(ភ្នំពេញ)៖ ខោទឹកនោមម៉ាក UniDry គឺជាផលិតផលដែលផលិតនៅកម្ពុជា មានរោងចក្រនៅក្នុងតំបន់សេដ្ឋកិច្ចភ្នំពេញ បានកំពុងផ្តល់ការងារដល់ប្រជាពលរដ្ឋខ្មែររាប់រយនាក់។

ក្រុមហ៊ុន វិន ស៊ុន (ខេមបូឌា) ខូ អិលធីឌី ដែលជាម្ចាស់ម៉ាកខោទឹកនោមកូនក្មេង UniDry នៅថ្ងៃទី១៩​ ខែសីហា ឆ្នាំ២០២៥នេះ បានអនុញ្ញាតសុំបំភ្លឺករណីលេខបាកូដ ដែលវេចខ្ចប់លើខោទឹកនោមម៉ាក UniDry ក្រោយមានការផ្សព្វផ្សាយតាមបណ្តាញសង្គមមួយចំនួនអំពីករណីនេះ។

តំណាងខោទឹកនោមកូនក្មេងម៉ាក UniDry បានអះអាងថា ខោទឹកនោមកូនក្មេងម៉ាក UniDry ដែលចរាចរណ៍នៅក្នុងទីផ្សារកម្ពុជា គឺជាផលិតផលិតនៅកម្ពុជា ១០០% មិនមែនជាផលិតផលផ្សេងឡើយ។

កាលពីពេលថ្មី នៅលើបណ្តាញសង្គមខ្លះ បានលើកឡើងចំពោះផលិតផលខោទឹកនោមកូនក្មេងម៉ាក UniDry ដោយនៅសំបកវេចខ្ចប់ខាងក្រៅ ដាក់លេខបាកូដកម្ពុជា ផ្តើមដោយលេខ៨៨៤ ប៉ុន្តែសំវេចខ្ចប់ខាងក្នុងបែរជាដាក់លេខបាកូដរបស់ប្រទេសផ្សេង ផ្តើមដោយលេខ ៨៨៥។

ឆ្លើយតបនឹងករណីនេះ លោក ជួប រតនៈ អគ្គនាយកគ្រប់គ្រងទូទៅនៃក្រុមហ៊ុន វិន ស៊ុន ប្រចាំនៅអាស៊ីអាគ្នេយ៍ និងកម្ពុជា បានបញ្ជាក់ថា ផលិតផលដែលមានការថតបង្ហោះវែកញែកនៅលើបណ្តាញ ហ្វេសប៊ុក គឺជាផលិតផលិតផល ដែលកំពុងបង្ហើយកំបកវេចខ្ចប់ចាស់ ហើយកន្លងមករោងចក្រក៏បានធ្លាប់បានបកស្រាយរួចហើយដែរ អំពីសំបកវេចខ្ចប់នេះ។

លោកបានបញ្ជាក់ថា ខោទឹកនោមកូនក្មេងម៉ាក UniDry ដែលចរាចរណ៍នៅក្នុងទីផ្សារកម្ពុជា នាពេលបច្ចុប្បន្ននេះ គឺជាផលិតផលដែលផលិតនៅកម្ពុជា១០០% ដែលវិនិយោគឡើងដោយជនជាតិចិនតៃវ៉ាន់។

លោកបានពន្យល់ថា ខោទឹកនោមកូនក្មេងម៉ាក UniDry មានវត្តមាននៅក្នុងទីផ្សារកម្ពុជា អស់រយៈពេល២០ឆ្នាំមកហើយ។ ដោយមើលឃើញពីសន្ទុះនៃការគាំទ្ររបស់ប្រជាពលរដ្ឋខ្មែរ នៅឆ្នាំ២០១៨ ក្រុមហ៊ុន វិន ស៊ុន បានសម្រេចចិត្តមកបើករោងចក្រផលិត នៅកម្ពុជា ដោយដាក់លេខកូដខ្មែរ។ ប៉ុន្តែដោយកត្តាប្រកួតប្រជែង បានធ្វើឱ្យការលក់របស់ក្រុមហ៊ុនធ្លាក់ចុះ នៅឆ្នាំ២០២៤ រោងចក្រផលិតខោទឹកនោមកូនក្មេងម៉ាក UniDry បានសម្រេចផ្អាកដំណើរការមួយរយៈ និងប្តូរទៅផលិតនៅរោងចក្រដៃគូនៅប្រទេសផ្សេងវិញ និងបានដាក់លេខបាកូដរបស់ប្រទេសថៃ។

លោកបានឱ្យដឹងថា បច្ចុប្បន្ននេះបានរោងចក្រ វិន ស៊ុន បាននឹងកំពុងដំណើរផលិតខោទឹកនោមកូនក្មេង UniDry នៅលើទឹកដីកម្ពុជា ក្នុងតំបន់សេដ្ឋកិច្ចពិសេសភ្នំពេញ ដែលកម្មករនិយោជិតប្រមាណជាង ១០០នាក់កំពុងបម្រើការងារ និងមានតំណាងចែកចាយជាច្រើននាក់ទៀត ដែលទទួលផលដោយប្រយោលពីរោងចក្រនេះ។

លោកអះអាងថា នេះមិនមែនជាផលិតផលថៃឡើយ។ សូមទុកពេលឱ្យរោងចក្រកែប្រែលើបញ្ហាដែលកើតមាន និងសូមមេត្តាយោគយល់រាល់កំហុសឆ្គងដែលកើត ដើម្បីផ្តល់ឱកាសបន្តការងារដល់បងប្អូនកម្មករ កម្មការិនីខ្មែរជាច្រើនអ្នក៕