(បរទេស)៖ ក្រុមហ៊ុន Vantage Data Centers បានប្រកាសពីគម្រោងដ៏ធំមួយក្នុងការវិនិយោគទឹកប្រាក់ជាង ២៥ ពាន់លានដុល្លារ ដើម្បីសាងសង់មជ្ឈមណ្ឌលទិន្នន័យដ៏ធំបំផុតរបស់ខ្លួនលើផ្ទៃដី ១,២០០ ហិចតា នៅក្នុងតំបន់ Shackelford County រដ្ឋតិចសាស់ សហរដ្ឋអាមេរិក។ គម្រោងនេះមានគោលបំណងឆ្លើយតបទៅនឹងតម្រូវការដែលកំពុងរីកចម្រើនខ្លាំងនៃបច្ចេកវិទ្យាបញ្ញាសិប្បនិម្មិត (AI)។ នេះបើយោងតាមការចេញផ្សាយដោយ CNA នៅថ្ងៃទី២០ ខែសីហា ឆ្នាំ២០២៥។

គម្រោងដែលមានឈ្មោះថា «Frontier» នេះនឹងក្លាយជាមជ្ឈមណ្ឌលទិន្នន័យដ៏ធំបំផុតនៅក្នុងផលប័ត្រសកលរបស់ Vantage ដោយមានថាមពលសរុប ១.៤ ជីហ្គាវ៉ាត់។ មជ្ឈមណ្ឌលនេះនឹងមានអគារចំនួន ១០ ដើម្បីទ្រទ្រង់ដល់ប្រព័ន្ធ AI ទំនើបៗ។

ការសាងសង់បានចាប់ផ្តើមរួចហើយ ហើយអគារដំបូងគេគ្រោងនឹងបញ្ចប់នៅត្រីមាសទីពីរនៃឆ្នាំក្រោយ។ គម្រោងនេះទទួលបានការគាំទ្រពីក្រុមហ៊ុនវិនិយោគធំៗដូចជា Silver Lake និង DigitalBridge ដែលបានចូលរួមក្នុងការផ្តល់ហិរញ្ញប្បទានរួមគ្នាដល់ទៅ ៩.២ ពាន់លានដុល្លារ ផងដែរ។

គួរជម្រាបថា មជ្ឈមណ្ឌលទិន្នន័យនេះមានសារៈសំខាន់ខ្លាំង ព្រោះវាជាកន្លែងផ្ទុកទិន្នន័យ និងដំណើរការកម្មវិធី AI ដូចជា ChatGPT របស់ OpenAI និង Gemini របស់ Google ដែលទាមទារថាមពល និងបច្ចេកវិទ្យាខ្ពស់បំផុត៕