(បរទេស)៖ នាយកប្រតិបត្តិក្រុមហ៊ុន OpenAI លោក Sam Altman បានបង្ហាញថា ក្រុមហ៊ុនរបស់លោកមានចំណាប់អារម្មណ៍ចង់ទិញកម្មវិធីរុករកតាមអ៊ីនធឺណិត Google Chrome ប្រសិនបើក្រុមហ៊ុន Google ត្រូវបង្ខំឲ្យលក់វាចេញ ដោយសារករណីរំលោភច្បាប់ប្រឆាំងការកាន់កាប់ទីផ្សារ។

នៅពេលជជែកជាមួយអ្នកសារព័ត៌មាន The Verge, លោក Altman បាននិយាយថា «ប្រសិនបើ Chrome ត្រូវលក់ពិតប្រាកដមែននោះ យើងគួរតែពិចារណាពិនិត្យវា»។ ជាមួយគ្នានេះ លោក Sam Altman ក៏មានផែនការវិនិយោគរាប់ពាន់លានដុល្លារ ដើម្បីកសាងមជ្ឈមណ្ឌលទិន្នន័យ (data centers) សម្រាប់ទ្រទ្រង់ដល់សមត្ថភាព AI កម្រិតខ្ពស់។ ក្នុងនោះក៏រួមមានគម្រោងធ្វើឲ្យក្រុមហ៊ុន AI មួយនេះមានតម្លៃឡើងដល់ ៥០០ពាន់លានដុល្លារ ដែលកំពុងធ្វើការជាមួយដៃគូធំៗដូចជាក្រុមហ៊ុន Oracle និង SoftBank ផងដែរ។

ទោះបីមានបរិយាកាសនៃការវិនិយោគផ្នែកបច្ចេកវិទ្យាមានការប្រកួតប្រជែងខ្ពស់ក៏ដោយ លោក Altman បំភ្លឺថា ការចំណាយទឹកប្រាក់ក្នុងចំនួនមួយដ៏ច្រើន គឺសមហេតុផល ដើម្បីរួមចំណែកកសាងអនាគតរបស់ AI។ បច្ចុប្បន្ន លោកក៏កំពុងស្វែងរកវិធីផ្តល់ហិរញ្ញប្បទានថ្មីៗ ដើម្បីប្រឈមមុខនឹង បញ្ហាផ្នែកច្បាប់ និងការចំណាយខ្ពស់។

គួរជម្រាបថា ក្រុមហ៊ុន Google ត្រូវបានតុលាការអាមេរិកសម្រេចថា បានបំពានច្បាប់ប្រឆាំងការកាន់កាប់ទីផ្សារ ដោយគ្រប់គ្រងលើទីផ្សារស្វែងរក និងផ្សព្វផ្សាយពាណិជ្ជកម្មឌីជីថលលើសកម្រិត។ មន្រ្តីក្រសួងយុត្តិធម៌អាមេរិក (DOJ) កំពុងពិចារណាថា ការបែងចែកកម្មវិធី Chrome ចេញពី Google គឺជាជំហានចាំបាច់ ដើម្បីបង្កើតការប្រកួតប្រជែងសេរី និងស្មើភាពឡើងវិញ៕