ឥណ្ឌាដាក់វិធានការខ្លាំង! គ្រោងចេញច្បាប់ហាមឃាត់ហ្គេមអនឡាញរកលុយ ដែលប៉ះពាល់ដល់អ្នកវិនិយោគរាប់ពាន់លានដុល្លារ
21-08-2025 09:06
(ភ្នំពេញ)៖ រដ្ឋាភិបាលឥណ្ឌាកំពុងរៀបចំសេចក្តីព្រាងច្បាប់ថ្មីមួយដើម្បីហាមឃាត់ល្បែងអនឡាញដែលមានការភ្នាល់ដោយប្រើប្រាស់លុយ។ ផែនការនេះធ្វើឡើងក្នុងគោលបំណងទប់ស្កាត់ផលប៉ះពាល់អវិជ្ជមានផ្នែកផ្លូវចិត្ត និងហិរញ្ញវត្ថុដែលបង្កឡើងដោយការញៀនល្បែង។ នេះបើយោងតាមការចេញផ្សាយរបស់ CNA នៅថ្ងៃទី២០ ខែសីហា ឆ្នាំ២០២៥។
សេចក្តីព្រាងច្បាប់នេះមានឈ្មោះថា «Promotion and Regulation of Online Gaming Bill 2025» ដែលបានចែងយ៉ាងច្បាស់ថា គ្មានបុគ្គល ឬក្រុមហ៊ុនណាមួយអាចផ្តល់ឬផ្សព្វផ្សាយហ្គេមប្រភេទនេះបានទេ។ អ្នកដែលនៅតែបន្តល្មើសច្បាប់នេះអាចនឹងត្រូវប្រឈមមុខនឹងការជាប់ពន្ធនាគាររហូតដល់ ៣ ឆ្នាំ រួមទាំងការបង់ប្រាក់ពិន័យផងដែរ។
យោងតាមក្រុមហ៊ុនវិនិយោគទុន Lumikai ទីផ្សារហ្គេមប្រភេទនេះនៅក្នុងប្រទេសឥណ្ឌាត្រូវបានគេរំពឹងថាអាចនឹងកើនឡើងដល់ ៣,៦ ពាន់លានដុល្លារអាមេរិក នៅត្រឹមឆ្នាំ ២០២៩។ ប៉ុន្តែផែនការហាមឃាត់នេះនឹងក្លាយជាផលប៉ះពាល់ធ្ងន់ធ្ងរមួយដល់ឧស្សាហកម្មហ្គេមអនឡាញ ដែលបានទាក់ទាញការវិនិយោគបរទេសរាប់ពាន់លានដុល្លាររួចមកហើយ។ ក្រុមហ៊ុនហ្គេមធំៗដូចជា Dream11 និង Mobile Premier League ដែលមានតម្លៃរាប់ពាន់លានដុល្លារអាមេរិកអាចនឹងរងផលប៉ះពាល់យ៉ាងខ្លាំងពីច្បាប់ថ្មីនេះ។
គួរជម្រាបថា ក្រសួងបច្ចេកវិទ្យាព័ត៌មានឥណ្ឌាមិនទាន់បានធ្វើអត្ថាធិប្បាយលម្អិតលើសេចក្តីព្រាងច្បាប់នេះនៅឡើយទេ។ ការសម្រេចចិត្តនេះបង្ហាញពីការយកចិត្តទុកដាក់របស់រដ្ឋាភិបាលឥណ្ឌាក្នុងការការពារប្រជាជនរបស់ខ្លួនពីផលវិបាកដែលបង្កឡើងដោយហ្គេមអនឡាញរកលុយទាំងនេះ៕
