(ភ្នំពេញ)៖ ក្រុមព្រះខ័នរាជស្វាយរៀង របស់កម្ពុជា នឹងចេញដំណើរទៅប្រកួតជើងឯកក្លិបបាល់ទាត់អាស៊ីអាគ្នយ៍ (ASEAN Club Championship Shopee Cup) ឆ្នាំ២០២៥/២៦ នៅល្ងាចថ្ងៃអង្គារនេះ ដើម្បីត្រៀមជំនួបបើកឆាកពូលB ទល់នឹងក្រុមម្ចាស់ផ្ទះ Shan United របស់មីយ៉ាន់ម៉ា នាថ្ងៃទី២១ ខែសីហាខាងមុខ។

មុនចាប់ផ្ដើមយុទ្ធនាការប្រកួតជើងឯកក្លិបប្រចាំតំបន់ខាងលើ ក្នុងនាមក្រុមការពារតំណែងជើងឯក ព្រះខ័នរាជស្វាយរៀង ធ្វើបានយ៉ាងល្អក្នុងការប្រកួតបើកឆាករដូវកាលថ្មី នៃលីគកំពូលកម្ពុជា ឆ្នាំ២០២៥/២៦ ដោយបានយកឈ្នះក្រុមខ្លាំងៗ ២ប្រកួតជាប់គ្នា ពោលគឺឈ្នះក្រុមណាហ្គាវើលដ៏ ៣-០ និងបន្ដឈ្នះក្រុមណាហ្គាវើលដ៏ ៣-០ កាលពីចុងសប្ដាហ៍កន្លងទៅ។

សម្រាប់យុទ្ធនាការប្រកួតពានរង្វាន់ ASEAN Club Championship Shopee Cup 2025/26 នេះដែរ ព្រះខ័នរាជស្វាយរៀង ស្ថិតក្នុងពូលB ជាមួយក្រុម Bangkok United (ថៃ), Johor Darul Ta’zim FC (ម៉ាឡេស៊ី), Nam Dinh (វៀតណាម), Lion City Sailors FC (សិង្ហបុរី) និងក្រុម Shan United របស់មីយ៉ាន់ម៉ា ដែលបានយកឈ្នះក្រុមឡាវ Ezra ក្នុងវគ្គជម្រុះ(Play-Off) ដោយលទ្ធផល ៣-១ កាលពីថ្មីៗ។

ក្រឡេកមកចាប់អារម្មណ៍ដៃគូបើកឆាកពូលB របស់ព្រះខ័នរាជស្វាយរៀង គឺក្រុម Shan United ដែលនឹងត្រូវជួបគ្នានាថ្ងៃសុក្រសប្ដាហ៍នេះ មិនមែនជាលើកទី១ ដែលក្រុមទាំងពីរជួបគ្នានោះទេ ដ្បិតកាលពីឆ្នាំមុន ក្រុមទាំងពីរ បានជួបគ្នាក្នុងវគ្គចែកពូលពាននេះ ដោយព្រះខ័នរាជស្វាយរៀង បានយកឈ្នះ ៤-២ មុនបន្ដយកឈ្នះ ៦-២ ក្នុងជើងទី១ នៃវគ្គជម្រុះពានរង្វាន់ AFC Challenge League 2024/25 តែបានបរាជ័យនៅទឹកដីមីយ៉ាន់ម៉ា ១-២ ក្នុងជើងទី២ វិញ។

បន្ទាប់ពីការប្រកួតនេះ ព្រះខ័នរាជស្វាយរៀង នឹងបន្ដភារកិច្ចប្រកួតក្រៅដី ដោយត្រូវជួបក្រុម Nam Dinh របស់វៀតណាម ថ្ងៃទី២៥ ខែកញ្ញា មុនក្រុមជើងឯកលីគកំពូលកម្ពុជា ត្រូវបើកទ្វារផ្ទះទទួលក្រុមភ្ញៀវវិញម្ដង ចំនួន ២ប្រកួតជាប់គ្នា ដោយត្រូវជួបក្រុមជើងឯកលីគកំពូលម៉ាឡេស៊ី Johor Darul Ta’zim FC នាថ្ងៃទី៤-ធ្នូ និងជួបក្រុមជើងឯករងលីគកំពូលថៃ Bangkok United នាថ្ងៃទី២៩ ខែមករា ឆ្នាំ២០២៦ មុនជំនួបបញ្ចប់ពូលB ជាមួយក្រុមម្ចាស់ផ្ទះ របស់សិង្ហបុរី Lion City Sailors FC នាថ្ងៃទី៥ ខែកុម្ភៈ ឆ្នាំ២០២៦ ខាងមុខ៕