(ភ្នំពេញ)៖ បន្ទាប់ពីរាជរដ្ឋាភិបាលកម្ពុជា បានសម្រេចទម្លាក់អត្រាពន្ធ ០ភាគរយ លើមុខទំនិញដែលនាំចូលពីសហរដ្ឋអាមេរិកមក កាន់ប្រទេសកម្ពុជាកាលពីពេលថ្មីៗនេះ ជាពិសេសប្រភេទរថយន្តថ្មីៗ និងទទួលបានជាសំនួរជាច្រើនរឿងអត្រាពន្ធសូន្យ និងតម្លៃសម្រាប់ប្រភេទរថយន្តថ្មីមកលក់នៅកម្ពុជា ក្រុមហ៊ុន RMA Cambodia ដែលជាក្រុមហ៊ុននាំចូលរថយន្ដម៉ាក់ល្បីៗមកកាន់ទីផ្សារប្រទេសកម្ពុជា បានរៀបចំសន្និសីទសារព័ត៌មានបង្ហាញពីតម្លៃថ្មី សម្រាប់រថយន្តថ្មីនាំចូលពីសហរដ្ឋអាមេរិក មកលក់នៅទីផ្សារកម្ពុជា។

សន្និសីទសារព័ត៌មាននេះបានធ្វើឡើង នាថ្ងៃទី២២ ខែសីហា ឆ្នាំ២០២៥នេះ ក្រោមវត្តមាន លោក ងន សាំង អគ្គនាយកក្រុមហ៊ុន RMA Cambodia, លោក Devin Barta ក្រុមប្រឹក្សាភិបាលសភាពាណិជ្ជកម្មអាមេរិកប្រចាំនៅកម្ពុជា និងមន្ដ្រីទូតសហរដ្ឋអាមេរិក ព្រមទាំងមន្ដ្រីតំណាងមកក្រសួងនានាជាច្រើនរូបទៀតផងដែរ។

តាមការបញ្ជាក់ពីលោក ងន សាំង សម្រាប់តម្លៃថ្មីនៃរថយន្ដដែលនាំចូលពីសហរដ្ឋអាមេរិកមកលក់នៅក្នុងទីផ្សារប្រទេសកម្ពុជា បន្ទាប់ពីកម្ពុជាសម្រេចយកអត្រាពន្ធ ០ភាគរយ ក្រុមហ៊ុន RMA Cambodia បានកែប្រែ តម្លៃដូចជា៖​ រថយន្ដ JEEP WRANGLER RUBICON តម្លៃដើម 104,900$ ចុះនៅសល់ត្រឹមតែ 97,900$​រថយន្ដ RAM 1500 REBEL តម្លៃដើម 107,900$ ចុះនៅសល់ត្រឹមតែ 99,900$ និងរថយន្ដ FORD RAPTOR F150 ចុះនៅសល់ត្រឹមតែ 149,000$។

បើតាមលោក ងន សាំង បានបញ្ជាក់ថា ទីផ្សាររយន្តនៅកម្ពុជាសព្វថ្ងៃនេះ សម្រាប់រថយន្តថ្មីមានការនាំចូលច្រើនជាងរថយន្តជជុះ ហើយលោកសង្ឃឹមថា នៅចុងឆ្នាំ២០២៥ ចំនួនរថយន្តថ្មីមានការនាំចូលច្រើនជាងរថយន្តជជុះចំនួន ៦០ ភាគរយប្រៀបធៀបចំនួនរថយន្តទាំងអស់។

លោកក៏បានបន្ថែមថា សម្រាប់រថយន្តជជុះនេះ សម្រាប់ប្រទេសនៅក្នុងអាស៊ាន មានតែកម្ពុជាប៉ុណ្ណោះ អនុញ្ញាតឱ្យនាំចូលដោយសារមានវាតម្លៃថោក និងជួយសម្រួលដល់ប្រជាពលរដ្ឋក្នុងការទិញយកមកប្រើប្រាស់ តែទោះជាយ៉ាងណាប្រភេទរថយន្តជជុះនេះ ទោះបីជាមានតម្លៃថោក តែអ្នកប្រើប្រាស់គឺត្រូវចំណាយច្រើនលើការជុសជុលផងដែរ។

សូមជម្រាបថា ក្រុមហ៊ុន RMA Cambodia គឺជាក្រុមហ៊ុនមានដើមកំណើតមកពីសហរដ្ឋអាមេរិក ដែលបានចុះបញ្ជីពាណិជ្ជកម្មនៅទីក្រុងហុងកុង និងមានប្រតិបត្ដិការជាច្រើន នៅប្រទេសក្នុងតំបន់អាស៊ាន និងនៅលើពិភពលោក។ ក្រុមហ៊ុននេះបានវិនិយោគ និងប្រតិបត្ដិការអាជីវកម្ម នៅក្នុងប្រទេសកម្ពុជាកាលពីឆ្នាំ១៩៩២ ដើម្បីនាំចូលនូវរថយន្ដ និងគ្រឿងចក្រកសិកម្មល្បីៗជាច្រើន ពិសេសយីហោរបស់សហរដ្ឋអាមេរិកដ៏ពេញនិយមដូចជា៖ រថយន្ដ FORD, RAM, JEEP និងត្រាក់ទ័រ John Deere ជាដើម។ បច្ចុប្បន្នក្រុមហ៊ុនមានបុគ្គលិកសរុបជាង ៥ ០០០ នាក់ ដែលសុទ្ធសឹងជាជនជាតិខ្មែរផងដែរ៕