(ភ្នំពេញ)៖ ក្រុមបាល់ទះវិសាខា នឹងតំណាងប្រទេសកម្ពុជា ចូលរួមការប្រកួតពានរង្វាន់ប៉ូលិសអន្ដរជាតិ International Police Volleyball Tournament 2025 ចាប់ពីថ្ងៃទី២៦-៣០ ខែសីហាខាងមុខ នៅកីឡដ្ឋាន Military Zone 7 Indoor ប្រទេសវៀតណាម។ នេះបើតាមការជូនដំណឹងរបស់សហព័ន្ធកីឡាបាល់់ទះកម្ពុជា នៅព្រឹកថ្ងៃព្រហស្បតិ៍នេះ។

សម្រាប់ពានរង្វាន់ប៉ូលិសអន្ដរជាតិក្នុងតំបន់នេះ មានក្រុមបាល់ទាត់ ៦ក្រុម មកពី ៤ប្រទេសចូលរួម គឺមានក្រុម វិសាខា របស់កម្ពុជា, ក្រុម Jakarta Bhayangkara Persisi Club របស់ឥណ្ឌូនេស៊ី, ក្រុមបាល់ទះក្រសួងសន្តិសុខសាធារណៈឡាវ ព្រមទាំងក្រុមម្ចាស់ផ្ទះវៀតណាម ៣ក្រុម រួមមានក្រុមហាណូយ, ក្រុម Vietnam People’s Police និងក្រុម The Cong-Tan Cang។

ក្នុងនាមក្រុមសម្បូរដោយធនធានកីឡាករជម្រើសជាតិ គេបានចាត់ទុកបេសកកម្មនេះ គឺជាឱកាសមួយ សម្រាប់ពង្រឹងសមត្ថភាព និងទម្រង់លេងរបស់កីឡាករកម្ពុជា ស្របពេលអ្នកលើកបាល់ ឬអ្នកប៉ះសេឆ្នើម សួន ចាន់ណារ៉ូ ទើបត្រឡប់ចូលជំរំហ្វឹកហាត់វិញ កាលពីថ្មីៗ ដើម្បីត្រៀមការប្រកួតអន្ដរជាតិធំៗនាពេលខាងមុខ ក៏ដូចជាការត្រៀមស៊ីហ្គេម លើកទី៣៣ នាចុងឆ្នាំ២០២៥ នេះផងដែរ៕