(បរទេស)៖ កីឡាករវាយកូនបាល់ទោលលំដាប់លេខ១ ពិភពលោក Jannik Sinner បានបង្ខំចិត្តបោះការប្រកួតវគ្គផ្តាច់ព្រ័ត្រនៃកម្មវិធី Cincinnati Open 2025 ទល់នឹង Carlos Alcaraz ដោយសារតែកត្តាជំងឺ។ នេះបើយោងតាមការចេញផ្សាយដោយ BBC។

កីឡាករអន្តរជាតិអ៉ីតាលី Sinner ដែលក្នុងនាមជាម្ចាស់ការពារតំណែងជើងឯកផងនោះ បានសម្រេចចិត្តបោះបង់ការប្រកួតផ្តាច់ព្រ័ត្រនេះតែម្តង ក្រោយប្រកួតបាន ២៣នាទី ក្រោមកំដៅថ្ងៃខ្លាំង។

លោកបានអង្គុយជាមួយនឹងការស្អំទឹកកកនៅលើក្បាល និងបានស្នើគ្រូបង្វឹក ដើម្បីបោះបង់ការប្រកួតតែម្តង ក្រោយបរាជ័យ ២សិតផងនោះ និងបានសម្រក់ទឹកភ្នែកពេលថ្លែងទៅកាន់អ្នកគាំទ្រថា «ខ្ញុំពិតជាមានអារម្មណ៍លំបាកខ្លាំងណាស់។ ខ្ញុំពិតជាសុំទោសចំពោះការខកចិត្តនេះ។ កាលពីម្សិលមិញ ខ្ញុំមិនមានអារម្មណ៍ល្អឡើយ ក៏ប៉ុន្តែខ្ញុំនៅតែជម្នះរហូតមកដល់ពេលនេះ»។

ទោះជាយ៉ាងណា Sinner ក៏បានចូលរួមអបអរការឈ្នះពាន Cincinnatio Open របស់កីឡាករលេខ២ ពិភពលោក Alcaraz ផងដែរ ដោយរំពឹងជួបគ្នាជាថ្មីទៀតនៅព្រឹត្តិការណ៍ US Open 2025 ដែលនៅសល់ ៦ថ្ងៃទៀតចាប់ផ្តើមនៅសហរដ្ឋអាមេរិក៕