(បរទេស)៖ នាពេលថ្មីៗនេះ ក្រុមហ៊ុនវិនិយោគយក្សជប៉ុន SoftBank បានប្រកាសថា នឹងវិនិយោគប្រាក់ចំនួន២ពាន់លានដុល្លារ ទៅក្នុងក្រុមហ៊ុនផលិតឧបករណ៍ពាក់កណ្តាលសម្រេច Intel។ ការវិនិយោគនេះ មានគោលបំណងគាំទ្រការអភិវឌ្ឍបច្ចេកវិទ្យា AI និងផលិតកម្មឧបករណ៍អេឡិចត្រូនិចដ៏សំខាន់នៅសហរដ្ឋអាមេរិក។ នេះបើតាមការចេញផ្សាយដោយសារព័ត៌មាន CNBC។

SoftBank បានទិញភាគហ៊ុនប្រហែល ២ភាគរយក្នុងក្រុមហ៊ុន Intel ដោយមានតម្លៃ ២៣ដុល្លារក្នុងមួយភាគហ៊ុន។ ការវិនិយោគនេះបានធ្វើឲ្យតម្លៃភាគហ៊ុនរបស់ Intel ឡើងដល់ជាង ៥% ខណៈដែលភាគហ៊ុនរបស់ SoftBank បានធ្លាក់បន្តិច។ SoftBank បង្កើនការវិនិយោគក្នុងវិស័យ AI និងឧបករណ៍ពាក់កណ្តាលសម្រេច ដើម្បីជាបន្ទុកចម្បងនៃយុទ្ធសាស្ត្របច្ចេកវិទ្យារបស់ខ្លួន។ ប្រធានក្រុមហ៊ុន SoftBank លោក Masayoshi Son បាននិយាយថា Intel ជាក្រុមហ៊ុនឈានមុខគេក្នុងការច្នៃប្រឌិត និងមានសារៈសំខាន់សម្រាប់សន្តិសុខបច្ចេកវិទ្យា និងឧស្សាហកម្មអាមេរិក។

គួរជម្រាបថា ការវិនិយោគនេះគឺកើតមានឡើងក្នុងពេលដែល Intel កំពុងខិតខំស្ដារឡើងវិញនូវក្រុមហ៊ុនរបស់ខ្លួន បន្ទាប់ពីការបាត់បង់ប្រាក់ចំណូលប្រចាំឆ្នាំជាលើកដំបូងតាំងពីឆ្នាំ២៩៨៦ និងប្រឈមការប្រកួតប្រជែងដ៏ខ្លាំងពីក្រុមហ៊ុនដូចជា Nvidia។ ការវិនិយោគរបស់ SoftBank ក្នុង Intel មិនត្រឹមតែជាជំហានហិរញ្ញវត្ថុប៉ុណ្ណោះទេ ប៉ុន្តែវាក៏បង្ហាញពីការជឿជាក់លើសមត្ថភាពរបស់ Intel ក្នុងការប្រឈមនឹងបញ្ហាធំៗនៃឧស្សាហកម្មផលិតផលពាក់កណ្តាលសម្រេច និងបច្ចេកវិទ្យា AI ផងដែរ៕