(ភ្នំពេញ)៖ ធនាគារ កាណាឌីយ៉ា ដែលជាធនាគារពាណិជ្ជដ៏ធំបំផុតមួយក្នុងប្រទេសកម្ពុជា ដែលមានវត្តមានជាង ៣០ ឆ្នាំក្នុងការផ្តល់សេវាហិរញ្ញវត្ថុដ៏ល្អឥតខ្ចោះ ត្រូវបានទទួលស្គាល់ជាថ្មីម្តងទៀតនៅជាមួយពានរង្វាន់សម្រាប់ឧត្តមភាព ពីស្ថាប័ន Euromoney។ ធនាគារត្រូវបានគេទទួលស្គាល់ជាមួយពានរង្វាន់ «ធនាគារឆ្នើមបំផុតសម្រាប់សាជីវកម្មខ្នាតធំ ក្នុងឆ្នាំ២០២៥» ដែលជាការឈ្នះលើកទីបី និងជាប់ៗគ្នាចាប់តាំងពីឆ្នាំ ២០២៣ មកម្ល៉េះ។

ការឈ្នះពានរង្វាន់ដ៏មានកិត្យានុភាពនេះ បញ្ជាក់ជាថ្មីម្តងទៀតនូវការប្តេជ្ញាចិត្តរបស់ធនាគារ កាណាឌីយ៉ា ក្នុងការផ្តល់ជូននូវដំណោះស្រាយហិរញ្ញវត្ថុដ៏សមស្រប ដែលជួយទៅដល់អតិថិជនជាម្ចាស់សាជីវកម្មក្នុងការបង្កើនប្រសិទ្ធភាពប្រតិបត្តិការ គ្រប់គ្រងលំហូរសាច់ប្រាក់ និងពង្រីកអាជីវកម្មរបស់ខ្លួន។ ពានរង្វាន់នេះត្រូវបានផ្តល់ជូនដោយស្ថាប័ន Euromoney ដែលជាស្ថាប័នបោះពុម្ពផ្សាយព័ត៌មានផ្នែកហិរញ្ញវត្ថុ ជាមួយការទទួលស្គាល់លំដាប់ពិភពលោក ទៅលើការវិភាគរបាយការណ៍ហិរញ្ញវត្ថុ និងទិន្នន័យច្បាស់លាស់ ហើយពានរង្វាន់សម្រាប់ឧត្តមភាព មួយនេះគឺផ្តល់កិត្តិយសទៅដល់ស្ថាប័នជាច្រើនដែលបានបង្ហាញពីការអនុវត្តដ៏ល្អប្រសើរទៅលើនវានុវត្តន៍ថ្មីៗនៃ ផ្នែកហិរញ្ញវត្ថុ និងភាពជាអ្នកដឹកនាំក្នុងឧស្សាហកម្មធនាគារ។

*ជំរុញការអភិវឌ្ឍសាជីវកម្មជាមួយគោលបំណងច្បាស់លាស់

ដោយទទួលស្គាល់ពីការរីកចម្រើនយ៉ាងឆាប់រហ័ស និងការធ្វើពិពិធកម្មសេដ្ឋកិច្ចរបស់ប្រទេសកម្ពុជា ធនាគារ កាណាឌីយ៉ានៅតែបន្តពង្រីកវិសាលភាពរបស់ខ្លួនទៅកាន់អតិថិជនជាម្ចាស់សាជីវកម្មនៅទូទាំងវិស័យសំខាន់ៗ រួមទាំងការលក់ដុំ និងរាយ ស្ថាបត្យកម្ម និងសំណង់ អចលនទ្រព្យ ហេដ្ឋារចនាសម្ព័ន្ធ កសិកម្ម និងការកែច្នៃផលិតផលកសិកម្ម បដិសណ្ឋារកិច្ច និងទេសចរណ៍ សម្លៀកបំពាក់ និងផលិតកម្ម។ ធនាគារប្តេជ្ញាចិត្តកាន់តែមោះមុតក្នុងការពង្រឹងដំណោះស្រាយហិរញ្ញវត្ថុរបស់ខ្លួនឲ្យកាន់តែប្រសើរបន្ថែមសម្រាប់សាជីវកម្មខ្នាតធំ ក្រុមហ៊ុនក្នុងស្រុក និងតំណាងចែកចាយ ដោយផ្តល់ជូនតាមតម្រូវការនីមួយៗរបស់ក្រុមហ៊ុនមានដូចជា គម្រោងហិរញ្ញប្បទានពាណិជ្ជកម្ម ដែលមាន កញ្ចប់ខ្សែច្រវាក់ផ្គត់ផ្គង់ (Supply Chain Package) និងកម្មវិធីហិរញ្ញប្បទានបៃតងដែលតម្រូវសម្រាប់សហគ្រាសដែលផ្តោតលើផលិតកម្ម ឬសេវាកម្មដែលផ្តោតទៅលើការការពារបរិស្ថាន។

នៅឆ្នាំ ២០២៤ ធនាគារ កាណាឌីយ៉ា បានបើកដំណើរការអង្គភាពហិរញ្ញប្បទានអចលនទ្រព្យឯកទេសរបស់ខ្លួន ដែលត្រូវបានរចនាឡើងដើម្បីផ្តល់នូវគម្រោងហិរញ្ញប្បទានដ៏សមស្រប ជាមួយនឹងចំណេះដឹងផ្នែកឥណទានសម្រាប់គម្រោងអចលនទ្រព្យ និងសំណង់នានា។ ចំពោះភាពជាដៃគូយុទ្ធសាស្ត្ររបស់ខ្លួន ធនាគារបានពង្រឹងកិច្ចសហប្រតិបត្តិការបន្ថែមជាមួយសាជីវកម្មធានាឥណទានកម្ពុជា (CGCC) ដែលគាំទ្រទៅលើផ្នែកហិរញ្ញប្បទានជាមួយនឹងមានភាពបត់បែន និងការកែសម្រួលឲ្យកាន់តែប្រសើរឡើង សម្រាប់អ្នកនាំចេញអង្ករ និងរោងម៉ាស៊ីនកិនស្រូវ ដែលទាំងអស់នេះបានបញ្ជាក់អំពីការប្តេជ្ញាចិត្តរបស់ខ្លួនក្នុងការគាំទ្រសសរស្តម្ភដ៏សំខាន់នៃសេដ្ឋកិច្ចរបស់ប្រទេសកម្ពុជា។

លើសពីការផ្តល់ហិរញ្ញប្បទាន ធនាគារ កាណាឌីយ៉ា ក៏ផ្តល់ជូននូវសេវាកម្មធនាគារប្រតិបត្តិការពេញលេញ ដូចជា ការប្រមូលសាច់ប្រាក់ ការបញ្ចូលសាច់ប្រាក់ ការគ្រប់គ្រងសំហូរសាច់ប្រាក់ងាយស្រួល ការផ្ទេរប្រាក់ និងការប្តូររូបិយប័ណ្ណអន្តរជាតិ ដែលជាជំនួយទៅដល់អតិថិជនសាជីវកម្មក្នុងការបង្កើនដើមទុនសម្រាប់បង្វិល សម្រួលដំណើរការនៃប្រតិបត្តិការសាច់ប្រាក់ និងការគ្រប់គ្រងលើលំហូរសាច់ប្រាក់ដោយពេលវេលាជាក់ស្តែង (real-time)។ សេវាកម្មធនគារទាំងនេះត្រូវបានរចនាឡើងដើម្បីបង្កើនប្រសិទ្ធភាពនៃការគ្រប់គ្រងក្នុងស្ថាប័ន កាត់បន្ថយហានិភ័យប្រតិបត្តិការ និងបង្កើនងាយស្រួលក្នុងការធ្វើប្រតិបត្តិការហិរញ្ញវត្ថុផ្សេងៗទាំងក្នុង និងក្រៅប្រទេស។

*បង្កើនបទពិសោធន៍ឌីជីថល សម្រាប់អតិថិជនឲ្យកាន់តែប្រសើរ

ជាផ្នែកមួយនៃបរិវត្តកម្បឌីជីថលដែលកំពុងបន្តប្រតិបត្តិនៅក្នុងធនាគារ កាណាឌីយ៉ា ធនាគារបានធ្វើឱ្យប្រសើរឡើងនូវសេវាធនាគារ កាណាឌីយ៉ា តាមអ៉ីនធឺណិត សម្រាប់ក្រុមហ៊ុន (Corporate Internet Banking) ជាមួយនឹងរូបរាងកាន់តែល្អប្រសើរ និងបត់បែន ដោយផ្តល់នូវបទពិសោធន៍កាន់តែរលូនទៅដល់អ្នកប្រើប្រាស់។ ការកែលម្អទាំងនេះ រួមមានការផ្ទៀងផ្ទាត់អត្តសញ្ញាណអ្នកប្រើប្រាស់កម្រិតខ្ពស់ ការទូទាត់ភ្លាមៗ ដំណើរការទូទាត់ជាមួយពហុរូបិយប័ណ្ណ និងលក្ខណៈពិសេសផ្សេងទៀតដែលធ្វើអោយប្រសើរឡើងយ៉ាងខ្លាំងនូវប្រសិទ្ធភាពប្រតិបត្តិការសម្រាប់អាជីវកម្ម។ ការធ្វើបច្ចុប្បន្នភាពឌីជីថលទាំងនេះ បានពង្រឹងទំនាក់ទំនងជាមួយអតិថិជនឲ្យកាន់តែល្អប្រសើរ និងបង្កើនបទពិសោធន៍នៃការប្រើប្រាស់ ប្រកបដោយប្រសិទ្ធភាពខ្ពស់ និងភាពផ្ទាល់ខ្លួនសម្រាប់អតិថិជនសាជីវកម្មខ្នាតធំ។

ធនាគារ កាណាឌីយ៉ា បានផ្តោតសំខាន់លើការពង្រឹងទំនាក់ទំនងជាមួយអតិថិជនដែលជាម្ចាស់សាជីវកម្មធំៗ ក៏ដូចជាបង្កើនបទពិសោធន៍នៃដំណើរការផ្តល់សេវាកម្មធនាគារឲកាន់តែប្រសើរ តាមរយៈការចាប់ដៃគូយុទ្ធសាស្ត្រ ការទំនាក់ទំនងប្រកបដោយប្រសិទ្ធិភាព និងការផ្តល់ដំណោះស្រាយហិរញ្ញវត្ថុដ៏សមស្របទៅតាមតម្រូវការ។ តាមរយៈកន្លែងផ្តល់ព័ត៌មានសម្រាប់សេវាកម្មធនាគារសម្រាប់សាជីវកម្មខ្នាតធំ ក៏ដូចជាសេវាកម្មប្រតិបត្តិការធនាគារ (Transactional Banking) រួមជាមួយប្រធានគ្រប់គ្រងទំនាក់ទំនងអតិថិជនដ៏ជំនាញ និងការចូលរួមយ៉ាងសកម្មក្នុងសកម្មភាពទំនាក់ទំនងផ្សេងៗជាច្រើនទៀតនោះ ធនាគារបានពង្រឹងទំនាក់ទំនងជាមួយអតិថិជនបានកាន់តែរឹងមាំ និងការឆ្លើយតបទៅលើចម្ងល់របស់អតិថិជនកាន់តែរហ័ស។ ឥឡូវនេះ បទពិសោធន៍ដំណើរការនៃការផ្តល់សេវាកម្ម គឺកាន់តែមានប្រសិទ្ធភាព និងតម្លាភាព ណែនាំដោយក្រុមការងារដែលជំនាញវិជ្ជាជីវៈខ្ពស់ ទៅតាមតំរូវការ និងគោលដៅរបស់អតិថិជន ជាមួយឯកសារដែលមានលក្ខណៈមិនស្មុគស្មាញ និងការត្រួតពិនិត្យក្រោយពេលបញ្ចប់ដំណើរការនៃការផ្តល់សេវាកម្មនានា។

*ភាពជាអ្នកដឹកនាំ ការប្តេជ្ញាចិត្តចំពោះឧត្តមភាព និងនវានុវត្តន៍

លោក Raymond Sia នាយកប្រតិបត្តិ និងជាប្រធានក្រុមប្រឹក្សាប្រតិបត្តិនៃធនាគារ កាណាឌីយ៉ា មានប្រសាសន៍ថា៖ «ពានរង្វាន់នេះបានឆ្លុះបញ្ចាំងពីការប្តេជ្ញាចិត្តឥតងាករេរបស់យើងខ្ញុំ ក្នុងការផ្តល់ជូននូវបទពិសោធន៍ធនាគារដ៏ល្អឥតខ្ចោះជូនទៅដល់អតិថិជន និងដំណោះស្រាយហិរញ្ញវត្ថុប្រកបដោយភាពច្នៃប្រឌិតនៅគ្រប់អតិថិជនគោលដៅទាំងអស់ រួមទាំង អតិថិជនទូទៅ អតិថិជនជាម្ចាស់សហគ្រាសធុនតូច និងមធ្យម និងអតិថិជនជាម្ចាស់សាជីវកម្ម។ នៅពេលដែលសេដ្ឋកិច្ចកម្ពុជាបន្តវិវឌ្ឍន៍ យើងខ្ញុំនៅតែផ្តោតលើការលើកកម្ពស់ផលិតផល សេវាកម្មធនាគារទូទៅ និងបែបឌីជីថលរបស់យើង រួមទាំងពង្រឹងភាពជាដៃគូកាន់តែស៊ីជម្រៅដើម្បីបំពេញតម្រូវការផ្សេងៗរបស់អតិថិជន។ គោលដៅរបស់យើងខ្ញុំគឺដើម្បីលើកកម្ពស់ ក៏ដូចជាជួយជំរុញដល់អាជីវកម្ម និងអតិថិជនទូទៅ ជាមួយនឹងសេវាកម្មធនាគារដែលឆ្លាតវៃ និងសម្បូរបែប ដោយឆ្លើយតបទៅលើការរប្តេជ្ញាចិត្តរបស់យើងខ្ញុំក្នុងការក្លាយជាដៃគូហិរញ្ញវត្ថុដ៏ល្អបំផុតរបស់អ្នក។ ដោយសារតែការខិតខំប្រឹងប្រែងទាំងអស់នេះ ធ្វើឲ្យយើងខ្ញុំទទួលបានកិត្តិយសជាមួយពានរង្វាន់ក្នុងឆ្នាំនេះពីស្ថាប័នដ៏ល្បីល្បាញចំនួនពីរគឺ ស្ថាប័ន The Asian Banker ដោយប្រសិទ្ធិនាមយើងខ្ញុំជា «ធនាគារគ្រប់គ្រងល្អបំផុត» និង «ឧត្តមភាពក្នុងការបម្រើសេវារូបវន្តបុគ្គលឆ្នើមបំផុត» និងស្ថាប័ន Euromoney ដែលផ្តល់ពានរង្វាន់ដល់យើងខ្ញុំជា «ធនាគារល្អបំផុតសម្រាប់សាជីវកម្មខ្នាតធំ»។

អ្នកនាង Pakaravee Anantathananid អគ្គនាយិការង និងជានាយិកាគ្រប់គ្រងអាជីវកម្ម បានចែករំលែកផងដែរថា៖
«ពានរង្វាន់នេះបង្ហាញពីការប្តេជ្ញាចិត្តយ៉ាងជ្រាលជ្រៅរបស់យើងខ្ញុំចំពោះក្រុមហ៊ុនសាជីវកម្មក្នុងប្រទេសកម្ពុជា ដែលយើងបន្តផ្តល់នូវដំណោះស្រាយហិរញ្ញវត្ថុសមស្រប ដែលជំរុញប្រសិទ្ធភាព សន្ទនីយភាព និងកំណើន។ ផលប័ត្រសាជីវកម្មរបស់យើងខ្ញុំស្ថិតក្នុងចំណោមក្រុមហ៊ុនខ្នាតធំ និងរឺងមាំបំផុតក្នុងប្រទេសកម្ពុជា ដែលបង្កើតឡើងផ្អែកទៅលើទំនុកចិត្ត និងភាពស្មោះត្រង់នៃអតិថិជនរបស់យើងខ្ញុំ។ ចាប់ពីការផ្តល់ប្រាក់កម្ចី និងហិរញ្ញប្បទានពាណិជ្ជកម្មដែលរៀបចំយ៉ាងម៉ត់ចត់ រហូតដល់សេវាកម្មប្រតិបត្តិការធនាគារកម្រិតខ្ពស់ ការផ្តល់ជូនរបស់យើងខ្ញុំត្រូវបានរចនាឡើងដើម្បីបំពេញតម្រូវការដ៏ចាំបាច់របស់ក្រុមហ៊ុនពហុជាតិ សហគ្រាសក្នុងស្រុក និងសហគ្រាសធុនតូច និងមធ្យមធំៗនៅទូទាំងប្រទេសកម្ពុជា។ នាងខ្ញុំមានមោទនភាពចំពោះការលះបង់របស់ក្រុមការងាររបស់យើងខ្ញុំ និងសូមថ្លែងអំណរគុណចំពោះការជឿទុកចិត្តរបស់អតិថិជនចំពោះយើងខ្ញុំ ដែលជាកម្លាំងចលករក្នុងការជំរុញឲ្យយើងនៅតែប្តេជ្ញាចិត្តក្នុងការជួយអភិវឌ្ឍន៍អាជីវកម្មឱ្យកាន់តែរឹងមាំ និងពង្រឹងភាពជាដៃគូរបស់យើងជាមួយអតិថិជន តាមរយៈការផ្តល់ហិរញ្ញប្បទានទៅតាមតម្រូវការ ដែលមានលក្ខណៈបត់បែនតាមសេចក្តីត្រូវការ សេវាកម្មធនាគារបែបឌីជីថលដ៏ល្អឥតខ្ចោះ និងការគ្រប់គ្រងទំនាក់ទំនងល្អជាមួយអតិថិជនយ៉ាងសកម្ម»៕