Andre Onana នៅពេលកីឡាករចាំទីតួកគីរូបនេះ បានបង្កកំហុសដែលធ្វើឱ្យកាំភ្លើងធំ Arsenal យកបាន ៣ពិន្ទុចេញពី Old Trafford គ្រាដែល Bayindir បានបរាជ័យក្នុងការព្យាយាមរារាំងបាល់លើកចេញពីជ្រុងរបស់ Declan Rice នៅតែនាទីទី១៣។

ទោះជាយ៉ាងណា United បានព្យាយាមរកគ្រាប់តាមស្មើដែរ ប៉ុន្តែធ្វើពុំបានសម្រេចនៅតំបន់ប្រយុទ្ធ នៅពេលកំហុសរបស់ Bayindir គឺជាកត្តាដែលត្រូវយកចិត្តទុកដាក់ ដ្បិតបរាជ័យនៅថ្ងៃបើកឆាកបែបនេះ ស្របពេលលោក Clinton Morrison អតីតខ្សែប្រយុទ្ធ Crystal Palace បានថ្លែងក្នុងកិច្ចសម្ភាសន៍ថា «Manchester United កំពុងមានបញ្ហា»។

ដោយឡែកលោក Amorim នៅតែជឿជាក់ទៅលើកីឡាករចាំទីទាំង៣ របស់លោកដដែលនារដូវកាល ២០២៥-២៦ និងត្រៀមដាក់ Onana ចូលចាប់ជំនួសវិញ សម្រាប់ប្រកួតបន្ទាប់នាចុងសប្តាហ៍នេះ ពេលធ្វើដំណើរទៅប៉ះម្ចាស់ផ្ទះ Fulham។

លោកថា «មុនការប្រកួតថ្ងៃនេះ ពួកយើងគិតថា អាចនឹងឈ្នះនៅថ្ងៃបើកឆាក Premier League ជាពិសេសទៅលើក្រុមធំដូចជា Arsenal ក៏ព្រោះតែពួកយើងជាក្រុមល្អជាង»៕