(ភ្នំពេញ)៖ ស្របពេលក្លិបព្រះខ័នរាជស្វាយរៀង ចេញយុទ្ធនាការប្រកួតជើងឯកក្លិបបាល់ទាត់អាស៊ីអាគ្នយ៍ (ASEAN Club Championship Shopee Cup) ឆ្នាំ២០២៥/២៦ ក៏មានការផ្ដោងសម្ដីដាក់គ្នា រវាងគ្រូបង្វឹកលោក Mattew Mcconkey និងអគ្គលេខាធិការក្លិបបឹងកេតលោក បែ មករា ដែលជាក្រុមត្រូវជួបគ្នា ក្នុងលីគកំពូលកម្ពុជា នាថ្ងៃអាទិត្យចុងសប្ដាហ៍នេះ ពោលគឺក្រោយជំនួបបើកឆាកពូលB រវាងព្រះខ័នរាជស្វាយរៀង និងក្រុមម្ចាស់ផ្ទះ Shan United របស់មីយ៉ាន់ម៉ា នាថ្ងៃទី២១ ខែសីហា ឆ្នាំ២០២៥។

មុនចេញពីមាតុភូមិកាលពីល្ងាចថ្ងៃច័ន្ទម្សិលមិញ លោក Mattew Mcconkey គ្រូបង្វឹកព្រះខ័នរាជស្វាយរៀង បានលើកឡើងថា ប្រកួតដំបូងទល់ក្រុម Shan United មិនមានបញ្ហា ឬក្ដីបារម្ភអ្វីទេ ដោយសារក្រុមមានពេលវេលាគ្រប់គ្រាន់ បន្ទាប់ពីការប្រកួតជាមួយអង្គរថាយហ្គឺរ កាលពីថ្ងៃសៅរ៍សប្ដាហ៍មុន ។ តែអ្វីដែលលោកបារម្ភ គឺការប្រកួតលីគកំពូលកម្ពុជា ជាមួយបឹងកេត ដ្បិតក្រោយប្រកួតជាមួយ Shan United នៅថ្ងៃព្រហស្បតិ៍ ក្រុមខ្លួនត្រូវប្រើពេលយូរ ដើម្បីត្រឡប់មកមាតុភូមិវិញ នៅថ្ងៃសុក្រ ហើយមានពេល ១ថ្ងៃ ដើម្បីត្រៀមការប្រកួតបន្ទាប់នៅថ្ងៃអាទិត្យ។

លោកថា «យើងមានពេលតែ ១ថ្ងៃ សម្រាប់ត្រៀមការប្រកួតបន្ទាប់ជាមួយបឹងកេត នៅថ្ងៃអាទិត្យ ចឹងកីឡាករមួយចំនួន ដែលលេងជាមួយ Shan United ប្រាកដណាស់គាត់នឹងមិនអាចហ្វឹកហាត់បានទេ ក្នុងកំឡុងពេល ២ថ្ងៃនោះ ព្រោះស្ថិតនៅក្នុងពេលដែលយើង Recovery ។ យើងដឹងស្រាប់ហើយថា យើងជាក្លិបតែមួយកត់តំណាងពីប្រទេសកម្ពុជា ចូលរួមលេង ASEAN Club Championship Shopee Cup នេះ ។ អ៊ីចឹងគួរតែលីគកំពូល យោគយល់ យើអាចថ្ងៃនៅច័ន្ទ(ថ្ងៃទី២៥-សីហា) គឺល្អសម្រាប់យើង ព្រោះបន្ទាប់ពីហ្នឹងមក គឺ FIFA Day»។

គ្រូបង្វឹកសញ្ជាតិអៀរឡង់ដដែលបន្ដថា «ហេតុផលមួយទៀត ខ្ញុំយល់ថា ពេលខ្លះដូចនៅអឺរ៉ុប យើងប្រកួត ៣ថ្ងៃបន្ទាប់ បានន័យថា យើងលេងថ្ងៃព្រហស្បតិ៍ ហើយលេងថ្ងៃអាទិត្យ ព្រោះដោយសារតែនៅអឺរ៉ុប គេបានរៀបចំកម្មវិធីប្រកួតតាំងពី ១ឆ្នាំទុកមក ព្រោះគេមានការប្រកួតច្រើន តែនៅកម្ពុជា គឺមានតែក្លិបយើងតែមួយគត់ដែលលេងរបៀបនេះ ចឹងយើងគិតថា យើងគួរតែអាចធ្វើវាបាន»។

បន្ទាប់ពីលោក Mattew Mcconkey បានស្នើឲ្យ CPL ពិចារណាលើកការប្រកួតនេះ គេឃើញលោក បែ មករា ក៏បានបង្ហោះសារមួយលើបណ្ដាញសង្គមរបស់ខ្លួនថា «កាលវិភាគបានរៀបទុករួចហើយ ច្បាប់លក្ខន្តិកៈបានចេញរួចហើយ ទោះយ៉ាងណាជាការយោគយល់ បឹងកេតយល់ព្រមលើកពីថ្ងៃសៅរ៏ មកថ្ងៃអាទិត្យហើយ ។ សាកល្បងយល់ពីអារម្មណ៍ភ្នំពេញក្រោនផង និយាយអីខ្លះពេលគេសុំលើក ពេលប្រកួតតំណាងជាតិដូចគ្នា អ្នកដឹងបានដឹង កុំធ្វើអឺរ៉ុបកាត់ចិន ខ្ញុំអត់ចង់និយាយទេ ៤៨ម៉ោង ឬ ៧២ម៉ោង(48hours or 72hours)? រៀនមើលគេផង កុំយកបុងមុខហ្វេន រៀនទទួលខុសត្រូវ សង្ស័យលោកគ្រូអត់បានចូលប្រជុំ»។

តាមរយៈសំណួររបស់អគ្គលេខាធិការក្លិបបឹងកេតនេះ បានបញ្ជាក់ថា ក្លិបបានសម្រេចលើកពេលម្ដងរួចមកហើយ ពោលគឺលើកការប្រកួតពីថ្ងៃសៅរ៍ មកថ្ងៃអាទិត្យ ដើម្បីសម្រួលដល់ព្រះខ័នរាជស្វាយរៀង ដែលត្រូវចេញទៅប្រកួតពានរង្វាន់អន្ដរជាតិ តែលោក Mattew Mcconkey ចង់បានការលើកទៅប្រកួតថ្ងៃបន្ទាប់ទៀត ក្រោមហេតុផលដូចខាងលើ ។

យ៉ាងណាក្រោយពីមានការផ្លោតសម្ដីដាក់គ្នា ដែលបង្កឲ្យមានការចាប់អារម្មណ៍ពីសំណាក់អ្នកគាំទ្របែបនេះ លោក ឌី វិជ្ជា ប្រធានក្លិបព្រះខ័នរាជស្វាយរៀង បានបង្ហោះសំណេរខ្លីមួយ ដោយបញ្ជាក់ពីការរក្សាការប្រកួតធម្មតា ដោយលោកបានសរសេរថា «ព្រះខ័នរាជស្វាយរៀង នឹងប្រកួតជាមួយបឹងកេត នៅថ្ងៃអាទិត្យ ទី២៤ ខែសីហា ឆ្នាំ២០២៥ នេះ» ។ ជាមួយគ្នា គេក៏ឃើញលោក បែ មករា បានចែករំលែកសំណេររបស់ប្រធានក្លិបការពារតំណែងជើងឯកលីគកំពូលកម្ពុជានេះផងដែរ។

ក្រឡេកមកចាប់អារម្មណ៍ យុទ្ធនាការប្រកួតពានរង្វាន់ ASEAN Club Championship Shopee Cup 2025/26 វិញ ព្រះខ័នរាជស្វាយរៀង ស្ថិតក្នុងពូលB ជាមួយក្រុម Bangkok United (ថៃ), Johor Darul Ta’zim FC (ម៉ាឡេស៊ី), Nam Dinh (វៀតណាម), Lion City Sailors FC (សិង្ហបុរី) និងក្រុម Shan United របស់មីយ៉ាន់ម៉ា ដែលបានយកឈ្នះក្រុមឡាវ Ezra ក្នុងវគ្គជម្រុះ(Play-Off) ដោយលទ្ធផល ៣-១ កាលពីថ្មីៗ។

ចំពោះកម្មវិធីប្រកួត បន្ទាប់ពីជួបក្រុម Shan United នៅថ្ងៃព្រហស្បតិ៍សប្ដាហ៍នេះ ព្រះខ័នរាជស្វាយរៀង នឹងបន្ដភារកិច្ចប្រកួតក្រៅដី ដោយត្រូវជួបក្រុម Nam Dinh របស់វៀតណាម ថ្ងៃទី២៥ ខែកញ្ញា មុនបើកទ្វារផ្ទះទទួលក្រុមភ្ញៀវ ដែលជាក្លិបធំៗក្នុងពូល ២ប្រកួតជាប់គ្នា ដោយត្រូវជួបក្រុមជើងឯកលីគកំពូលម៉ាឡេស៊ី Johor Darul Ta’zim FC នាថ្ងៃទី៤-ធ្នូ និងជួបក្រុមជើងឯករងលីគកំពូលថៃ Bangkok United នាថ្ងៃទី២៩ ខែមករា ឆ្នាំ២០២៦ មុនជំនួបបញ្ចប់ពូលB ជាមួយក្រុមម្ចាស់ផ្ទះ របស់សិង្ហបុរី Lion City Sailors FC នាថ្ងៃទី៥ ខែកុម្ភៈ ឆ្នាំ២០២៦ ខាងមុខ៕