(ភ្នំពេញ)៖ ក្រុមព្រះខ័នរាជស្វាយរៀង របស់កម្ពុជា នឹងត្រូវជួបក្រុម Shan United របស់ម្ចាស់ផ្ទះមីយ៉ាន់ នាវេលាម៉ោង ៦៖៣០នាទីល្ងាច(ម៉ោងនៅកម្ពុជា) ថ្ងៃទី២១ ខែសីហានេះ ក្នុងជំនួបបើកឆាកពូលB នៃការប្រកួតជើងឯកក្លិបបាល់ទាត់អាស៊ីអាគ្នយ៍ ASEAN Club Championship Shopee Cup 2025/26 ខណៈគ្រូបង្វឹកក្រុមជើងឯកលីគកំពូលកម្ពុជាលោក Mattew McConkey ថា ការប្រកួតនេះ នឹងមានការប្រកួតប្រជែងខ្លាំងខុសប្លែកពីការជួបគ្នា ៣ដង កាលពីឆ្នាំមុន។

នៅក្នុងសន្និសីទសារព័ត៌មានមុនការប្រកួតកាលពីថ្ងៃពុធកន្លងលោក McConkey បានលើកឡើងថា ឆ្នាំនេះ Shan United បានផ្លាស់ប្ដូរកីឡាករច្រើន ពិសេសកីឡាករបរទេស ព្រមទាំងទម្រង់លេងជាដើម ហើយព្រះខ័នរាជស្វាយរៀង ក៏ដូចគ្នា ។ ដូច្នេះលោកគិតថា ជំនួបលើកនេះ នឹងមានការខុសប្លែងច្រើន បើធៀបនឹងការជួបគ្នា ៣លើកកន្លងមក ។ យ៉ាងណាលោកថា វាមិនមែនជាឧបសគ្គសម្រាប់ក្រុមក្នុងដំណើរឆ្ពោះទៅរកជ័យជម្នះនោះទេ គ្រាន់តែលោកចង់បង្ហាញថា អ្វីដែលបានកើតឡើងពីអតីតកាល មិនមានអ្វីប៉ះពាល់ដល់អនាគតឡើយ។

ជាមួយគ្នាដែរ កីឡាករសញ្ជាតិខ្មែរ Yudai Ogawa បានបង្ហាញពីការត្រៀមបានយ៉ាងល្អរបស់ព្រះខ័នរាជស្វាយរៀង ដោយក្រុមនឹងលេងជាមួយទំនុកចិត្ត ១០០% ទល់នឹងក្រុម Shan United ដែលជាក្រុមល្អមួយក្នុងពូល ដែលមិត្តរួមក្រុមទាំងអស់ នឹងផ្ដោតសំខាន់លើការប្រកួតនេះ ។ បន្ថែមលើនេះ Yudia ក៏បានសម្ដែងក្ដីរីករាយ ចំពោះការបានត្រឡប់មកប្រកួតពានរង្វាន់អន្ដរជាតិជាថ្មី ក្រោយខកខានអស់រយៈពេល ២ឆ្នាំផងដែរ។

គួរដឹងថា កាលពីរដូវកាលមុន ក្រុមទាំងពីរ ធ្លាប់បានជួបគ្នា ៣ដង ដោយព្រះខ័នរាជស្វាយរៀង ឈ្នះ ២ដង និងចាញ់ ១ដង ពោលគឺឈ្នះក្នុងពូល នៃពានរង្វាន់ជើងឯកក្លិបអាស៊ីអាគ្នេយ៍នេះ ៤-២ (ក្នុងដី) និងឈ្នះក្នុងជើងទី១ នៃវគ្គ ១/៤ ពានរង្វាន់ AFC Challenge League 2024/25 ៦-២(ក្នុងដី) មុនចាញ់ក្រុមជើងឯកលីគកំពូលមីយ៉ាន់ម៉ានេះ ២-១ វិញ នៅជើងទី២ នៃពានលំដាប់ទី៣ ទ្វីបអាស៊ីនេះ ។ ដូច្នេះចាំមើលជំនួបល្ងាចនេះ ព្រះខ័នរាជស្វាយរៀង ឬ Shan United នឹងទទួលបាន ៣ពិន្ទុពីការប្រកួតបើកឆាកពានរង្វាន់ ASEAN Club Championship Shopee Cup 2025/26?

សម្រាប់យុទ្ធនាការប្រកួតពានរង្វាន់ជើងឯកក្លិបបាល់ទាត់អាស៊ីអាគ្នេយ៍ រដូវកាលថ្មី ព្រះខ័នរាជស្វាយរៀង ស្ថិតក្នុងពូលB ជាមួយក្រុម Bangkok United (ថៃ), Johor Darul Ta’zim FC (ម៉ាឡេស៊ី), Nam Dinh (វៀតណាម), Lion City Sailors FC (សិង្ហបុរី) និងក្រុម Shan United របស់មីយ៉ាន់ម៉ា ដែលបានយកឈ្នះក្រុមឡាវ Ezra ក្នុងវគ្គជម្រុះ(Play-Off) ដោយលទ្ធផល ៣-១ កាលពីថ្មីៗ។

ចំពោះកម្មវិធីប្រកួត បន្ទាប់ពីជួបក្រុម Shan United នៅល្ងាចថ្ងៃព្រហស្បតិ៍សប្ដាហ៍នេះ ព្រះខ័នរាជស្វាយរៀង នឹងបន្ដភារកិច្ចប្រកួតក្រៅដី ដោយត្រូវជួបក្រុម Nam Dinh របស់វៀតណាម ថ្ងៃទី២៥ ខែកញ្ញា មុនបើកទ្វារផ្ទះទទួលក្រុមភ្ញៀវ ដែលជាក្លិបធំៗក្នុងពូល ២ប្រកួតជាប់គ្នា ដោយត្រូវជួបក្រុមជើងឯកលីគកំពូលម៉ាឡេស៊ី Johor Darul Ta’zim FC នាថ្ងៃទី៤-ធ្នូ និងជួបក្រុមជើងឯករងលីគកំពូលថៃ Bangkok United នាថ្ងៃទី២៩ ខែមករា ឆ្នាំ២០២៦ មុនជំនួបបញ្ចប់ពូលB ជាមួយក្រុមម្ចាស់ផ្ទះ របស់សិង្ហបុរី Lion City Sailors FC នាថ្ងៃទី៥ ខែកុម្ភៈ ឆ្នាំ២០២៦ ខាងមុខ៕