(បរទេស)៖ ក្រុមហ៊ុនបច្ចេកវិទ្យាយក្សអាមេរិក Apple បានចេញកម្មវិធីមួយឈ្មោះ «Apple Security Bounty Program» ព្រមពេលជាមួយគ្នានេះ ក៏បានប្រកាសផ្តល់រង្វាន់ចាប់ពី ៥,០០០ដុល្លារ ដល់ ១,០០០,០០០ល្លារ សម្រាប់អ្នកស្រាវជ្រាវផ្នែកសន្តិសុខ (ethical hackers) ដែលមានសមត្ថភាពអាច Hack ចូលប្រព័ន្ធ Servers របស់ខ្លួនបាន និងរាយការណ៍ពីបញ្ហាសន្តិសុខក្នុងប្រព័ន្ធរបស់ Apple ដូចជា iOS, macOS, watchOS និង iCloud។

ការប្រកាសធ្វើបែបនេះ គឺបង្ហាញថា Apple កំពុងដាក់ធ្វើតេស្តប្រព័ន្ធការពារសន្តិសុខរបស់ខ្លួនឱ្យជួបនូវបទពិសោធន៍ Hack កម្រិតខ្លាំងមួយ ដើម្បីធានាពីភាពត្រឹមត្រូវ និងកាន់តែទុកចិត្តបានលើប្រព័ន្ធរបស់ខ្លួន។ ការផ្ដល់រង្វាន់ដល់ ១លានដុល្លារ គឺសម្រាប់បុគ្គលដែលអាច Hack បានដោយជោគជ័យចូលទៅក្នុងប្រព័ន្ធ Private Cloud Compute (PCC) របស់ Apple ព្រោះវាជាប្រព័ន្ធម៉ាស៊ីនមេ (server) ដ៏ខ្លាំងមួយ ដែលរចនាឡើងសម្រាប់ដំណើរការបេសកកម្ម AI កម្រិតខ្ពស់ ដែលលើសពីសមត្ថភាពឧបករណ៍ធម្មតា។

ទោះបីជាយ៉ាងណាក៏ដោយ នេះមិនមែនការ Hack ចូលបណ្តាញ Apple ដោយខុសច្បាប់ឡើយ ពោលរង្វាន់នេះមានតែនៅពេលដែលអ្នកធ្វើការស្រាវជ្រាវយ៉ាងមានជំនាញ, រាយការណ៍តាមលំនាំដំណើរការផ្លូវការរបស់ Apple និងមិនបង្កការខូចខាត ឬបំពានច្បាប់។ ខណៈបុគ្គលដែលព្យាយាមចូលប្រព័ន្ធ Apple ដោយគ្មានការអនុញ្ញាត អាចនឹងរងការចោទប្រកាន់ករណីល្មើសច្បាប់។ នេះគឺជាប្រកួតប្រជែងកម្រិតខ្ពស់បំផុត សម្រាប់អ្នកជំនាញផ្នែកសន្តិសុខសាយបឺ (cybersecurity professionals) ដែលកំពុងសំឡឹងរកបញ្ហាដើម្បីការពារ៕