(ភ្នំពេញ)៖ ប្រទេសកម្ពុជាត្រូវបានទទួលស្គាល់ លើឆាកអន្តរជាតិខណៈដែលពេលថ្មីៗនេះ សាកលវិទ្យាល័យពុទ្ធិសាស្រ្ត បានទទួលនូវចំណាត់ថ្នាក់កិតិ្តយស ជាលំដាប់គ្រឹះស្ថានអប់រំល្អជាងគេ ពីស្ថាប័នវាយតម្លៃវិស័យអប់រំអន្តរជាតិជាច្រើន។ ដោយសមិទ្ធផលទាំងនេះ មិនត្រឹមតែបង្ហាញពីការប្តេជ្ញាចិត្តរបស់ សាកលវិទ្យាល័យពុទ្ធិសាស្រ្ត ចំពោះការអភិវឌ្ឍន៍ខ្លួនឱ្យបានល្អក្នុងនាមជាគ្រឹះស្ថានអប់រំប៉ុណ្ណោះទេ ប៉ុន្តែបានបង្កើតនូវប្រវត្តិសាស្ត្រថ្មីដល់គ្រឹះស្ថានឧត្តមសិក្សា របស់ប្រទេសកម្ពុជាទាំងមូល សម្រាប់ការអភិវឌ្ឍន៍ខ្លួនលើផ្នែកនវានុវត្តន៍ សុចរិតភាព និងគុណភាពនៃការអប់រំ ដែលស្របតាមគោលដៅរបស់រាជរដ្ឋាភិបាល ក្នុងការប្តេជ្ញាចិត្តជំរុញសេដ្ឋកិច្ច និងសង្គមដែលផ្អែកលើចំណេះដឹងជាមូលដ្ឋាន។

ជាប្រវត្តិសាស្រ្តសម្រាប់វិស័យអប់រំនៅប្រទេសកម្ពុជា ជាមួយការជាប់ចំណាត់ថ្នាក់របស់សាកលវិទ្យាល័យពុទ្ធិសាស្រ្តនេះ បានក្លាយជានិមិត្តរូបជាតិ តាមរយៈ ឆន្ទៈមោះមុត ទស្សនៈវិស្ស័យច្បាស់លាស់ និងការកែលម្អផ្អែកលើគុណភាពជាគ្រឹះ។ ក្នុងចំណាត់ថ្នាក់ World University Rankings for Innovation (WURI) ឆ្នាំ២០២៥ សាកលវិទ្យាល័យពុទ្ធិសាស្រ្ត បានទទួលចំណាត់ថ្នាក់ដូចខាងក្រោម៖
- លំដាប់ទី១០ សម្រាប់ការទទួលស្គាល់ជាសកល ចំពោះក្រមសីលធម៌ និងសុចរិតភាព (Ethics and Integrity)
- លំដាប់ទី១២ សម្រាប់ការការចល័តនិស្សិត និងការបើកទូលាយ(Student Mobility and Openness) និង
- លំដាប់ទី៤៤ សម្រាប់ការទទួលស្គាល់ជាសកល ចំពោះស្មារតីសហគ្រិនភាព (Entrepreneurial Spirit)។

ភាពជោគជ័យទាំងនេះ មិនត្រឹមតែជួយលើកកម្ពស់សាកលវិទ្យាល័យ តែមួយប៉ុណ្ណោះទេ ប៉ុន្តែថែមទាំងបញ្ជាក់ថា ប្រទេសកម្ពុជា បានត្រៀមរួចជាស្រេចក្នុងការប្រកួតប្រជែងលើឆាកអន្តរជាតិ តាមរយៈនវានុវត្តន៍នៃការអប់រំដែលមានអត្ថប្រយោជន៍ដល់សង្គម និងសេដ្ឋកិច្ចទាំងមូល។

ក្នុងស្ថាប័នចំណាត់ថ្នាក់អន្តរជាតិ AppliedHE សម្រាប់សាកលវិទ្យាល័យឯកជនឆ្នាំ២០២៥ សាកលវិទ្យាល័យពុទ្ធិសាស្រ្ត ក៏ត្រូវបានទទួលស្គាល់ជាកិត្តិយសជាច្រើនផងដែរ រួមមាន៖
- លំដាប់ទី១០ លើផ្នែកភាពមានការងារធ្វើរបស់និស្សិត។
- ការជ្រើសរើសជាសាកលវិទ្យាល័យឯកជនល្អបំផុត។
- លំដាប់ទី ៤១ ក្នុងចំណោមសាកលវិទ្យាល័យឯកជននៅតំបន់អាស៊ាន។

ចំណាត់ថ្នាក់ទាំងនេះ ឆ្លុះបញ្ចាំងពីការកើនឡើងនៃធនធានមនុស្ស ដែលមានទេពកោសល្យការបង្កើតការស្រាវជ្រាវដែលមានឥទ្ធិពលដល់សង្គម និងការបណ្តុះបណ្តាលអ្នកដឹកនាំសម្រាប់អនាគតឱ្យមានជំនាញសមស្រប និងមានសមត្ថភាពសម្រាប់ការប្រកួតប្រជែងជាមួយនឹងអន្តរជាតិ។

កេរ្តិ៍ឈ្មោះវិស័យអប់រំនៃប្រទេសកម្ពុជា កំពុងតែមានការរីកចម្រើនដោយ សាកលវិទ្យាល័យពុទ្ធិសាស្រ្តត្រូវបានចាត់ទុកថាជាចំណាត់ថ្នាក់លេខ១ នៅកម្ពុជា ដោយអង្គភាពអន្តរជាតិឈានមុខគេពីស្ថាប័ន ៖
- Times Higher Education (THE) ជាសាកលវិទ្យាល័យតែមួយគត់នៅកម្ពុជា ដែលត្រូវបានជាប់ចំណាត់ថ្នាក់ក្នុង THE Impact Rankings ២០២៥
- AD Scientific Index ២០២៥ ទទួលបានចំណាត់ថ្នាក់ជាសាកលវិទ្យាល័យល្អបំផុតលើផ្នែកការបោះពុម្ព និងការដកស្រង់អត្ថបទស្រាវជ្រាវ (Research publications and citations)
- QS Top Universities ឈរនៅលំដាប់លេខ១ នៅកម្ពុជា និងលេខ៩៩ នៅអាស៊ីអាគ្នេយ៍ ក្នុងឆ្នាំ២០២៤។

លើសពីនេះផងដែរ សាកលវិទ្យាល័យពុទ្ធិសាស្រ្ត ត្រូវបានទទួលស្គាល់ដោយគណៈកម្មាធិការទទួលស្គាល់គុណភាពអប់រំនៃកម្ពុជា (ACC) នៃក្រសួងអប់រំ យុវជន និងកីឡា ដែលបានផ្តល់វិញ្ញាបនបត្រទទួលស្គាល់ រយៈពេលប្រាំឆ្នាំពេញ នៅក្នុងខែមេសា ឆ្នាំ២០២៥ ដែលបង្ហាញភាពជោគជ័យជាមួយនឹងប្រទេសកម្ពុជា ក្នុងការប្តេជ្ញាលើកស្ទួយស្តង់ដារអប់រំជាតិឱ្យស្របតាមស្តង់ដារបស់អន្តរជាតិ។

លោកសាស្ត្រាចារ្យ អ៊ាន រ៉ូស សាកលវិទ្យាធិការ និងអនុអធិការបតី នៃសាកលវិទ្យាល័យពុទ្ធិសាស្រ្តបានមានប្រសាសន៍ថា «ក្នុងនាមខ្ញុំជាសាកលវិទ្យាធិការ នៃសាកលវិទ្យាល័យពុទ្ធិសាស្រ្ត ខ្ញុំមានមោទកភាពយ៉ាងខ្លាំងដែលបានឃើញ សាកលវិទ្យាល័យមិនត្រឹមតែសម្រេចបានភាពរីកចម្រើននោះទេ ប៉ុន្តែថែមទាំងជួយលើកកម្ពស់កិត្តនាមរបស់ប្រទេសកម្ពុជា លើឆាកអន្តរជាតិសម្រាប់វិស័យអប់រំ ជាមួយនឹងចំណាត់ថ្នាក់អន្តរជាតិជាច្រើនដែលយើងទទួលថ្មីៗ នេះរួមមាន ចំណាត់ថ្នាក់លំដាប់អន្តរជាតិកំពូលទៅលើក្រមសីលធម៌ កម្មវិធីផ្លាស់ប្តូរការសិស្សា ស្មារតីសហគ្រិនភាព និងអត្រាខ្ពស់នៃសិស្សដែលបានបញ្ចប់ការសិក្សា និងទទួលបានការងារ ដែលនេះគឺជាភស្តុតាងនៃការប្តេជ្ញាចិត្តរបស់យើងចំពោះគុណភាព នវានុវត្តន៍ និងសច្ចៈភាពសម្រាប់ការអប់រំ»។

លោកបន្តថា «ទាំងនេះមិនមែនជាភាពជោគជ័យរបស់ សាកលវិទ្យាល័យពុទ្ធិសាស្រ្តតែមួយប៉ុណ្ណោះទេ ប៉ុន្តែវាបានបង្ហាញពីសមត្ថភាពនៃការរីកចម្រើនរបស់ប្រទេសកម្ពុជា ក្នុងការបង្កើតឱ្យមានអ្នកដឹកនាំលើវិស័យអប់រំកម្រិតខ្ពស់ ការស្រាវជ្រាវ និងការចូលរួមគ្នាជាមួយសង្គមអន្តរជាតិ ដោយការវិនិយោគទៅលើសិស្សានុសិស្ស សាស្ត្រាចារ្យ និងអនាគតរបស់យើង។ សាកលវិទ្យាល័យពុទ្ធិសាស្រ្តមានមោទកភាព ក្នុងការប្រែក្លាយជាផ្នែកមួយនៃជំពូកថ្មីសម្រាប់ការអប់រំកម្រិតខ្ពស់នៅកម្ពុជា ក្នុងការប្រកួតប្រជែង ចូលរួមបណ្ដុះបណ្ដាល អភិវឌ្ឍ និងដឹកនាំលើឆាកអន្តរជាតិបាន»។

សមិទ្ធផលទាំងនេះ មិនមែនត្រឹមតែជាសមិទ្ធិផលនៃការអប់រំប៉ុណ្ណោះទេ ប៉ុន្តែវាគឺជាមូលដ្ឋានសម្រាប់ការអភិវឌ្ឍន៍សង្គមជាតិ។ តាមរយៈការកសាងស្ថាប័នយ៉ាងរឹងមាំ ដូចជាសាកលវិទ្យាល័យពុទ្ធិសាស្រ្តសម្រាប់ប្រទេសកម្ពុជា គឺបាននឹងកំពុង កសាងធនធានមនុស្ស ដើម្បីពង្រឹងខ្លួនក្នុងការប្រកួតប្រជែងជាមួយអន្តរជាតិ និងការត្រៀមរួចជាស្រេចក្នុងការបណ្ដុះបណ្ដាលយុវជនជំនាន់ក្រោយ ដែលជាសសរស្តម្ភ សម្រាប់សង្គមជាតិ ប្រកបដោយក្រមសីលធម៌។ ក្នុងឱកាសដែលព្រះរាជាណាចក្រកម្ពុជា កំពុងឆ្ពោះទៅរកភាពជាអ្នកដឹកនាំក្នុងតំបន់ និងដើរតួយ៉ាងសំខាន់ក្នុងការចូលរួមជាមួយឆាកអន្តរជាតិ ភាពជោគជ័យរបស់សាកលវិទ្យាល័យពុទ្ធិសាស្រ្ត បង្ហាញឱ្យឃើញថា ព្រះរាជាណាចក្រកម្ពុជា មិនត្រឹមតែរីកចម្រើនប៉ុណ្ណោះទេ ប៉ុន្តែបានជំរុញ និងអភិវឌ្ឍយ៉ាងឆាប់រហ័សទៅថ្ងៃអនាគត៕