(ភ្នំពេញ)៖ បន្ទាប់ពីគ្រងតំណែងជាបវរកញ្ញាអន្តរជាតិ Miss Teen International 2024 មួយឆ្នាំពេញ ពេលនេះក៏ដល់កំណត់ហើយដែលកញ្ញា លី មួយលាង ត្រូវផ្ទេរតំណែងដ៏អស្ចារ្យនេះទៅកាន់អ្នកជំនាន់ថ្មី ដែលនឹងធ្វើឡើងនៅប្រទេសឥណ្ឌា នាថ្ងៃទី៣១ ខែសីហា ខាងមុខ ខណៈនៅរសៀលថ្ងៃទី២១ សីហានេះ បវរកញ្ញាកម្ពុជាអន្តរជាតិរូបនេះក៏បានកាន់ទង់ជាតិកម្ពុជាយ៉ាងអង់អាចសំដៅទៅកាន់ប្រទេសឥណ្ឌាហើយ។

អ្វីដែលរំភើប និងគួរឱ្យមោទនភាពបំផុតនោះ មុនពេលចេញដំណើរតាមយន្ដហោះបវរកញ្ញាកម្ពុជា លី មួយលាង បានប្ដេជ្ញាចិត្តយ៉ាងមុតមាំថា នឹងធ្វើរឿងដ៏ភ្ញាក់ផ្អើលមួយសម្រាប់ប្រជាជាតិខ្មែរ នៅពេលឡើងដល់លើឆាកកម្មពិធីប្រកួតសម្រស់អន្តរជាតិមួយនេះ ពោលគឺកញ្ញា លី មួយលាង ថានឹងលាតត្រដាងការពិតទាំងអស់ពាក់ព័ន្ធនឹងទង្វើឈ្លានពានរបស់សៀមមកលើកម្ពុជាប្រាប់ទៅកាន់ពិភពលោក។​

ទន្ទឹមនឹងការចាកចេញទៅផ្ទេរតំណែងរបស់កញ្ញា លី មួយលាង មកលោក អ៊ិន វិចិត្រ ដែលជាអ្នកគ្រប់គ្រងកម្មពិធី Miss Teen International Cambodia ឯណោះវិញ ក៏បានបង្ហាញអារម្មណ៍សោកស្ដាយដែលឆ្នាំនេះកម្ពុជាមិនមានបេក្ខភាពទៅចូលរួមប្រកួតបន្ត ប៉ុន្តែសម្រាប់បវរកញ្ញាកម្ពុជា លី មួយលាង គឺបានបំពេញការងារ និងកាតព្វកិច្ចបានយ៉ាងល្អក្នុងនាមតំណាងឲ្យប្រទេសកម្ពុជា។

សូមបញ្ជាក់ថា រយៈពេល១នៃការគ្រងតំណែងជាម្ចាស់មកុដ Miss Teen International កញ្ញា លី មួយលាង បានធ្វើកិច្ចការជាច្រើនមិនថា កិច្ចការងារសង្គម ឬសិល្បៈវប្បធម៌។ ក្រៅពីនេះ មួយលាង ក៏មានស្នាដៃក្នុងខ្សែភាពខ្នាតធំលំដាប់អន្តរជាតិដែលនឹងចាក់ផ្សាយនាពេលឆាប់ៗខាងមុខនេះផងដែរ៕