(វ៉ាស៊ីនតោន)៖ ប្រធានាធិបតីសហរដ្ឋអាមេរិក Donald Trump បានប្រកាសពីយករដ្ឋធានី វ៉ាស៊ីនតោន ជាទីតាំងរៀបចំកម្មវិធីចាប់ឆ្នោតទាំង ៤៨ប្រទេសនៃព្រឹត្តិការណ៍បាល់ទាត់ពិភពលោក World Cup 2026។ នេះបើយោងតាមការចេញផ្សាយដោយ BBC។

លោក ត្រាំ បានគូសបញ្ជាក់ថា «វាពិតជាអស្ចារ្យខ្លាំងណាស់ អាចថាជាព្រឹតិ្តការណ៍ធំបំផុតហើយក្នុងប្រវត្តិសាស្រ្តកីឡា»។

ទន្ទឹមគ្នានោះដែរ លោក Gianni Infantino ប្រធាន FIFA ក៏បានថ្លែងថា «កម្មវិធីចាប់ឆ្នោតនេះដែរ នឹងមានការ Live ទៅជុំវិញពិភពលោកតែម្តង ដោយរំពឹងទទួលបានអ្នកទស្សនាលើសពី ១ពាន់លាននាក់ទៀតផង»។

យុទ្ធនាការ ៤ឆ្នាំម្តងជំនាន់ទី២៣ នឹងប្រព្រឹត្តទៅនៅសហរដ្ឋអាមេរិក កាណាដា និងមិចស៊ិក ធ្វើម្ចាស់ផ្ទះរួមគ្នា ក្រោយពេលពិធីចាប់ឆ្នោតបែងចែកពូលត្រូវបានធ្វើឡើងនាអំឡុងខែធ្នូ ឆ្នាំ២០២៥ រួចមក លើកដំបូងផងដែរដែលបង្កើនក្រុមពី ៣២ កើនដល់ ៤៨ក្រុម (ប្រទេស)។

ការចាប់ឆ្នោតដែលមាន ៤៨ប្រទេស ក្រោយពីឆ្លងកាត់នៃវគ្គជម្រុះ លើកលែងតែម្ចាស់ផ្ទះ នឹងត្រូវបែងចែកជា ១២ពូល ដោយមាន ៤ក្រុមក្នុង ១ពូលផងនោះ នឹងជ្រើសរើសយកតែ ២ក្រុមមានពិន្ទុខ្ពស់ជាងគេ ក្រោយឆ្លង ៣ប្រកួតប្រចាំពូលនីមួយៗ ជាមួយនឹងលេខ៣ ល្អបំផុតចំនួន ៨ក្រុម ក៏នឹងត្រូវបានជ្រើសរើស ដើម្បីឡើងវគ្គបន្តផងដែរ៕