(ភ្នំពេញ)៖ អ្នកលើកបាល់(Setter) ឬអ្នកប៉ះសេឆ្នើមរបស់កម្ពុជា សួន ចាន់ណារ៉ូ បានត្រឡប់ចូលជំរំហ្វឹកហាត់ក្រុមជម្រើសជាតិកម្ពុជាវិញហើយ ក្រោយប្រកាសចូលនិវត្តន៍អស់រយៈពេលជិត ១ឆ្នាំ ។ នេះបើតាមការបញ្ជាក់របស់លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា។

មន្ដ្រីសហព័ន្ធរូបនេះ បានបញ្ជាក់ថា ដូចលោកបានប្រកាសជំហរ ក្នុងនាមសហព័ន្ធ កំឡុងពេល សួន ចាន់ណារ៉ូ បានប្រកាសចូលនិវត្តន៍ពីក្រុមជម្រើសជាតិកម្ពុជា កាលពីខែតុលា ឆ្នាំ២០២៤ ថា សហព័ន្ធមិនដែលបិទឱកាសកីឡាករណាឡើយ រួមទាំង ណារ៉ា ផ្ទាល់ សំខាន់តែកីឡាករមានបេះដូង និងឆន្ទៈ ចង់ជួយជាតិ ចង់បម្រើជាតិ សហព័ន្ធនៅតែបើកជំហរជានិច្ច។

ដូច្នេះក្រោយបញ្ចប់ការប្រកួតជើងឯកអាស៊ីអាគ្នេយ៍ SEA V.League 2025 កាលពីថ្មីៗ ស្របពេលមានបញ្ហាអ្នកលើកបាល់វ័យក្មេងធ្វើមិនសូវបានល្អផងនោះ សហព័ន្ធក៏បានជួបជាពិភាក្សាជាមួយ សួន ចាន់ណារ៉ូ ហើយបានឈានដល់កិច្ចសន្យាមួយ ក្នុងការកោះអញ្ជើញរូបគេត្រឡប់ចូលជំរំហ្វឹកហាត់ក្រុមជម្រើសជាតិវិញ នាពេលថ្មីៗ ។ តែយ៉ាងណាកៅអីជម្រើសជាតិ ក្នុងតំណែងអ្នកប៉ះសេនេះ ត្រូវរង់ចាំមើលការវាយតម្លៃ និងការសម្រេចចុងក្រោយពីសំណាក់ក្រុមការងារគ្រូបង្វឹកជម្រើសជាតិសិន។

លោក អាំង សិរីពិសិដ្ឋ បន្ថែមថា «ខ្ញុំសូមបញ្ជាក់ហើយបញ្ជាក់ទៀត សួន ចាន់ណារ៉ូ ត្រូវបានកោះអញ្ជើញមកហ្វឹកហាត់ជាមួយក្រុមជម្រើសជាតិ មិនទាន់ក្លាយជាកីឡាករជម្រើសជាតិទេ ហើយកីឡាករទាំងអស់ជាង ៣០នាក់ នៅក្នុងជំរំជម្រើសជាតិ ក៏មិនទាន់ក្លាយជាកីឡាករជម្រើសជាតិដែរ លើកលែងតែការចេញបញ្ជីឈ្មោះផ្លូវការចុងក្រោយ នោះបានជាកីឡាករជម្រើសជាតិតំណាងឲ្យជាតិយើងពិតប្រាកដ។ អ៊ីចឹងឱកាសមានគ្រប់ៗគ្នានៅឡើយ ។ បើអ្នកណាមានការប្រកួតប្រជែង និងមានគុណផលខ្ពស់ អ្នកនោះហើយ ដែលក្លាយជាកីឡាករតំណាងជាតិចូលរួមប្រកួតក្នុងព្រឹត្តិការណ៍អន្ដរជាតិធំៗ»។

គួរដឹងថា សួន ចាន់ណារ៉ូ បានប្រឡូកអាជីពបាល់ទះ តាំងពីឆ្នាំ២០១៣ ។ រយៈពេលជាង ១០ឆ្នាំមកនេះ គេបានចូលរួមការប្រកួតថ្នាក់ជាតិ និងអន្ដរជាតិជាច្រើន រហូតត្រូវបានទទួលស្គាល់សមត្ថភាព ទាំងក្នុង និងក្រៅប្រទេស ។ ក្នុងចំណោមស្នាដៃជាច្រើន អ្វីដែលធ្វើឲ្យអ្នកគាំទ្របាល់ទះកម្ពុជា ចងចាំមិនភ្លេច គឺការរួមចំណែកធ្វើឲ្យក្រុមបាល់ទះជម្រើសជាតិកម្ពុជា ក្លាយជាបន្លាក្នុងភ្នែករបស់បណ្ដាក្រុមក្នុងតំបន់ បន្ទាប់ពីបើកទំព័របប្រវត្តិសាស្ដ្រឈ្នះមេដាយសំរឹទ្ធលើកដំបូង ក្នុងស៊ីហ្គេម លើកទី៣១ នៅវៀតណាម ហើយបន្ដដណ្ដើមបានមេដាយប្រាក់ស៊ីហ្គេម ឆ្នាំ២០២៣ នៅកម្ពុជា ក៏ដូចបានចូលប្រកួតកីឡាអាស៊ី លើកដំបូង ក្រោយខកខានជាង ៥០ឆ្នាំ និងការជួយឲ្យកម្ពុជា បានកៅអីប្រកួតជើងឯក SEA V-League 2025 ជាលើកដំបូងជាដើម។

បន្ទាប់ពីត្រឡប់ចូលជំរំហ្វឹកហាត់ក្រុមជម្រើសជាតិវិញ កាលពីចុងសប្ដាហ៍កន្លងទៅ សួន ចាន់ណារ៉ូ ក៏បានបង្ហាញខ្លួនជាមួយទ្រនំចាស់របស់ខ្លួន គឺក្រុមបាល់ទះវិសាខា ដែលសម្បូរដោយកីឡាករជម្រើសជាតិ ក្នុងការប្រកួតមិត្តភាពកម្ដៅសាច់ដុំ ជាមួយក្រុមក្រសួងមហាផ្ទៃ ហើយក៏បានរួមចំណែកជួយក្រុមទទួលបានជ័យជម្នះ ៣-០ សិតផងដែរ៕