(បរទេស)៖ នាយកទីភ្នាក់ងារស៊ើបការណ៍សម្ងាត់ជាតិរបស់សហរដ្ឋអាមេរិក លោកស្រី Tulsi Gabbard បានបញ្ជាក់ថា ចក្រភពអង់គ្លេសបានយល់ព្រមដកចេញបទបញ្ជាដែលទាមទារឲ្យក្រុមហ៊ុន Apple បង្កើត «backdoor» ឬច្រកចូលសម្ងាត់ ដើម្បីអាចឲ្យរដ្ឋាភិបាលចូលទៅកាន់ទិន្នន័យផ្ទាល់ខ្លួនរបស់ពលរដ្ឋអាមេរិក ដែលបានការពារដោយប្រព័ន្ធអ៊ិនគ្រីប (encrypted data)។ នេះបើយោងតាមការចុះផ្សាយរបស់ CNA នៅថ្ងៃទី ១៩ ខែសីហា ឆ្នាំ ២០២៥។

កិច្ចព្រមព្រៀងនេះបានកើតឡើង បន្ទាប់ពីលោកស្រី Gabbard រួមជាមួយប្រធានាធិបតី Donald Trump និងអនុប្រធានាធិបតី JD Vance បានខិតខំចរចាជាមួយភាគីអង់គ្លេសអស់រយៈពេលជាច្រើនខែ។ សេចក្តីប្រកាសនេះត្រូវបានធ្វើឡើងនៅពេលដែលនាយករដ្ឋមន្ត្រីអង់គ្លេស លោក Keir Starmer កំពុងបំពេញទស្សនកិច្ចនៅទីក្រុងវ៉ាស៊ីនតោន ដើម្បីជួបជាមួយលោក Trump និងពិភាក្សាអំពីសង្គ្រាមនៅអ៊ុយក្រែន។

កាលពីពេលកន្លងទៅ ក្រុមអ្នកបង្កើតច្បាប់អាមេរិកបានសម្តែងក្តីបារម្ភយ៉ាងខ្លាំងថា ការទាមទារឲ្យមាន backdoor បែបនេះអាចបង្កជាហានិភ័យដល់សន្តិសុខព័ត៌មាន និងអាចត្រូវពួកឧក្រិដ្ឋជនតាមអ៊ីនធឺណិត ឬរដ្ឋាភិបាលផ្តាច់ការទាញយកផលប្រយោជន៍បាន។

គួរបញ្ជាក់ផងដែរថា ក្រុមហ៊ុន Apple តែងតែបដិសេធដាច់ខាតចំពោះការបង្កើតច្រកចូលសម្ងាត់បែបនេះនៅក្នុងប្រព័ន្ធសុវត្ថិភាពរបស់ខ្លួន។ ក្រុមហ៊ុននេះធ្លាប់បានប្រឈមមុខនឹងសម្ពាធស្រដៀងគ្នានេះតាំងពីឆ្នាំ ២០១៦ នៅពេលដែលរដ្ឋាភិបាលអាមេរិកបានព្យាយាមបង្ខំឲ្យក្រុមហ៊ុនជួយដោះសោទូរស័ព្ទ iPhone របស់ជនសង្ស័យម្នាក់ផងដែរ៕