(បរទេស)៖ ក្រុមឥន្រ្ទី Crystal Palace ម្ចាស់ជើងឯក FA Cup រដូវកាលមុន បានយកឈ្នះគូប្រជែង Fredrikstad ១ទល់នឹង០ នាយប់មិញសម្រាប់ជើងទី១ នៃការប្រជែងកៅអីឡើងទៅវគ្គចែកពូលពានលំដាប់ទី៣ អឺរ៉ុប UEFA Europa Conference League 2025-26។

ពីគេហទំព័រកីឡា BBC បានចេញផ្សាយថា ក្នុងជំនួបដែលត្រូវបានធ្វើឡើងនាកីឡដ្ឋាន Selhurst Park កាលពីរាត្រីថ្ងៃព្រហស្បតិ៍នោះ អ្នកគាំទ្ររបស់ពួកគេភាគច្រើនបានពាក់អាវ «Eze 10» អតីតវីរបុរសពួកគេ ដែលបានផ្ទេរចេញទៅចូលរួមជាមួយគូប្រជែងក្នុងលីគគឺ កាំភ្លើងធំ Arsenal ក្រោយរួមរស់បាន ៥ឆ្នាំ ដែលផ្លាស់មកពី QPR។

ក្រោយទទួលបានជ័យជម្នះក្នុងដី លោក Oliver Glasner បានប្រកាសថា «Eze គឺស្ថិតនៅលើផ្លូវការចេញពីក្លិបហើយ។ រូបគេមិនលេងជាមួយពួកយើងទៀតទេ ហើយក៏គ្មានចាំបាច់អីនិយាយពីគាត់ទៀតដែរ»។

Crystal Palace បានកំពុងព្យាយាមដណ្តើមកៅអីលេងពានអឺរ៉ុបលើកដំបូងឡើងវិញ ក្នុងរយៈពេល ២៧ឆ្នាំមកនេះ នៅមុនពេលបញ្ចប់ជើងទី២ នៅក្នុងផ្ទះរបស់ Fedrikstad នាចុងខែសីហានេះ។ ពួកគេទើបខកចិត្ត ដ្បិតសហព័ន្ធអឺរ៉ុប UEFA ដកកៅអីវគ្គចែកពូលពានទី២ UEL ដោយសារ Lyon បានលេងក្នុងកម្មវិធីនេះដែរ ដែលមានម្ចាស់រួមគ្នាតែមួយ៕