(ម៉ូនិច)៖ ខ្សែប្រយុទ្ធពាក់លេខ៩ Harry Kane ប្រើពេលត្រឹមតែ ១៣នាទីប៉ុណ្ណោះ ដើម្បីរកបាន ៣គ្រាប់ម្នាក់ឯង រួមចំណែកជួយក្រុមខ្លារខិន Bayern Munich បំបាក់គូប្រជែង RB Leipzig ៦ទល់នឹង០ មិនឱ្យតដៃរួចឡើយនាយប់មិញ។ នេះបើយោងតាមការចេញផ្សាយដោយ BBC។

៣គ្រាប់របស់ប្រធានក្រុមតោកំណាចអង់គ្លេស វ័យ ៣១ឆ្នាំរូបនេះ គឺបានកើតឡើងនៅចន្លោះនាទី៦៤ ដល់នាទី៧៧។ មិត្តរួមក្រុម Olise រកបាន ២គ្រាប់នាំមុខ និងសមាជិកថ្មី Luis Diaz រកបាន ១គ្រាប់ដែរចាប់ពីវគ្គទី១ មកនៅថ្ងៃបើកឆាកលីគកំពូលអាល្លឺម៉ង់ Bundesliga រដូវកាលថ្មី ២០២៥-២៦ ក្នុងនាមជាក្រុមការពារតំណែងជើងឯកទៀតផង។

Leipzig ដែលស្ថិតក្រោមការដឹកនាំដោយអ្នកចាត់ការទូទៅថ្មី លោក Ole Werner ពុំអាចឆ្លើយតប ក៏ដូចជាវាយបកទៅលើម្ចាស់ផ្ទះ Bayern ក្នុងកីឡដ្ឋាន Allianz Arena បានឡើយ នៅពេលកីឡាករ Gnabry និង Joshua Kimmich លេងប្រកបដោយការទាក់ទាញនៅតំបន់បម្រើ ក្នុងការរួមចំណែកជួយប្រយុទ្ធសម្រេចទីបាន ៦គ្រាប់ដោយស្រួលផងដែរ។

ប្រកួតបន្ទាប់ Bayern ត្រូវធ្វើដំណើរទៅប៉ះក្រុមម្ចាស់ផ្ទះ Wehen Wiesbaden សម្រាប់ជុំទី១ នៃកម្មវិធី DFB Pokal នារាត្រីថ្ងៃពុធ មុនធ្វើដំណើរទៅប៉ះ Augsburg ក្នុងលីគប្រចាំសប្តាហ៍ទី២ នៅរាត្រីថ្ងៃសៅរ៍ គ្រាដែល Leipzig ១ប្រកួតបន្ទាប់ក្នុង Bundesliga ត្រូវបើកទ្វារផ្ទះទទួលក្រុម Heidenheim នារាត្រីថ្ងៃសៅរ៍ ទី៣០ ខែសីហា ឆ្នាំ២០២៥៕