(បរទេស)៖ ក្រុមហ៊ុនបច្ចេកវិទ្យាយក្ស Meta Platforms បានសម្រេចផ្អាកការជ្រើសរើសបុគ្គលិកថ្មីក្នុងផ្នែក បញ្ញាសិប្បនិម្មិត (AI) ជាបណ្ដោះអាសន្ន។ ការសម្រេចចិត្តនេះធ្វើឡើងបន្ទាប់ពីក្រុមហ៊ុនបានចំណាយប្រាក់យ៉ាងច្រើនសន្ធឹកសន្ធាប់ ដើម្បីប្រមូលផ្ដុំអ្នកស្រាវជ្រាវ និងវិស្វករកំពូលៗជាង ៥០ នាក់ ពីក្រុមហ៊ុនដៃគូប្រកួតប្រជែងដូចជា Google, OpenAI និង Apple។ នេះបើយោងតាមការរាយការណ៍របស់សារព័ត៌មាន The Wall Street Journal ដែលចេញផ្សាយបន្តដោយ CNA នៅថ្ងៃទី២១ ខែសីហា ឆ្នាំ២០២៥។

អ្នកនាំពាក្យរបស់ក្រុមហ៊ុន Meta បានបញ្ជាក់ប្រាប់ទីភ្នាក់ងារសារព័ត៌មាន Reuters ថា៖ «អ្វីដែលកំពុងកើតឡើងនៅពេលនេះ គឺជាការរៀបចំផែនការរចនាសម្ព័ន្ធមូលដ្ឋានមួយ។ ក្រុមហ៊ុនកំពុងបង្កើតរចនាសម្ព័ន្ធដ៏រឹងមាំសម្រាប់កិច្ចខិតខំប្រឹងប្រែងផ្នែក superintelligence ថ្មីរបស់យើង បន្ទាប់ពីបាននាំអ្នកជំនាញមកចូលរួម និងកំពុងអនុវត្តការរៀបចំផែនការ និងថវិកាប្រចាំឆ្នាំ»។

យោងតាមប្រភពផ្ទៃក្នុងមួយចំនួនបានឱ្យដឹងថា ការចំណាយទៅលើការជួលអ្នកជំនាញ AI ទាំងនេះមានតម្លៃខ្ពស់បំផុត ដោយខ្លះមានតម្លៃខ្លួនរហូតដល់ខ្ទង់រយលានដុល្លារ។ ការចំណាយដ៏ធំនេះ បានក្លាយជាក្ដីបារម្ភសម្រាប់វិនិយោគិនមួយចំនួន។

គួរជម្រាបផងដែរថា ការផ្អាកការជួលនេះក៏រាប់បញ្ចូលទាំងការរារាំងបុគ្គលិកបច្ចុប្បន្នមិនឱ្យផ្លាស់ប្តូរតំណែងពីក្រុមមួយទៅក្រុមមួយទៀតក្នុងផ្នែក AI ផងដែរ។ ទោះជាយ៉ាងណា ក្រុមហ៊ុនមិនបានបញ្ជាក់ពីរយៈពេលជាក់លាក់នៃការផ្អាកនេះនៅឡើយទេ៕