(បរទេស)៖ ក្រុមកញ្រ្ជោង Wolverhamton Wanderer បានចុះកិច្ចសន្យាទិញខ្សែការពារ Jackson Tchatchoua ពីក្លិប Hellas Verona ក្នុងតម្លៃខ្លួន ១២.៥លានអឺរ៉ូ ដែលជាកីឡាករមានល្បឿនដាច់គេប្រចាំលីគកំពូល Serie A របស់ប្រទេសអ៉ីតាលី។ នេះបើយោងតាមការចេញផ្សាយដោយ BBC។

កីឡាករអន្តរជាតិកាមេរូន ដែលអាចលេងបានទាំងបម្រើស្លាប និងការពារស្តាំផងនោះ ត្រូវបានគេបោះឆ្នោតជាប់ជាកីឡាករកំពូលល្បឿននៅ Serie A រដូវកាល ២០២៤-២៥ ដោយជាមធ្យមមានល្បឿន ៣៤.៨៨Km/h ក៏ប៉ុន្តែបើតាមក្រុមអ្នកជំនាញ Wolves បានធ្វើកត់ត្រាទុកចំពោះកីឡាករវ័យ ២៣ឆ្នាំរូបនេះមានល្បឿនដល់ទៅ ៣៦.៣Km/h ឯណោះ។

ខ្សែការពារដែលបានកើតនៅប្រទេសប៊ែលហ្សិក Tchatchoua ទើបត្រូវបានកោះហៅចំនួន ១០លើកផងដែរ ដើម្បីលេងឱ្យជម្រើសជាតិកាមេរូន បានផ្តើមអាជីពបាល់ទាត់ក្នុងក្លិប Charleroi នៅដែនដីអឺរ៉ុបនេះតែម្តង មុនពេលចំណាយពេល ១ឆ្នាំលេងខ្ចីជើងនៅក្លិប Verona ដែលត្រូវបានទិញដាច់កាលឆ្នាំ២០២៤។

រដូវកាលមុន Tchatchoua ក៏រកបានគ្រាប់បំប៉ោងសំណាញ់ទី ២គ្រាប់ និងពាក់ព័ន្ធពីការបញ្ជូនបាល់ ៣លើកទៀតផង ក្នុងចំណោម ៣៧ប្រកួតជាមួយ Verona មុនពេលចាកចេញ និងក្លាយជាសមាជិកថ្មីទី៥ របស់ Wolves ក្នុងទីផ្សារដោះដូរកីឡាកររដូវក្តៅនេះ៕