(សៅប៉ូឡូ)៖ កីឡាករចាំទី Fabio Deivson Lopes Maciel បានបំបែកកំណត់ត្រាចាស់របស់អ្នកចាំទីអង់គ្លេស Peter Shilton ដែលបង្ហាញខ្លួនបានច្រើនប្រកួតជាងគេ។ នេះបើយោងតាមការប្រកាសពីក្លិប Fluminense ដោយត្រូវបានដកស្រង់ចេញផ្សាយដោយ BBC។

កីឡាករសញ្ជាតិប្រេស៊ីល វ័យ ៤៤ឆ្នាំរូបនេះ បានចូលលេងសរុបកើនដល់ ១៣៩១លើក គិតចាប់តាំងពីក្លាយខ្លួនជាកីឡាករបាល់ទាត់អាជីពក្នុងឆ្នាំ១៩៩៧ មក ដោយចំណាយពេលលេងតែនៅទឹកដីតំបន់អាមេរិកឡាទីន នៃក្លិបស្ថិតនៅប្រទេសប្រេស៊ីលតែម្តង វ៉ាកំណត់ត្រារបស់ Shilton ដែលស្ថិតក្នុងសៀវភៅ Guinness បានចូលលេង ១៣៩០លើកប៉ុណ្ណោះ។

នៅចាំបានថា Fabio គឺជាកីឡាករសំខាន់មួយរូប ដែលបានរួមចំណែកជួយក្រុមរបស់ប្រេស៊ីល Fluminense ឈានដល់វគ្គពាក់កណ្តាលផ្តាច់ព្រ័ត្រនៅ FIFA Club World Cup 2025 ដោយបានចូលលេងទាំង ៦ប្រកួតតែម្តង និងរក្សាសំណាញ់ទីមិនឱ្យគេស៊ុតចូល (clean sheet) ៣លើកផងដែរ នៅទឹកដីអាមេរិកនាអំឡុងខែមិថុនា និងកក្កដា។

រូបគេបានចូលលេងច្រើនបំផុតក្នុងក្លិបអាជីព Cruzeiro មានដល់ទៅ ៩៧៦ប្រកួតនៅចន្លោះឆ្នាំ២០០៥ ដល់ឆ្នាំ២០២២ និងនៅក្លិប Vasco da Gama បាន ១៥០លើក និងក្លិប Uniao Bandeirante បាន ៣០លើក ដោយបានបំបែកកំណត់ត្រាកាលពីថ្ងៃអង្គារ នៅពេលចូលលេងជាមួយ Fluminense លើកទី២៣៥ប្រកួត ដោយបានយកឈ្នះគូប្រជែង America de Cali ២-០ ក្នុងវគ្គ ១៦ក្រុមពាន Copa Sudamericana ទៀតផង៕