(បរទេស)៖ សេតវិមានអាមេរិកបានចាប់ផ្តើមប្រើប្រាស់គណនី TikTok ផ្លូវការជាលើកដំបូងនៅថ្ងៃអង្គារ ទី១៩ ខែសីហា ឆ្នាំ២០២៥ ក្នុងគោលបំណងផ្សព្វផ្សាយខ្លឹមសារនយោបាយដល់យុវជនអាមេរិកជាច្រើនលើវេទិកាវីដេអូខ្លីមួយនេះ ដែលបច្ចុប្បន្នមានអ្នកប្រើជាង ១៧០លាននាក់នៅសហរដ្ឋអាមេរិក។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី២០ ខែសីហា ឆ្នាំ២០២៥។

នៅក្នុងវីដេអូដំបូងដែលត្រូវបានបង្ហោះ គេបានឮប្រធានាធិបតីដូណាល់ ត្រាំ ប្រកាសថា «ខ្ញុំជាសំឡេងរបស់អ្នក» ដោយភ្ជាប់ជាមួយចំណងជើង «អាមេរិក យើងត្រឡប់មកវិញហើយ! តើ TikTok សុខសប្បាយទេ?»។ ការបង្កើតគណនី TikTok ផ្លូវការពីសេតវិមាននេះជាចំណែកមួយនៃយុទ្ធសាស្ត្ររបស់រដ្ឋបាលលោកត្រាំ ក្នុងការប្រើប្រាស់បច្ចេកវិទ្យាឌីជីថល ដើម្បីចាប់យកអ្នកបោះឆ្នោតវ័យក្មេង និងពង្រឹងការផ្សព្វផ្សាយគោលនយោបាយ។ ទោះបីជាមានការចូលរួមលើ TikTok បែបសាមញ្ញបែបនេះក៏ដោយ ក៏អនាគតរបស់វេទិកានេះនៅសហរដ្ឋអាមេរិកត្រូវបានគេចាប់អារម្មណ៍ខ្លាំង ដោយសារមានច្បាប់ដែលបានអនុម័តនៅឆ្នាំ២០២៤ តម្រូវឲ្យ TikTok ត្រូវតែលក់ចេញពីក្រុមហ៊ុន ByteDance របស់ចិន ប្រសិនបើមិនចង់បិទដំណើរការនៅអាមេរិក។ ទោះជាយ៉ាងណា ការអនុវត្តច្បាប់នេះត្រូវបានពន្យារពេលមកដល់ថ្ងៃទី១៧ ខែកញ្ញា ឆ្នាំ២០២៥។

អ្នកនយោបាយមួយចំនួនបានប្រកាន់ថា TikTok បង្កគ្រោះថ្នាក់សន្តិសុខជាតិ ដោយសារតែលទ្ធភាពនៃការចូលប្រើទិន្នន័យពីរដ្ឋាភិបាលចិន។ ក៏ប៉ុន្តែសេតវិមានបានជ្រើសរើសយកជំហរក្នុងការប្រើប្រាស់វេទិកានេះ ដើម្បីផ្តល់សារ និងចូលរួមជិតស្និទ្ធជាមួយប្រជាជន៕