(បរទេស)៖ និយ័តករ​ Prudential ​របស់​ប្រទេស​អូស្ត្រាលី (APRA) ​ដែលជាស្ថាប័នមើលការខុសត្រូវប្រព័ន្ធធនាគារក្នុងប្រទេស បានចេញសេចក្តីព្រមានថា វិស័យធនាគារកំពុងប្រឈមមុខនឹងហានិភ័យនៃការវាយប្រហារតាមប្រព័ន្ធអ៊ីនធឺណិតកាន់តែច្រើនឡើង ដោយសារតែភាពតានតឹងផ្នែកភូមិសាស្ត្រនយោបាយ។ នេះបើយោងតាមការចេញផ្សាយដោយ CNA នៅថ្ងៃទី២១ ខែសីហា ឆ្នាំ២០២៥។

លោក John Lonsdale ប្រធាន APRA បានបញ្ជាក់ថា ស្ថាប័នរបស់លោកនឹងបង្កើនកិច្ចសហការជាមួយធនាគារនានាដើម្បីទប់ទល់នឹងការគំរាមកំហែងនេះ។ ក្នុងរបាយការណ៍ប្រចាំឆ្នាំរបស់ខ្លួន APRA មិនបានបញ្ជាក់ពីប្រទេសណាមួយដែលត្រូវសង្ស័យថាជាអ្នកនៅពីក្រោយការវាយប្រហារឡើយ។ ក្រៅពីកត្តានយោបាយ លោក Lonsdale ក៏បានលើកឡើងពីហានិភ័យថ្មីមួយទៀត គឺការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដែលកំពុងកើនឡើងយ៉ាងឆាប់រហ័សផងដែរ។

ដើម្បីត្រៀមទប់ទល់នឹងបញ្ហាទាំងនេះ APRA បានបង្កើតក្រុមការងារហានិភ័យភូមិសាស្ត្រនយោបាយដំបូងបង្អស់របស់ខ្លួនកាលពីឆ្នាំ ២០២៤ ដើម្បីកំណត់អត្តសញ្ញាណការគំរាមកំហែងនានាចំពោះប្រព័ន្ធធនាគារជាតិ។

យោងតាមរបាយការណ៍របស់ធនាគារជាតិអូស្ត្រាលី (National Australia Bank) កាលពីឆ្នាំមុនបានបង្ហាញថា ប្រជាជនអូស្ត្រាលីជាង ២/៣ ធ្លាប់រងផលប៉ះពាល់ដោយការវាយប្រហារតាមអ៊ីនធឺណិត ឬការបែកធ្លាយទិន្នន័យផ្ទាល់ខ្លួន៕