(ភ្នំពេញ)៖ លោក Matthew McConkey គ្រូបង្វឹកក្រុមព្រះខ័នរាជស្វាយរៀង ហាក់មិនសូវសប្បាយចិត្តជាមួយលទ្ធផល ក៏ដូចជារបៀបលេងរបស់កូនក្រុមឡើយ បើទោះបីក្រុមបានយកឈ្នះក្រុមម្ចាស់ផ្ទះ Shan United ដោយលទ្ធផល ៣-០ នៅក្នុងជំនួបបបើឆាកពូលB នៃពានរង្វាន់ជើងឯកក្លិបបាល់ទាត់អាស៊ីអាគ្នេយ៍ (ASEAN Club Championship Shopee Cup) ឆ្នាំ២០២៥/២៦។

នៅក្នុងសន្និសីទសារព័ត៌មាន ក្រោយចប់ការប្រកួតគ្រូបង្វឹកសញ្ជាតិអៀរឡង់រូបនេះ បានលើកឡើងថា ការប្រកួតដំបូងនេះ ពិតជាសំខាន់ ដែលក្រុមត្រូវការជ័យជម្នះ ដើម្បីទទួលបានពិន្ទុក្នុងពូល ហើយកីឡាករក៏ដូចគ្នា ។ ប៉ុន្ដែការចាប់ផ្ដើមរបស់ក្រុមហាក់ធ្វើមិនបានល្អ ទោះបីគូប្រជែង សល់សមាជិកត្រឹម ១០នាក់ បន្ទាប់ពីកីឡាករ Ryuji Hirota របស់ Shan United ត្រូវបានពិន័យកាតក្រហមដោយផ្ទាល់ នៅនាទី១៨ ក៏ដោយ។

លោក Matthew McConkey បានគូសបញ្ជាក់ថា «យើងធ្វើមិនបានល្អ ក្នុងរយៈពេល ២នាទីដំបូង(មានការប៉ះទង្គិចក្នុងប្រអប់គ្រោះថ្នាក់) ហើយបន្ទាប់មកច្បាស់ណាស់ការសម្រេចចិត្តរបស់ VAR ជួយយើង។ បន្ទាប់មកទៀត ច្បាស់ណាស់កាតក្រហមជួយយើង ប៉ុន្ដែខ្ញុំគិតថា នៅពេលដែលមានកាតក្រហម ក្រុមរបស់យើងរៀនអន់ថយកម្រិតទៅវិញ ។ យើងត្រូវការភាពស៊ីសង្វាក់គ្នាបន្ថែមទៀត ទាក់ទងនឹងរបៀបដែលយើងលេង»។

លោកបន្ដថា ក្រោយពីក្រុមម្ចាស់ផ្ទះ មានសមាជិកម្នាក់ត្រូវបណ្ដេញចេញទីលាន ច្បាស់ណាស់វាមិនល្អសម្រាប់ពួកគេ ដែលបង្ខំឲ្យពួកគេផ្ដោតលើការការពារច្រើន ។ ព្រះខ័នរាជស្វាយរៀង បានគ្រប់គ្រងការប្រកួត ជាមួយការប្រកួតបែប វាយលុក និងការពារ។ ប៉ុន្ដែប្រសិនបើ Shan United មិនមានកីឡាកររងពិន័យកាតក្រហម ប្រហែលការលេងរបស់ពួកគេនឹងល្អជាងជាងនេះបន្ដិច ហើយក៏អាចបង្កផលលំបាកដល់ក្រុមខ្លួនផងដែរ។

សូមរំឮកថា គ្រាប់បាល់ជ័យជម្នះ ក្នុងការប្រកួតដំបូង របស់ក្លិបព្រះខ័នរាជស្វាយរៀង នៃជើងឯកក្លិបប្រចាំតំបន់អាស៊ានខាងលើ ធ្វើសម្រេចដោយកីឡាករ មិន រតនៈ នៅនាទី១១, Patrick Robson នៅនាទី៤៥+៥ និងកីឡាករ Peprah Kwame នៅនាទី៥៣ ។ ជ័យជម្នះនេះ នាំឲ្យក្រុមព្រះខ័នរាជស្វាយរៀង ឈរកំពូលតារាងបណ្ដោះអាសន្ន ដោយរកបាន ៣ពិន្ទុ ស្មើក្រុមម៉ាឡេស៊ី Johor Darul Ta’zim FC ដែលបានយកឈ្នះក្រុមម្ចាស់ផ្ទះ Lion City Sailors FC របស់សិង្ហបុរី កាលពីថ្ងៃព្រហស្បតិ៍កន្លងទៅ។

សម្រាប់កម្មវិធីប្រកួតបន្ទាប់ ព្រះខ័នរាជស្វាយរៀង នឹងត្រូវបន្ដភារកិច្ចប្រកួតក្រៅដី ដោយត្រូវជួបក្រុម Nam Dinh របស់វៀតណាម ថ្ងៃទី២៥ ខែកញ្ញា មុនបើកទ្វារផ្ទះទទួលក្រុមភ្ញៀវ ដែលជាក្លិបធំៗក្នុងពូល ២ប្រកួតជាប់គ្នា ដោយត្រូវជួបក្រុមខ្លាំង Johor Darul Ta’zim FC នាថ្ងៃទី៤-ធ្នូ និងជួបក្រុម Bangkok United របស់ថៃ នាថ្ងៃទី២៩ ខែមករា ឆ្នាំ២០២៦ មុនជំនួបបញ្ចប់ពូលB ជាមួយក្រុមម្ចាស់ផ្ទះ Lion City Sailors FC នាថ្ងៃទី៥ ខែកុម្ភៈ ឆ្នាំ២០២៦ ខាងមុខ៕