(បរទេស)៖ ក្រុមហ៊ុនបច្ចេកវិទ្យាយក្ស Google បានយល់ព្រមបង់ប្រាក់ពិន័យចំនួន ៣៥.៨ លានដុល្លារ នៅប្រទេសអូស្ត្រាលី បន្ទាប់ពីស្ថាប័នឃ្លាំមើលអ្នកប្រើប្រាស់ (ACCC) បានរកឃើញថា ក្រុមហ៊ុននេះបានធ្វើឱ្យប៉ះពាល់ដល់ការប្រកួតប្រជែង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី១៨ ខែសីហា ឆ្នាំ២០២៥។

ACCC បានរកឃើញថា Google បានចុះកិច្ចព្រមព្រៀងជាមួយក្រុមហ៊ុនទូរគមនាគមន៍ធំៗចំនួនពីរគឺ Telstra និង Optus ដោយបង់ប្រាក់ឱ្យពួកគេដើម្បីឱ្យពួកគេដំឡើងកម្មវិធីស្វែងរក (search application) របស់ Google ជាមុននៅលើទូរស័ព្ទ Android ដោយរារាំងកម្មវិធីរបស់គូប្រជែង។

លោកស្រី Gina-Cass Gottlieb ប្រធាន ACCC បាននិយាយថា៖ «លទ្ធផលនៅថ្ងៃនេះ... នឹងផ្តល់ជម្រើសកាន់តែច្រើនដល់ប្រជាជនអូស្ត្រាលីរាប់លាននាក់ ហើយបើកឱកាសឱ្យក្រុមហ៊ុនស្វែងរកផ្សេងទៀតអាចប្រកួតប្រជែងបាន»។

គួរជម្រាបថា ក្រុមហ៊ុន Google បានទទួលស្គាល់កំហុស និងបានបញ្ឈប់កិច្ចព្រមព្រៀងបែបនេះហើយ។ អ្នកនាំពាក្យក្រុមហ៊ុននេះបានបញ្ជាក់ថា ខ្លួនបានប្តេជ្ញាផ្តល់ភាពបត់បែនដល់អ្នកផលិតទូរស័ព្ទ Android ក្នុងការដំឡើងកម្មវិធីរុករក (browsers) និងកម្មវិធីស្វែងរកផ្សេងៗទៀត ដើម្បីជួយពួកគេប្រកួតប្រជែងជាមួយក្រុមហ៊ុន Apple៕