(បរទេស)៖ ក្រុមហ៊ុន Microsoft បានប្រកាសកាត់បន្ថយសិទ្ធិចូលប្រើប្រាស់ប្រព័ន្ធព្រមានសុវត្ថិភាពតាមអ៊ីនធឺណិត (cybersecurity early warning system) សម្រាប់ក្រុមហ៊ុនចិនមួយចំនួន។ ការសម្រេចចិត្តនេះធ្វើឡើង បន្ទាប់ពីមានការសង្ស័យថាទីក្រុងប៉េកាំងបានចូលរួមក្នុងការវាយប្រហារតាមប្រព័ន្ធអ៊ីនធឺណិតទៅលើម៉ាស៊ីនមេ Microsoft SharePoint កាលពីខែមុន។ នេះបើយោងតាមការចេញផ្សាយដោយ CNA នៅថ្ងៃទី២១ ខែសីហា ឆ្នាំ២០២៥។

អ្នកជំនាញជាច្រើនបានសង្ស័យថា ព័ត៌មានដែលប្រើសម្រាប់វាយប្រហារនេះ អាចលេចធ្លាយពីកម្មវិធី Microsoft Active Protections Program (MAPP) ដែលជាកម្មវិធីផ្តល់ព័ត៌មានអំពីការគំរាមកំហែងដល់ក្រុមហ៊ុនដៃគូរបស់ខ្លួន។

ជាការឆ្លើយតប Microsoft បានបញ្ជាក់ថា ខ្លួននឹងមិនបន្តផ្តល់ «proof of concept code» (កូដសម្រាប់សាកល្បងសុវត្ថិភាព) ដល់ក្រុមហ៊ុនចិនមួយចំនួនទៀតទេ។ កូដនេះអាចជួយអ្នកជំនាញសុវត្ថិភាព ប៉ុន្តែក៏អាចត្រូវបានពួក Hacker យកទៅប្រើប្រាស់បានដែរ។

ទោះបីជាយ៉ាងនេះក្តី Microsoft បានបដិសេធមិនបញ្ចេញឈ្មោះក្រុមហ៊ុនដែលត្រូវរឹតបន្តឹង ឬលម្អិតពីលទ្ធផលនៃការស៊ើបអង្កេតរបស់ខ្លួនឡើយ៕