(មេនឆេស្ទើ)៖ មេឃខៀវ Manchester City នឹងបើកទ្វារកីឡដ្ឋាន Etihad របស់ខ្លួន ដើម្បីលេងជំនួបធំលើកដំបូងនារដូវកាលថ្មីតាមរយៈប៉ះ Tottenham Hotspur ដែលជាជើងឯក UEFA Europa League រដូវកាលមុន ដែលជាជំនួបខ្លាំងប៉ះខ្លាំងប្រចាំសប្តាហ៍ទី២ នៅលីគកំពូលអង់គ្លេស Premier League 2025-26។

ទាំង City និង Spurs សុទ្ធតែរកបាន ៣ពិន្ទុកាលថ្ងៃបើកឆាករដូវកាលថ្មីដូចគ្នា ស្របពេលក្រុមរបស់លោក Pep Guardiola ឈរទីកំពូលតារាងលីគបណ្តោះអាសន្ន ក្នុងនាមស៊ុតទីគូប្រកួតបានច្រើនជាងគេ មុនមកប៉ះមាន់ខ្នាយមាស នាម៉ោង ៦៖៣០នាទីល្ងាចថ្ងៃសៅរ៍ស្អែកនេះ (ម៉ោងនៅកម្ពុជា)។

Spurs បានបំបាក់អតីតជើងឯកលីគ ៤សម័យកាលជាប់ៗ Man City ដោយលទ្ធផល ៤ទល់នឹង០ តែម្តងនៅកីឡដ្ឋាន Etihad មុនពេលលេងជើងទី២ ចាញ់តែ ១-០ ប៉ុណ្ណោះក្នុងឆ្នាំ២០២៥ នេះ។

ទោះជាយ៉ាងណា ទាំងអ្នកចាត់ការទូទៅ និងកូនក្រុម សុទ្ធតែស្រេកឃ្លានជ័យជម្នះដូចគ្នា ដើម្បីបន្តក្តោបក្តាប់តំណែងកំពូលតារាង ក្រោយពេលខកចិត្តរដូវកាលមុន ដោយពុំបានឈ្នះពានណាមួយឡើយលើកដំបូង ក្នុងប្រវត្តិសាស្រ្តសម្រាប់ពួកគេ គ្រាដែលគូប្រជែង Spurs ដែលពុំមានវត្តមាន Son ទើបតែបានខកចិត្តក្នុងពានបើករដូវកាលកម្មវិធីអឺរ៉ុប UEFA Super Cup 2025 ដោយបានចាញ់ PSG ពីបាល់ ១១ម៉ែត្រកាត់សេចក្តី៕