(ភ្នំពេញ)៖ ដោយទទទួលបានការអនុម័តផ្លូវការពីសហព័ន្ធកីឡាបាល់ទាត់ទ្វីបអាស៊ី(AFC) ក្លិបព្រះខ័នរាជស្វាយរៀង របស់កម្ពុជា ព្រមទាំងក្លិប Dewa United របស់ឥណ្ឌូនេស៊ី នឹងត្រូវធ្វើម្ចាស់ផ្ទះវគ្គចែកពូល(Group Stage) ប្រចាំតំបន់អាស៊ីខាងកើត នៃព្រឹត្តិការណ៍បាល់ទាត់ជើងឯកក្លិបលំដាប់ទី៣ ទ្វីបអាស៊ី AFC Challenge League 2025/26ឆ្នាំ២០២៥/២៦។

យោងតាមក្រុមជើងឯករងឆ្នាំចាស់ខាងលើ បានជូនដំណឹងកាលពីល្ងាចថ្ងៃអង្គារកន្លងទៅថា «ក្លិបបាល់ទាត់ព្រះខ័នរាជស្វាយរៀង ត្រូវបានអនុម័តឲ្យធ្វើជាម្ចាស់ផ្ទះនៃព្រឹត្តិការណ៍ AFC Challenge League រដូវកាល ២០២៥/២៦ ក្នុងវគ្គជម្រុះ Group Stage (តំបន់ខាងកើត) ចាប់ពីថ្ងៃទី២៦ ខែតុលា ដល់ថ្ងៃទី១ ខែវិច្ឆកា ឆ្នាំ២០២៥។ នេះគឺជាជំពូកថ្មីនៃបាល់ទាត់កម្ពុជាលើឆាកអន្តរជាតិ»។

ចំពោះវគ្គចែកពូលប្រចាំតំបន់អាស៊ីខាងកើតខាងលើ មានបេក្ខភាព ៨ក្រុមចូលរួម និងត្រូវបែងចែកជា ២ពូល(ពូលD និងពូលE) ក្នុងនោះកម្ពុជាមាន ២ក្រុម គឺក្រុមជើងឯកលីគកំពូលកម្ពុជា ព្រះខ័នរាជស្វាយរៀង និងក្រុមភ្នំពេញក្រោន ដែលទើបយកឈ្នះក្រុម Kasuka FC របស់ប្រ៊ុយណេ ក្នុងវគ្គជម្រុះបឋម កាលពីថ្មីៗ។ ប៉ុន្ដែវគ្គចែកពូលនេះ ក្រុមតំណាងកម្ពុជាទាំងពីរ មិនអាចស្ថិតក្នុងពូលជាមួយគ្នាបានឡើយ មានន័យថា ភ្នំពេញក្រោន នឹងត្រូវធ្វើដំណើរទៅប្រកួតនៅប្រទេសឥណ្ឌូនេស៊ី ដែលមានក្លិប Dewa United ជាម្ចាស់ផ្ទះ។

សម្រាប់ការចាប់ឆ្នោតបែងចែកពូល នឹងត្រូវឡើងនាថ្ងៃទី២៨ ខែសីហាខាងមុខ ហើយព្រះខ័នរាជស្វាយរៀង នឹងធ្វើម្ចាស់ផ្ទះពូលមួយ ដែលខ្លួនចាប់ឆ្នោតស្ថិតនៅពូលជាមួយគូប្រជែង ៣ក្រុមផ្សេងទៀត ។ រីឯបេក្ខភាព ៦ក្រុមផ្សេងទៀត ដែលត្រូវចាប់ឆ្នោតប្រកួតវគ្គចែកពូល ក្រៅពីក្រុមតំណាងកម្ពុជាទាំង ២ គឺមានក្រុម SP Falcons (ម៉ុងហ្គោលី), ក្រុម Tainan City FC (ឆាយនីសតៃប៉ិ), ក្រុម Manila Digger (ហ្វីលីពីន), ក្រុម Shan United (មីយ៉ាន់ម៉ា) និងក្រុម Ezra FC (ឡាវ)។

គួរដឹងថា កាលពីរដូវកាលមុន វគ្គចែកពូលប្រចាំតំបន់អាស៊ីខាងកើត នៃពានរង្វាន់លំដាប់ទី៣ ទ្វីបអាស៊ីនេះ ពូលD គឺបានប្រកួតនៅមីយ៉ាន់ម៉ា ខណៈពូលE បានប្រកួតនៅម៉ុងហ្គលី ដោយមានការចូលរួមពីក្រុមព្រះខ័នរាជស្វាយរៀង ផងដែរ ដ្បិតលទ្ធផលក្នុងពូល ក្រុមតំណាងកម្ពុជានេះ បានបញ្ចប់ត្រឹមលេខ២ ដោយរកបាន ៣ពិន្ទុ ក្រោយឈ្នះ ១ និងចាញ់ ១ ។ បន្ទាប់មកពួកគេ បន្ដធ្វើបានយ៉ាងល្អ ដោយយកឈ្នះក្រុម Shan United ក្នុងវគ្គ ៨ក្រុមចុងក្រោយទាំង ២ជើង ៧-៤ និងយកឈ្នះក្រុម Madura United របស់ឥណ្ឌូនេស៊ី ក្នុងវគ្គពាក់កណ្ដាលផ្ដាច់ព្រ័ត្រទាំង ២ជើង ៦-៣ ដើម្បីឡើងវគ្គផ្ដាច់ព្រ័ត្រ និងទទួលធ្វើម្ចាស់ផ្ទះ ដោយជួបក្រុមខ្លាំង Akadag FC របស់ប្រទេសតួកមេនីស្ថាន នៅពហុកីឡដ្ឋានជាតិមរតកតេជោ តែសោកស្ដាយ ព្រះខ័នរាជស្វាយរៀង បានត្រឹមជើងឯករង ក្រោយបរាជ័យទាំងប្រផិតប្រផើយដោយលទ្ធផល ២-១៕