(ភ្នំពេញ)៖ បន្ទាប់ពីបាត់មុខក្នុងវិស័យភាពយន្ត អស់រយៈពេលប្រមាណជាង ៥ឆ្នាំ រហូតមកដល់ពេលនេះផលិតកម្ម មហាហង្ស បានសម្រេចចិត្តបញ្ចេញនូវស្នាដៃថ្មីរបស់ខ្លួន ដាក់បញ្ចាំងតាមរោងភាពយន្តទំនើបនានា ក្នុងទីក្រុងភ្នំពេញ មានចំណងជើងថា «ផ្ទះអាឃាត» ដែលជាភាពយន្តខ្នាតធំពោរពេញទៅដោយការអប់រំ លាយឡំនឹងភាពរន្ធត់ ភ័យខ្លាច តក់ស្លុត តែបង្កប់នូវអត្ថន័យទាក់ទាញ ហើយបានធ្វើពិធីបើកសម្ពោធជាផ្លូវការ នាល្ងាចថ្ងៃទី១៨ ខែសីហា ឆ្នាំ២០២៥នេះ នៅរោងភាពយន្ត Prime Cineplex ដោយមានការអញ្ជើញចូលរួមពីសំណាក់ផលិតករ និងតារាសម្ដែងល្បីៗជាច្រើននាក់។

ចាងហ្វាងផលិតកម្មមហាហង្ស លោក អ៉ិន សុភិន បានថ្លែងប្រាប់ឲ្យដឹងថា ការវិលត្រឡប់មកក្នុងវិស័យភាពយន្តឡើងវិញនេះ លោកពិតជាមានក្ដីរំភើប និងក្ដីរំពឹងខ្ពស់ចំពោះស្នាដៃរបស់ខ្លួន ដែលបានកប់ទុកជាយូរឆ្នាំមកហើយ ខណៈការវិលត្រឡប់របស់ផលិតកម្មមហាហង្សលើកនេះ គឺលោកបាននាំយកនូវអ្វីដែលថ្មី អ្វីដែលប្លែក ដែលលោកជាផលិតករផ្ទាល់ រួមទាំងអ្នកនិពន្ធ និងក្រុមការងារ បានព្យាយាមធ្វើអស់ពីសមត្ថភាព ដើម្បីបង្ហាញឱ្យទស្សនិកជនបានទស្សនានូវស្នាដៃកូនខ្មែរ ក៏ដូចជាភាពយន្តខ្មែរ ស្របពេលដែលវិស័យកុនកំពុងរីកចម្រើនទៅមុខ។

ចាងហ្វាងផលិតកម្មមហាហង្សបានគូសរំលេចថា ស្របពេលជាមួយរាជរដ្ឋាភិបាល បានបិទមិនឲ្យចាក់បញ្ចាំងភាពយន្តរបស់ប្រទេសជិតខាង នៅតាមបណ្ដារោងភាពយន្ត និងស្ថានីយទូរទស្សន៍ ក្នុងនាមលោកជាផលិតករ លោកពិតជាអរគុណ ​និងរីករាយជាខ្លាំង ព្រោះជាឱកាសដែលបងប្អូនផលិតកររបស់ខ្មែរយើង ផលិតភាពយន្តប្រកបដោយគុណភាព មានលក្ខណៈស្ដង់ដា ដើម្បីដាក់បញ្ចាំងតាមរោងកុន ឲ្យពេញតាមតម្រូវការរបស់ទស្សនិកជន។ ជាមួយគ្នានេះលោកក៏ទទូចដល់មហាជន ជួយគាំទ្រភាពយន្តខ្មែរឲ្យបានច្រើន និងខ្លាំងក្លាជាងមុន ដែលជាកម្លាំងចិត្តដល់ផលិតកររបស់យើង ក្នុងការប្ដេជ្ញាចិត្តពុះពាររាល់ឧបសគ្គ ងើបឡើងមកផលិតភាពយន្តខ្មែរឲ្យកាន់តែផុសផុលឡើង និងស្រុះដៃគ្នា។

លោក អ៉ិន សុភិន បានថ្លែងបន្តថា សម្រាប់រឿង «ផ្ទះអាឃាត» លោកបានសម្រិតសម្រាំងថតបញ្ចប់យូរណាស់មកហើយ ប៉ុន្តែដោយសារលោកមមាញឹកនៅក្នុងវិស័យបវរកញ្ញា ទើបលោករក្សាទុករឿងនេះ ដើម្បីធ្វើឱ្យកាន់តែមានគុណភាព និងសាច់រឿង ប្លង់ និងតួសម្ដែង។ ចំពោះសាច់រឿងគឺពោរពេញទៅដោយការអប់រំ លាយឡំនឹងភាពរន្ធត់ តែបង្កប់នូវអត្ថន័យទាក់ទាញដែលទស្សនិកជន គួរតែទៅទស្សនាដើម្បីទទួលបាននូវរសជាតិថ្មី មិនជាន់នឹងភាពយន្តដទៃនោះឡើយ។ ក្រៅពីចាក់បញ្ចាំងនៅក្នុងស្រុក លោកក៏ត្រៀមនាំចេញទៅក្រៅប្រទេសនាកំឡុងខែវិច្ឆិការខាងមុខនេះ ស្របពេលដែលលោកក៏បានចុះកិច្ចសន្យា ជាមួយនឹងរោងកុនក្នុងប្រទេសអាស៊ានចំនួន២ប្រទេស រួចមកហើយ។

ការវិលត្រឡប់មកជាថ្មីម្ដងទៀត ក្រោយផ្អាកផលិតភាពយន្ត ដើម្បីចាក់បញ្ចាំនៅក្នុងរោងកុន ផលិតកម្មមហាហង្សបានធ្វើពិធីសម្ពោធភាពយន្តរឿង «ផ្ទះអាឃាត» ជាផ្លូវការ ដែលជាការបើកទំព័រជាថ្មីម្ដងទៀត ក្នុងការប្រឡូកក្នុងវិស័យកុនរបស់ផលិតករលោក អ៉ិន សុភិន បន្ទាប់ពីដកឃ្លាអស់រយៈពេលជាង៥ឆ្នាំ នៃការដឹកនាំកម្មវិធីប្រកួតប្រជែងសម្រស់យ៉ាងជោគជ័យ ក្នុងរយៈពេលកន្លងទៅនេះ។ លោករំពឹងថា ការវិលត្រឡប់របស់ផលិតកម្មមហាហង្ស នឹងទទួលបាននូវការគាំទ្រពីសំណាក់ទស្សនិកជនក្នុងស្រុក ហើយក៏សូមសំណូមពរឱ្យកូនខ្មែរ ងាកមកគាំទ្រនូវស្នាដៃរបស់ប្រទេសយើងវិញ ខណៈប្រទេសជាតិក៏កំពុងពហិការ ក្នុងការចាក់បញ្ចាំងរឿងរបស់ប្រទេសថៃ ដើម្បីជាចលករជួយជម្រុញឱ្យវិស័យកុនខ្មែរ កាន់តែឈានឡើងថែមមួយកម្រិតទៀត។

ភាពយន្តខ្នាតធំរឿង «ផ្ទះអាឃាត» នឹងមានចាក់បញ្ចាំងនៅក្នុងរោងភាពយន្ត Legend និង Prime Cineplex ចាប់ពីថ្ងៃទី២១ សីហា ឆ្នាំ២០២៥នេះតទៅ៕